Sweet and sassy

03/08/2026

باذنجان مقلى بالفلفل والتوم خطير ♥️
الطريقة
هنجيب باذنجان رومى نغسلها ونقطعها سمك متوسط ونحطها فى ماء وملح لحد ما نسخن طاسة على النار فيها زيت ننزل فيها الباذنجان يتحمر من الناحيتين وياخد لون ذهبي وبعدين نطلعه يتصفى من الزيت ويبرد عما نجهز التتبيلة عبارة عن ٢ فلفل احمر واخضر اللى متوفر وفصين ثوم وملح وفلفل اسود وكزبرة ناشفة وكمون ومعلقة كبيرة خل وعصير نصف ليمونة ونضرب كل ده فى الكبة ونحطه على الباذنجان وبس
وبالهنا والشفا ♥️

25/06/2026

13/06/2026

الكاسترد بالفواكه تحفة فى حر الصيف وسهل وسريع ♥️
الطريقة
لتر حليب ننزل عليه ب 3 معالق كاسترد و 4 معالق كبار سكر ونقلب على البارد ونرفعه على النار لحد ما يغلى يكون قوامه خفيف شوية مش عاوزينه تقيل علشان كدة نحط 3 معالق على لتر الحليب بعد ما يغلى نطفي عليه ونسيبه يبرد ونفضيه فى اى بولة وندخله التلاجة ساعتين وبعدين نطلعه من التلاجة نحط عليه اى فواكه عندنا ونقلبهم على بعض ونقدمهم وبالهنا والشفا ♥️

02/06/2026

الاستربس والأرز الريزو وصوص الريزو بطريقة المطاعم وأسهل طريقة هتعجب الاطفال اللى بيحبوا اكل المطاعم ♥️
اللى عاوز الطريقة يكتبلى فى الكومنتات ♥️

26/05/2026

كباب الحلة أكلة سهلة وسريعة وطعم خطير ♥️
الطريقة
لكل كيلو لحم كباب حلة 5 بصلات متوسطة
فى حلة على النار نحط فيها معلقتين كبار سمنة يسخنوا كويس اوى وبعدين ننزل عليها باللحم على نار عالية علشان مش تنزل مية ولما تاخد لون من تحت نقلبها على الناحية التانية تاخد لون وبعدين نطلعها فى طبق على جنب وفى نفس الحلة ننزل بالبصل ومعلقة صغيرة سكر يتكرمل مع البصل وياخد لون بنى وبعدين ننزل اللحمة عليه ونضيف فلفل اسود و بهارات لحمة وورق لورا وحبهان وكركم وبابريكا ونقلب بعدين ننزل عليها بحوالى نصف كوب ماء مغلى ونغطى عليها على نار متوسطة وكل شوية نبص عليها لو احتاجت مية نزود كل شوية لحد ما تقرب تستوى نضيف الملح ونطفي عليها
وبالهنا والشفا ♥️

11/04/2026

الحواوشي الخطير جربوه ♥️
الطريقة
كمية اللحمة اللى تحبوها لكل كيلو لحمة نصف كيلو بصل و3 فلفل شطه مع عادى و5 فصوص توم
اول حاجة هنجيب الكبة نفرم البصل مع الفلفل والثوم كويس وبعدين نصفيهم من الماء وناخدهم بعد ما اتصفوا نحطهم على اللحمة ونضيف ملح وفلفل اسود وبابريكا وكركم ونعجن كل ده كويس مع بعض وممكن تضربوها تانى فى الكبة علشان اللحمة تكون متماسكة اكتر وبعدين نسيبها نصف ساعة فى التلاجة وبعد كدة نطلعها ونجيب العيش نفتح بالمقص فتحة فى الاول علشان ندخل منها اللحمة ناخد كورة على قد الرغيف ونفردها جواها كويس وبعدين نحطه فى صينية مدهونة زيت او سمنة وندهن وش الرغيف برضو وندخله الفرن لحد ما ياخد لون ذهبي من تحت نقلبه على الناحية التانية ياخد لون ذهبي برضو ونطلعه
الاضافات
ممكن نضيف جبنة موزاريلا على اللحمة وممكن نضيف طماطم متقطعة اعملوا اللى تحبوا ♥️
وبالهنا والشفا ♥️

09/04/2026

فطائر الجلاش حلو وحادق تحفة ومورقة من غير عجن ولا فرد ♥️
الطريقة تحت الصور

25/02/2026

طاجن بسلة بالبطاطس وكفتة البرغل جربوه♥️
طريقة الكفتة
اعملى كمية اللحمة المفرومة اللى تحبيها المقادير لكيلو لحم مفروم هى بصلة كبيرة أو ٢ متوسطين وحباية طماطم نضربهم مع بعض فى الكبة لحد ما يتفرموا ناعم كويس ونحطهم على اللحمة و٥ معالق كبار برغل مغسول كويس وبعدين نصفيه معلقة كبيرة ملح ونصف معلقة كبيرة فلفل اسود والسبع بهارات ومعلقة صغيرة بابريكا ومعلقة صغيرة بيكنج بودر ورشة كركم ومعلقتين كبار دقيق ارز أو دقيق عادى ومعلقة نشا ونعجن ده كله كويس مع بعض بعدين نضربها شوية فى الكبة علشان تبقا متماسكة اكتر بعدين ندخلها التلاجة ربع ساعة ونطلعها نشكلها اى شكل تحبوه وتكون ايدك مدهونة زيت وبعد ما نشكلها تحميرها فى طاسة على النار فيها معلقتين زيت لونها يتغير من جميع الجهات ونطلعها
**ممكن بعد ما تتحمر كدة تشيلها فى الفريزر تتعمل فى اى وقت ♥️
طريقة البسلة بالبطاطس
فى نفس الحاجة اللى حمرنا فيها الكفتة هنحط بصلة مفرومة تتبل وفصين ثوم مفروم نخلى الثوم ياخد لون ذهبى فاتح ونحط معلقة صغيرة بابريكا ورشة كركم وكزبرة مطحونة وفلفل اسود ومعلقة كبيرة صلصلة تدى لون حلو لو موجودة وننزل بالبسلة والجزر يتشوحوا شوية وبعدين ننزل بعصير الطماطم ورشة سكر ونسيبه على النار لحد ما يثقل نضيف البطاطس تغلى ١٠ دقائق وبعد كدة نفضيها فى طاجن و نضيف الكفتة عليها ونضيف كمون وملح ونقلب ومعاهم كوب ماء مغلي وندخلها الفرن على درجة حرارة عالية لمدة نص ساعة تكون استوت وكله دخل مع بعض ونطلعها تتقدم مع الارز اللى تحبوه ♥️
وبالهنا والشفا ♥️

24/02/2026

السمك المقلى بطريقة سهلة وكرسبي جربوه ♥️
الطريقة
اى نوع سمك بتحبوه هنجيبه نغسله كويس وننضف البطن كويس اوى واى زعانف من برة نشيلها بالمقص ولو فى قشرة من برة نشيلها بالمقص أو السكينة ونشيل الرأس بالمقص وبعدين ننقعه فى ماء وليمون وملح ودقيق ربع ساعة وبعد كدة نصفيه منها ونغسله كويس ونسيبه يتصفى لحد ما نعمل التتبيلة
عبارة عن معلقة كبيرة توم مفروم وعصير ليمون وملح وفلفل اسود وكمون وكزبرة ناشفة ومعلقة خل وشطة وبابريكا وكركم ورشة جنزبيل ولو فى هريسة شطة نحطها بدل الشطة ونقلب كل ده مع بعض ونحط فيه السمك يتبل اقل حاجة ساعة وبعد كدة نطلعه من التتبيلة على خليط الدقيق عبارة عن دقيق ومعلقة كبيرة نشا وملح وبابريكا وكركم وفلفل اسود نبطن بيه السمك كويس وبعد كدة ننزله فى طبق فيه ماء مثلج وبعدين نرجعه تانى فى الدقيق وننزله فى زيت ساخن على درجة حرارة متوسطة ياخد لون من تحت نقلبه على الناحية التانية لحد ما كله يبقي لونه ذهبي نطلعه من الزيت على مصفى أو مناديل مطبخ وبس كدة
وبالهنا والشفا ♥️

23/02/2026

كنافة بالفراولة خطيرة جربوها ♥️
اول حاجة هنجيب ربع كيلو كنافة مفرومة ناعم ونحط عليها معلقتين سمنة ومعلقة زيت وندخلها الفرن تتحمر وكل شوية نطلعها نقلب فيها لحد ما كلها تاخد لون ذهبي بعدين نخرجها فى الفرن ونحط عليها ٣ معالق كبار شربات تقيل أو معلقتين عسل نحل ونقلبها ونجيب اى صينية هنعمل فيها نحط فيها الكنافة ونضغطها كويس علشان تبقي متماسكة وندخلها التلاجة

بعد كدة نعمل ٢ باكو جيلى فراولة نذوبه فى ٢ كوب ماء مغلي ونسيبه يبرد على جنب علشان نحتاجه فى الكريمة

الطبقة التانية
كريمة الفراولة
٣ باكو كريم شانتيه عليه كوب ونص لبن ساقع ونضربهم كويس اوى بالمضرب الكهربى لحد ما الكريمة تتماسك نضيف علبة قشطة ونضرب تانى بعدين نضيف نص كمية الجيلى بعد ما برد ونضرب تانى وكدة الكريمة جهزت بعد كدة نضيف عليها قطع فراولة لو موجود وممكن نستغنى عنها وندخلها الفريزر ساعة تتماسك بعدين نخرجها ونضيف الطبقة التالتة
هنحط قطع فراولة وعليها باقي كمية الجيلى اللى سبناه وندخلها التلاجة لحد ما الجيلى يتماسك نخرجها
وبالهنا والشفا ♥️