19/05/2026
السلام عليكم ورحمه الله وبركاته 🌸
كل عام وانتم بخير .خلاص داخلين علي عيد الاضحى المبارك ..ربنا يعيده علينا جميعا بالخير والفرحة علينا وعلي كل بلدنا يا رب 🩷✨
ياللا بينا نتعرف علي اهم قطعيات اللحمة 🥩🍖
هنعرف مكان كل قطعية فين واستخداماتها ايه 🥓🧆
1️⃣ العرق الفلتو : -
اطري قطعة لحم في العجل . خالية تماما من الدهون . بتستوي بسرعة . مش بتاخد وقت علي النار .
مكانها ⬅️ أسفل الظهر من الداخل .
استخداماتها ⬅️ مناسبة لعمل الستيك - البوفتيك - الشوي- طهي سريع علي الجريل - الطواجن - وصفات المطاعم الفاخرة زي البيكاتا بالمشروم.
2️⃣ عرق التربيانكو ( العرق الروستو) : -
قطعة متماسكة ومنظمة شكلها أسطواني . نسيجها خشن وصلب .بتحتاج وقت أطول في التسوية .
مكانه ⬅️ في منطقة الفخد الخلفي للعجل. عبارة عن جزء دائري طويل داخل وش الفخدة
استخداماتها ⬅️ اللحمة الباردة (الروزبيف ) ـ البسطرمة ـ الشرايح الرفيعة
3️⃣ الانتركوت/ الريش/ بيت الكلاوي : -
فيها دهون خفيفة بتعطي طعم رائع خصوصا في الشوي .
مكانها ⬅️ منطقة الضلوع الأمامية والظهر ـ بين الريش والضلوع
استخداماتها ⬅️ الشوي ـ الستيك ـ طهي سريع علي الجريل ـ الشاورما ـ التحمير السريع
4️⃣ الموزة : -
فيها چيلاتين كتير وعصب . بتحتاج تسوية طويلة
مكانها ⬅️ قرب الساق الأمامية والخلفية
استخداماتها ⬅️ السلق ـ الفتة ـ الطواجن ـ الشوربة
5️⃣ وش الفخدة : -
لحمة متماسكة دهونها قليلة جدا . من اطري قطعيات اللحمة .
مكانها ⬅️ الجزء الخارجي من العضلة الداخلية لفخد العجل
استخداماتها ⬅️ البوفتيك ـ المشويات ـ اللحمة الشرائح ـ الروستو ـ الستيك ـ الشاورما
6️⃣ الرقبة ( الدوش) : -
فيها دهون وأنسجة كتيرة . طعمها غني ودسم
مكانها ⬅️ رقبة العجل
استخداماتها ⬅️ الطواجن ـ المفروم ـ التسبيك ـ السلق ـ الطبيخ
7️⃣ السمانة : -
غنية بالچيلاتين والعصب . بتحتاج وقت للتسوية
مكانها ⬅️ الجزء السفلي من رجل العجل قريبة من الساق
استخداماتها ⬅️ السلق ـ الطواجن ـ الطبيخ ـ كباب الحلة ـ الفتة ـ الشوربة
8️⃣ الكولاتة : -
قطعة طرية وناعمة
مكانها ⬅️ الكتف الامامي للعجل. جزء من منطقة الكتف والرقبة
استخداماتها ⬅️ البوفتيك ـ السلق ـ كباب الحلة ـ الطبيخ ـ الطواجن ـ الشاورما
9️⃣ السن : -
قطعة طرية سهلة المضغ .
مكانها ⬅️ بين الظهر والفخدة
استخداماتها ⬅️ طواجن ـ السلق ـ الشوي ـ شرائح ـ طبيخ
🔟 ذيل العجل ( العكاوي )
احلي طاجن عكاوي بالبصل 👌🏻
الحلويات نبقي نتكلم عنها في موضوع تاني 😍❤️
كل عام وانتم بخير 🩷
