Sama art

01/12/2023

07/08/2023

لا تألُف الروحُ إلا من يُلاطِفُها
‏ويهجر القلبُ من يقسو ويجفاهُ
فلا وصال لمن بالوصل قد بخلوا
‏ومن تناسى.. فإنّا قد نسيناهُ

08/01/2021

ولسة مكملين في اسبوع النصايح قبل التشطيب :
61. بلاش تخلي سخان واحد يغذي الحمام و المطبخ مع بعض عشان كل ماتدخل تاخد دش مراتك هتفتح حنفية المطبخ و هتتلسوع.
62. الكرانيش الجاهزة (فيوتك) أفضل 100 مرة من الجبس البلدي.
63. إختار أماكن و مناسيب برايز الكهرباء بعناية عشان دي من أكتر الحاجات اللي هتضايقك لو ما اخترتهاش صح.
64. لو الشقة اللي تحتك متشطبة أو ساكنة نبه على العمال اللي في شقتك مايخمروش مونه على الأرض عشان هتنشع على الشقة اللي تحت و جارك هيطلع يتخانق معاك.
65. لو الشقة اللي فوقك لسه ما اتشطبتش ابقى اتأكد إنه هيعزل الحمام و المطبخ و يختبر السباكة كويس.
66. إعزل الحمام و المطبخ عزل أسمنتي أسهل و أفضل و أرخص.
67. بلاش تمعجن الحوائط كلها و بعدين تركب السيراميك عشان ده من أسباب ظهور رطوبة بأسفل الحوائط.
68. ماتساش تركب منشر في مكان بيوصله شمس عشان مهم.
69. لو شقتك راكب فيها أبواب وحشة و مش معاك فلوس تغيرها ركبلها وشوش MDF .
70. لو الحمام بتاعك ضيق ماتركبش بانيو.. قفل كابينة شاور بيلت إن عملية و هتديلك مساحة واسعة.
🔹🔹تابعنا عاي الهاشتاج دة عشان تشوف باقي النصايح .

07/01/2021

ولسة مكملين في اسبوع النصايح قبل التشطيب :
51. إشتري الخلاطات و الصيني و النواكل للحمام و المطبخ قبل ما السباك يأسس.
52. لو بياض المحارة وحش و فيه مطبات أو شرخ حاول تعالجه قبل الدهانات.
53. لو بياض المحارة لسه فيه عيوب مش عارف تعالجها إستخدم معجون أسمنتي قبل الدهانات.
54. و انت بتقسم شقتك و بتفرشها إهتم براحتك و سعادتك أكتر من إهتمامك بالضيوف لأنك إنت اللي هتعيش في الشقة طول العمر مش الضيوف.
55. لو مش هتركب باب مصفح لباب الشقة يبقى يفضل تعمل باب حديد حماية.
56. ماتنساش تركب سلك لكل الشبابيك عشان الحشرات.
57. السلك الفايبر بيتقطع و السلك الصلب بيصدي.. هات سلك صلب و ادهنه عشان مايصديش.
58. لو عندك غرفة أطفال.. ادهنها لون يمشي أولادي أو بناتي.
59. قفل حوالين البانيو و الحوض و القاعدة و عند جميع زوايا و أركان الحمام و المطبخ بمادة حقن فواصل من شركة سيكا.. صدقني هتعيش مبسوط بعدها.
60. إهتم جداً بسقية السيراميك و يفضل تشتري مادة سقية جاهزة و إوعى تلون أسمنت السقية بأكسيد.
🔹🔹تابعنا عاي الهاشتاج دة عشان تشوف باقي النصايح .

06/01/2021

ولسة مكملين في اسبوع النصايح قبل التشطيب :
41. الزجاج العاكس للشبابيك بيحجب 50% من الإضاءة.
42. الزجاج العاكس للشبابيك بيعكس الصبح بس مابيعكسش بالليل.
43. ألوان السجاد- ألوان الستاير- ألوان الفرش- ألوان الأبواب و الشبابيك- ألوان الموبيليا- ألوان دهانات الحوائط و الأسقف- ألوان الإكسسورات و الأنتيكات و التحف و الصور و البراويز... كل الحاجات دي ليها علاقة ببعض ولازم تنسقها صح عشان شقتك ماتبقاش ملعلطة.
44. حاول على قد ماتقدر تشتري كل لمبات الشقة لمبات ليد.. هتدفع مبلغ كبير بس هتوفره في فواتير الكهرباء.
45. لو هتجيب سخان كهرباء هات سعته كبيرة.
46. السخان الفوري مناسب بس في المطبخ لأنه بيستهلك كهرباء كتير.
47. في تأسيس الكهرباء ماتشتغلش غير بسلك السويدي الأصلي.
48. في تأسيس السباكة مواسير التغذية أكواثيرم أو باننجر و مواسير الصرف الشريف.
49. رخامة المطبخ هاتها جرانيت مش رخام.
50. الأحواض و القاعدة المعلقة بيدوا وسع للحمام و أسهل في النضافة.
🔹🔹تابعنا عاي الهاشتاج دة عشان تشوف باقي النصايح .

05/01/2021

ولسة مكملين في اسبوع النصايح قبل التشطيب :
31. اعمل حسابك لتأسيس التكييف حتى لو مش هتشتري تكيييف.
32. بلاش دهانات مط و بلاش دهانات لامع.. النص لمعة أو الربع لمعة أشيك بكتير.
33. آخر صيحة في الديكورات حالياً هي الأسقف السترتش اللامعة.
34. لو عاوز تدلع مكان معين في شقتك ممكن تعمل ديكورات بـ CNC .
35. اختار كل حاجة قبل ماتبدأ تنفيذ أي حاجة.. دي قاعدة أساسية.
36. أسس اسكيب و شطب جوتن.. ده في الدهانات.
37. مافيش أشيك ولا أرقى من الدهانات السادة بس تختار الألوان صح.
38. بلاش تعمل تفاصيل كتير في الحوائط و الأرضيات و الديكورات عشان تعرف تفرش حضرتك.
39. أي حاجة مط بيبان عليها التراب.. لازم تبقى عارف ده كويس.
40. لو الأبواب الخشب شكلها حلو ادهنها أستر و لو شكلها مش حلو ادهنها لاكية مغسول.
🔹🔹تابعنا عاي الهاشتاج دة عشان تشوف باقي النصايح .

04/01/2021

ظاهرة تركيب السيراميك في الأسقف وخاصة أسقف الحمامات والمطابخ 🤦‍♀️

أنتشرت الأيام دي ظاهرة بسبب الصنايعية وهي أن سقف المطبخ والحمام يكونوا سيراميك
أحب بس أوضح أن مفيش أي متخصص بيوافق علي الكارثة دي
🔹🔹 أه بقول عنها كارثة لعدة أسباب :-

#أولاً : هو ضد قواعد الأمان والسلامة في البيت تخيل حضرتك مركب حاجة تقيلة عكس جاذبية الأرض.

#ثانياً : لو أنت مش أخر دور وحصل تسريب من الدور اللي فوق وده وارد جداً مش هتحس غير لما السقف يوقع عليك لأنه مش باين وأنت مش شايف.

#ثالثاً : سواء حضرتك دور أخير أو لا فكر كده لو واحدة من السيراميك دي أتفكت ووقعت فوق طفل موجود أو حد كبير دي ممكن تقتله لا قدر الله.

#رابعاً : ترسب الأدخنة والبخار الناتج عن عمليات الطبخ أو إستخدام السخان علي المدى البعيد ممكن يخلي السيراميك يفك من مكانه ويوقع.

#خامساً : عامل التمدد والأنكماش بمادة السيراميك من الحرارة الداخلية والخارجية.

ده غير أن موضوع تركيب السقف سيراميك ده لا موجود في أي كتب ليها علاقة بالتصميم أو الديكور علمياً ، ولا فيه أي نوع من أنواع الفن مع إحترامي للناس اللي عامله كده بالفعل.

الحل الوحيد للحمام الحوائط سيراميك والسقف جبيسيوم بورد أخضر اللي هو مقاوم للرطوبة وده مش في كل الحالات أو مصيص عادي مع كورنيشه فيوتك رقيقة.
وموضوع أصل السيراميك أسهل في التنظيف ، رأيي الشخصي طبعاً إني أتعب في المحافظة علي النظافة شوية ولا إني أعرض نفسي وأهل البيت للخطر ...

*أخيراً السيراميك ف الأسقف مرفوض شكلاً وموضوعا*

04/01/2021

ولسة مكملين في نصايح قبل التشطيب :
21. معابر الأبواب مهمة عشان بتمنع الصوت و الضوء و الحشرات.
22. إختار أبواب خشب كويسة عشان ماتندمش و باب الشقة هاته باب مصفح لو معاك فلوس.
23. خلي النجار يركبلك جوانات كاوتش لكل الأبواب عشان بتمنع التراب و الصوت.
24. كل الشبابيك احقن حواليها فوم من الخارج و سليكون من الداخل عشان الحرارة و الصوت و التراب.
25. الجيبسوم بورد بيتعمل بيه حاجات كتير غير الأسقف على فكرة.
26. الجيبسوم بورد حاجة أساسية بس تستخدمه صح لما تحتاجه.
27. أكتر حاجة هتخلي شقتك شيك هي توزيع الإضاءة صح.. لازم تختار مخصص يوزعلك الإضاءة.
28. ماتركبش في الأرضيات السيراميك المستطيل اللي شبه الباركية عشان بيقوس و بيجير.
29. لو عاجبك السيراميك اللي شبه الباركية ركب hdf هتتبسط صدقني.
30. اعمل حساب كل تفصيله في تأسيس الكهرباء و ماتنساش الدش و التليفزيون و التليفون و النت.
🔹🔹تابعنا عاي الهاشتاج دة عشان تشوف باقي النصايح .