Fatma delights - just delicious

Fatma delights - just delicious وصفات متنوعة سهلة وسريعة

اللهم صل وسلم وبارك على الحبيب المصطفى محمد وعلى آله وصحبه اجمعين والتابعين لهم بإحسان إلى يوم الدين 💚
30/04/2026

اللهم صل وسلم وبارك على الحبيب المصطفى محمد وعلى آله وصحبه اجمعين والتابعين لهم بإحسان إلى يوم الدين 💚

اللهم صل وسلم وبارك على سيدنا و مولانا محمد وعلى آله وصحبه عدد علم الله صلاة دائمة بدوام ملك الله 💚
23/04/2026

اللهم صل وسلم وبارك على سيدنا و مولانا محمد وعلى آله وصحبه عدد علم الله صلاة دائمة بدوام ملك الله 💚

السلام عليكم ورحمه الله وبركاته 🌸 عندي ليكوا وصفة اقتصادية طعمها حلو اوي ومش تقليدية .مش كل الناس تعرفها اصلا .🪷🌸البطاطس...
15/04/2026

السلام عليكم ورحمه الله وبركاته 🌸
عندي ليكوا وصفة اقتصادية طعمها حلو اوي ومش تقليدية .مش كل الناس تعرفها اصلا .
🪷🌸البطاطس المكمورة 🌸🪷
واسمها مكمورة لأنها بتستوي علي بخارها بدون إضافة ولا نقطة مية عليها .
المكونات:
بطاطس متقطعة صوابع
بصلة كبيرة مبشورة .
خضرة ( شبت وبقدونس وكسبرة )الكمية حسب الرغبة .
فصين توم مقطعين صغير.
معلقة صلصة ( لمجرد تاخد لون بس ) لو عايزة تزودي براحتك .
ملح وفلفل ورشة بهارات ورشة كمون ( تقدري تضيفي أي نوع توابل حسب الرغبة ).
معلقة سمنة بلدي .
الطريقة
- هنقلب البصل المبشور مع الخضرة والتوابل والصلصة والتوم في الصينية اللي هنعمل فيها البطاطس .
- نضيف البطاطس الصوابع ونقلبهم كلهم في بعض
- نضيف السمنة علي وش الصينية .
- نحط الصينية علي النار من فوق ونغطيها.
- الاول هنعلي النار حوالي عشر دقايق عشان تسخن بس وبعدين نوطي النار خالص كأننا بنعمل رز .
- نسيبها براحتها خالص تستوي علي نار هادية هتقعد حوالي نص ساعة أو ساعة إلا ربع .نختبرها نشوفها استوت بالشوكة لو استوت نطفي عليها علطول .
- لو تحبي تحمري وشها تحت الشواية براحتك .احنا بناكلها كدة علطول 😍

الوصفة دي حلوة اوي بجد واتمني تجربوها ..انا عايزة اقولكوا أنها اصلا وهي بتستوي هتلاقي في البيت بيسألوكي هو انتي عاملة اكل ايه ؟؟ انتي عاملة لحمة ؟ طب انتي عاملة محشي ؟؟؟
محدش هيعرف 🤭👀 بس هما هيبقوا شامين حاجة ريحتها حلوة اوي بس مش عارفين هي ايه 😂
وعملت جنبها سلطة بابا غنوج القمر دي 🍆 😋

ملحوظة :
انا حطيت ملح وفلفل ورشة بهار ورشة كمون ..ومش بحب البهارات الكتير لأنها بتضيع طعم الأكل الاصلي دا غير أن كترها بيمرر الاكل ..لو انتي عايزة تضيفي نوع توابل زيادة طبعا براحتك ممكن تزودي كسبرة أو بابريكا أو نعناع ..المهم ميكونش كتير ..ودي نصيحة ليكوا في أي وصفة اكل ...بلاش نزود البهارات .

اتمني تجربوها وتقولولي رايكوا 🩷
ولو البوست عجبكوا دعوة حلوة كدة بظهر الغيب ولكم المثل إن شاء الله 🩷🩷🩷





السلام عليكم ورحمه الله وبركاته 🌸 زمان كنا بنشوي الرنجة علي عين البوتاجاز وكان الزيت بتاعها ينزل علي العين يطفيها 👀وبعده...
10/04/2026

السلام عليكم ورحمه الله وبركاته 🌸
زمان كنا بنشوي الرنجة علي عين البوتاجاز وكان الزيت بتاعها ينزل علي العين يطفيها 👀
وبعدها نحاول ننضف البوتاجاز الريحة تفضل ماسكة فيه حبة لحد ما تروح 😂
هيييييييح ايام بقي 🥱
وعشان انا بحب في أي وصفة ادور علي ابسط طريقة لعملها .هقولكوا علي ابسط طرق بعمل بيها الرنجة .
🦈🦈🦈
1️⃣ الرنجة المشوية:
بمسك الرنجة افتحها واطلع منها البطروخ والحاجات والمحتاجات التانية .واشيل سلسلة الضهر .
- اقسمها نصين بالطول وارصها في صاج ..لا الصاج مدهون ولا بدهن الرنجة نفسها حاجة خالص .
- ادخلها الفرن تحت الشواية خمس دقايق بس .
- وبس خلاص بقي عندي أنضف رنجة مشوية ولا دخان ولا زفارة ولا بهدلة 👌🏻💯

2️⃣ سلطة الرنجة :
بعملها بطريقتين الأولي بقطعها مكعبات والتانية بفرمها في الكبة تبقي معجون .
- الطريقة الاولي :
الرنجة تكون نية افتحها واخليها من الشوك والجلد وكل حاجة واقطعها مكعبات .
اقطع عليها فلفل رومي وفلفل حراق وبصل وشوية زيت وعصير ليمون مش كتير واقلبهم في بعض
احطهم في طبق التقديم وارش علي الوش شوية طحينة وشوية شبت مفروم .
مكوناتي بسيطة وطعم الرنجة واضح لاني مش حطة مكونات كتيرة تداري علي طعم الرنجة الاصلي .
حاجة كدة في منتهي الشياكة والنضافة خصوصا لو اطفال بتاكل أو عندك عزومة .
- الطريقة التانية :
- بجيب الرنجة النية وبأكد أنها تكون نية مش مشوية ...
برضو بخليها من الجلد والشوك وكل حاجة واحطها في الكبة وأحط عليها كمية طحينة محترمة بقي وزيت وليمون وخل وشوية مية صغيرين وبصل وفلفل وطماطم ونضرب لحد ما تبقي معجون . بنحط مية علي حسب انتي عيزاها قوامها تقيل أو خفيف .انا بحب اخففها شوية .
بنحطها في علبة في التلاجة وعليها شوية زيت ونسحب منها حسب الطلب.
وقت التقديم بنحطها في طبق ونزين الوش بشرايح ليمون .

3️⃣ الرنجة بالصلصة :
من اجمل الطرق واطعمها .كانت امي الله يرحمها بتعملها ببواقي الرنجة المشوية ..الطريقة دي تقدري تعمليها برنجة نية أو مشوية براحتك .لكن بصراحة النية احلي بكتير .
الطريقة :
عندنا الرنجة برضو مخلية ومتقطعة مكعبات .
في حلة علي النار فيها زيت نشوح كام فص توم مقطعين صغير جدا ومعاهم فلفل حراق ..لحد ما ريحتهم تطلع بس .
ننزل عليهم بعصير طماطم متصفية ونقلب لحد ما الطماطم تدخل في التسبيك..مش هنسبكها تسبيك كامل .يا دوب تتقل شوية بس
بعد ما توصل للقوام المظبوط ننزل عليها بالرنجة المتقطعة ورشة فلفل اسود بس ونطفي عليها علطول عشان الرنجة متتهريش .
مفيش ملح نهائي في الوصفة دي .بنكتفي بالملح اللي في الرنجة نفسها .
بتتقدم دافية وبالف هنا 🩷

4️⃣ البطارخ :
البطارخ مش بحب افرمها .بحطها في صينية وتحت الشواية في الفرن وعليها شوية زيت وليمون وبس خلاص .
دي طريقتي في تقديم الرنجة بدون اي افتكاسات ولا تعقيدات .

طيب في شم النسيم وفي العزومات بنقدم ايه جنب الرنجة ؟

🌿بصل اخضر او بصل عادي نقطعه تقطيع كبير وعليه ملح وخل وكمون .
🌿ليمون
🌿طحينة مخففة ...بنخفف الطحينة بشوية مية ونحط عليها نقطتين خل و رشة ملح ونقلبها.
🌿خس بلدي أو كابوتشا
🌿فلفل حراق 🌶️🌶️🌶️
🌿بطاطس محمرة اختياري وطبعا عيش بلدي طازة

نصيحة بلاش خيار جنب الرنجة أو الفسيخ بجد بيبقي طعمه وحش اوي ❌

لو البوست عجبكوا ادعموني بلايك او كومنت بسيط يفرحني 🩷
وكل سنه وانتوا طيبين 🩷🩷🩷





#افتكاساتيلما كنت أنشف الجبنة القريش عشان احطها علي المِش كانت بتقعد مدة طويلة في المصفي علي ما تنزل كل المية .لحد ما ...
07/04/2026


#افتكاساتي

لما كنت أنشف الجبنة القريش عشان احطها علي المِش كانت بتقعد مدة طويلة في المصفي علي ما تنزل كل المية .
لحد ما فكرت في طريقة جربتها وعجبتني جدا ووفرت وقت كبير .
هاتي صينية وافردي عليها قطعة قماش قطنية بيضاء نظيفة 👕 ومش هفسر اكتر من كدة 🙈 🤭
حطي عليها الجبنة القريش بعد ما تتملح بالملح والشطة .
القماشة حرفيا هتشفط المية بسرعة غريبة وفي وقت قياسي 👌🏻
جربي وادعيلي 🩷🩷🩷

السلام عليكم ورحمه الله وبركاته 🌸 ياللا بينا نعمل عجينة البريوش الهشة الغنية 🥐ولأنها عجينة دسمة فالتكنيك بتاع عجنها مختل...
06/04/2026

السلام عليكم ورحمه الله وبركاته 🌸
ياللا بينا نعمل عجينة البريوش الهشة الغنية 🥐
ولأنها عجينة دسمة فالتكنيك بتاع عجنها مختلف عن المعجنات قليلة الدسم زي البيتزا والعيش الفينو.
نبدأ الاول بالمكونات .

مكونات عجينة البريوش 🥐
كيلو دقيق
كوب سكر بودره
كوب زبدة او سمنة لينة
٤ بيضات بدرجة حرارة المطبخ
كوب ونص لبن دافئ
٣ معالق كبار بودرة الكسترد ( اختياري لكن بتفرق جدا )
معلقة كبيرة خميرة جافة أو كيس خميرة
رشة ملح
كيسين فانيليا

مكونات الحشوة 🍯
كسترد تقيل شوية
قرفة + زبدة لينة

لدهن الوجه
صفار بيضة + معلقتين كبار لبن بارد + كيس فانيليا

للتلميع
شربات او عسل نحل مخفف أو مربي مشمش مخففة بشوية مية دافية .

الطريقة 🧑🏻‍🍳
- اول حاجة هنعمل الكسترد عشان يبرد خالص وبعدين نعبيه في كيس حلواني ونركنه علي جنب
- لو هنعمل شربات بتعمله برضو في الاول عشان يبرد .انا كان عندي شربات باقي من رمضان .
- العجينة بقي : هنجيب طبق عميق وننخل الدقيق ونضيف عليه المكونات الجافة .. رشه الملح والسكر والخميرة والكسترد .ونقلبهم في بعض .
- نضيف المكونات السائلة ما عدا الزبدة . يعني البيض واللبن الدافئ .
- هنعجن العجينة كويس جدا جدا لحد ما تلم في أيدينا كويس
- نضيف الزبدة وتكون لينة مش ماسكة طبعا ونعجن تاني كويس جدا جدا لحد ما يبقي معانا عجينة لينة مطاطية عاملة كدة زي اللبانة .وملزقة شوية .دا دليل نجاحها .
- نسيب العجينة تخمر حوالي نص ساعة .أثناء التخمير هنحضر الصاجات هندهنها خفيف بشوية زيت .ونجهز الحشوات .
- التشكيل : طبعا التشكيل دا حسب الذوق وممكن نعملها سادة أو محشية براحتك .حتي لو سادة هي عجينة دسمة وغنية وطعمها جميل فعلا من غير حاجة .
- بعد التشكيل هنسيبها تخمر مرة تانية في الصاجات .
- قبل ما تدخل الفرن علطول بندهن وشها بخليط صفار البيض واللبن والفانيليا...في ناس بتحط علي الخليط ده نسكافيه .جربته ومعجبنيش ...الفانيليا هي اللي بتدي المعجنات ريحة خرافية أثناء الخبز .
- هندخل البريوش بتاعنا فرن حار نوعا ١٩٠° ل ٢٠٠° حسب الفرن .رف أوسط من ربع ساعة ل ٢٠ دقيقة .تكوني متابعة لأن الافران بتختلف .انتي عارفة فرنك حامي واللا هادي .
- اول ما بتطلع من الفرن بندهنها بالشربات .بيديها لمعة وطراوة وريحة حلوة اوي اوي .
- خطوات التشكيل بالشرح تحت الصور
يا رب تجربوها وتقولولي رايكوا 🩷
لو البوست عجبكوا ادعموني بلايك او كومنت بسيط يفرحني وكل سنة وانتوا طيبين 💞💞💞


#البريوش

شم النسيم قرب 🌹💐🌺يعني رنجة وفسيخ وبيض ملون وبريوش وكل عام وانتم بخير بقي 🥳🥳🥳البوست القادم باذن الله هعمل البريوش المحشي...
06/04/2026


شم النسيم قرب 🌹💐🌺
يعني رنجة وفسيخ وبيض ملون وبريوش وكل عام وانتم بخير بقي 🥳🥳🥳
البوست القادم باذن الله هعمل البريوش المحشي بالكسترد والمحشي بالقرفة والزبدة .خطوة بخطوة مع طريقة التشكيل .
انتظروني 🩷🩷🩷

انا الشاطرة اللي خزنت الفراولة وفرزتها وهي ب ٣٠ جنيه قبل ما تغلي 😁الفراولة دلوقتي 👇🏻
03/04/2026

انا الشاطرة اللي خزنت الفراولة وفرزتها وهي ب ٣٠ جنيه قبل ما تغلي 😁
الفراولة دلوقتي 👇🏻

السلام عليكم ورحمه الله وبركاته 🌸 ياللا بينا نعمل صينية القرع العسلي بالبشاميل .هنجيب ثمرة قرع حلوة كدة ونقشرها ونشيل ال...
03/04/2026

السلام عليكم ورحمه الله وبركاته 🌸
ياللا بينا نعمل صينية القرع العسلي بالبشاميل .
هنجيب ثمرة قرع حلوة كدة ونقشرها ونشيل اللب والقلب منها .ونقطعها مكعبات ..
بعد التقطيع هنوزنها .
هنوزنها ليه ؟ عشان هنحط عليها سكر يساوي ربع وزنها .
بمعني : لو القرعة بعد التقطيع طلعت وزنها أربعة كيلو يبقي احنا هنحتاح نضيف عليها كيلو سكر .
القرعاية اللي انا جبتها كانت أربعة كيلو فعمل المقدار بتاعي علي هذا الأساس .
المقادير
٤ كيلو قرع مقطع مكعبات كبيرة
كيلو سكر
نص كوب زبدة او سمنة
١٠ حبات قرنفل صحيح ( مسمار)
الحشو : [زبيب ـ جوز هند ـ مكسرات] حسب الرغبة وممكن الاستغناء عنها تماما .
٣ كوبايات من صوص البشاميل الحلو ( هقول طريقته في الاخر )
حوالي ٣ معالق كبيرة من قشطة اللبن.
فانيليا .
الطريقة
- في حلة كبيرة هنحط القرع والسكر والقرنفل والزبدة ونحطهم علي نار عالية .لأن القرع مع السكر هينزل مية كتير جدا وانا عيزاه بقدر الإمكان يشرب معظم المية دي والباقي هعمل بيه صوص البشاميل الحلو 😉
- هنقلب كل شوية لحد ما يستوي خالص ويبقي طري جدا يسهل هرسه. وهنا بقي براحتك تحبيه مهروس تماما واللا نص نص .براحتك .
- هنصفي القرع من المية الزيادة ونشيل القرنفل ونركنها علي جنب .
- هنجيب صينية مدهونة سمنة ونصب فيها خليط القرع ونساوي السطح.ولو في حشوة طبعا بنحطها في النص .
- هنجيب المية اللي طلعت من القرع وطبعا هي مسكرة جدا فمش هنحط عليها سكر خالص .. .
- هنعايرها نشوف مقدارها قد ايه .علي حسب ما تطلع معاكي كوباية أو اتنين .المهم احنا عايزين ٣ كوبايات سائل ..يبقي يا اما كلهم من مية سلق القرع يا اما نكمل الباقي باللبن .
- المهم أن في الاخر انا عايزة ٣ كوبايات سائل
- هنعمل صوص البشاميل ب ٣ معالق كبيرة زبدة عليهم ٣ معالق كبيرة دقيق ونحمرهم لحد ما ياخدوا لون ذهبي خفيف وننزل عليهم بالسائل بتاعنا ونقلب لحد ما يبقي ليه قوام .
- نطفي عليه ونحط عليه فانيليا
- نغطي القرع بالصوص ونساوي السطح بحيث يغطيه تماما .
- نحط علي الوش قشطة اللبن ونفردها علي السطح كله .
- ندخل الصينية فرن حار الرف الاوسط ربع ساعة.وبعدين نشغل الشواية لحد ما الوش يحمر وبالف هنا 🩷
لو البوست عجبكوا ادعموني بلايك او كومنت بسيط يفرحني 🩷🩷🩷


السلام عليكم ورحمه الله وبركاته 🌸 طمنوني لسة في بسكوت واللا خلص 👀طب لو لسة عندك شوية تعالي نعمل كريم كراميل بالبسكوت 🍮وص...
31/03/2026

السلام عليكم ورحمه الله وبركاته 🌸
طمنوني لسة في بسكوت واللا خلص 👀
طب لو لسة عندك شوية تعالي نعمل كريم كراميل بالبسكوت 🍮
وصفة سهلة وخفيفة ومفيهاش تعقيدات

المكونات
بسكوت 😄مش محتاجة ذكاء يعني 🤭
٢ باكيت كريم كراميل
٤ كوب لبن بارد ( لتر لبن)
حوالي كوباية لبن بارد غير اللي قبلهم
معلقتين قشطة اللبن اختياري

الطريقة 🧑🏻‍🍳
هنجيب صينية بيريكس ونجيب البسكوت .ونغمس كل بسكوته في اللبن البارد لحد ما تكون طبقة بسكوت في قعر الصينية .
اختياري تعملي طبقة واحدة أو طبقتين براحتك . وهنركنهم علي جنب .
في حلة هنحط اللبن البارد ونضيف عليه بودرة الكريم كراميل ونقلب ونحطهم علي النار مع التقليب المستمر لحد ما يبقي ليه قوام .ونرفعه من النار .
في طبق عميق هنجيب شوية بسكوت مطحون ( حوالي ١٠٠ جرام بالتقريب ) وننزل عليهم بالكراميل السخن ومعلقتين القشطة ونقلب .
او ممكن نضربهم بالهاند بليندر عشان يبقي خليط ناعم وكريمي .
هننزل بالخليط علي طبقة البسكوت اللي في الصينية .
نسيبه يبرد تماما في درجة حرارة المطبخ.
لما يبرد ندخله التلاجة لحد ما يتماسك تماما .

ندخل علي فقرة التزيين اللي كلكم عارفين انها المحببة الي قلبي 😘
ممكن نزينه بصوص الكراميل اللي بييجي معاه .
او شوكولاته مبشورة .
او شوية كاكاو خام فوق الوش نرشه بشكل عشوائي
ابدعي 💝
وبس خلاص ☺️

اتمني الوصفة تعجبكوا وتجربوها 💞💞💞




دي فراخ مقلية بالفيجيتار بنسلقها عادي جدا وبعدين نشيل القشرة ونغطيها بدقيق وبيض وفيجيتار .وتتقلي في زيت غزير ساخن لأنها ...
30/03/2026

دي فراخ مقلية بالفيجيتار
بنسلقها عادي جدا وبعدين نشيل القشرة ونغطيها بدقيق وبيض وفيجيتار .وتتقلي في زيت غزير ساخن لأنها مستوية من جوة .يا دوب عايزين نحمر القشرة بس .
انا بحب الفراخ دي اوي اوي
مش بس عشان طعمها جميل .
لكن عشان امي لما كانت تعملها لنا كانت تقول عملالكوا فراخ كنتاكي 😂
كنا نضحك ونقولها كنتاكي ايه بس يا ماما .ايش جاب لجاب .دا لا شكل ولا طعم كنتاكي 😂
بس لما كبرت اكتشفت انها احلي من مليون كنتاكي .
كفاية أنها كانت معمولة من ايدين امي 🥹❤️
ايه اكتر طريقة بتحبي تأكلي بيها الفراخ ؟


Address

Cairo

Website

Alerts

Be the first to know and let us send you an email when Fatma delights - just delicious posts news and promotions. Your email address will not be used for any other purpose, and you can unsubscribe at any time.

Shortcuts

Share

Category