Hadeer Atif هدير عاطف

Hadeer Atif هدير عاطف انا هدير، هشارك معاكم وصفات سهله ومجربه بيتزا، معجنات، حلويات وأكلات متنوعة وهعلمك الطبخ خطوة بخطوة❤️

20/08/2026

احلى وانجح منين بالعجوه هتعمليه دايب وخطير👌❤️
#مخبوزات #مطبخ #وصفات

كيك هيرجعك لذكريات الطفوله👌👭❤️* طريقة عمل كيكة النايتي:🍰☕️ (نايتي الطفولة)* المقادير:- بيضة بحجم كبير ( بدرجة حرارة المط...
19/08/2026

كيك هيرجعك لذكريات الطفوله👌👭❤️
* طريقة عمل كيكة النايتي:🍰☕️
(نايتي الطفولة)
* المقادير:
- بيضة بحجم كبير ( بدرجة حرارة المطبخ )
- كوب الا ربع من السكر
- معلقه صغيره فانيليا سائله
- نصف كوب زيت
- كوب حليب ( بدرجة حراره المطبخ )
- معلقه كبيره خل
- 2 كوب إلا ربع من الدقيق المنخول
- ربع معلقه صغيره ملح
- معلقه كبيره نشا
- معلقه كبيره بيكنج بودر
- معلقه كبيره كاكاو خام
- معلقه كبيره حليب
- ثلث كوب مربى فراوله

* الطريقة:
- فى بولة نضيف البيضه والفانيليا ونقلبهم بعدها نضيف السكر ويفضل انه يكون حبيبات السكر ناعمه ونخفقهم بالمضرب الكهربائى لمدة 5 دقائق لحد م القوام يتضاعف ولونه يكون فاتح نضيف عليهم الحليب والزيت والخل ونرجع نخفقهم مره تانيه ولو السكر مدابش فى اللون فى المرحله دى هيدوب .

- نحضر المكونات الجافه فى بوله نضيف الدقيق بعد م ننخله 3 مرات ونضيف عليه الملح والبيكنج بودر والنشا ونقلبهم المرحله اللى بعدها على طول ننخل الدقيق بالمكونات اللى ضيفناها عليه لرابع مره هننخله على الخليط السائل ونقلبهم بالمضرب اليدوى فى اتجاه واحد لحد م الخليط يبقى ناعم ومفيهوش اى تكتلات.

- فى بوله صغيره ناخد 2 معلقه كبيره من خليط الكيك ونضيف عليها كاكاو خام ومعلقه الحليب وندوبهم مع بعض لحد م يكون خليط الكاكاو نفس قوام خليط الكيك.

- نحضر صينيه مقاس 30 cm نحط فيها ورق زبده وندهنه بمسحه زيت بسيطه ونضع بها الخليط ونوزعه على الصينيه بالتساوي وخليك الكاكاو نضعه فى كيس صغير ونفتحه من تحت فتحه صغيره ونشكل بها فوق خليط الكيك نعمل خطوط عكس بعض بالكاكاو بحيث فى النهايه تكون بشكل مربعات صغيرة.

- هنكون مسخنين الفرن على درجة حراره 180 وندخل الكيك هيقعد من 15 ل 20 دقيقه انا خدت معايا تلت ساعه وبعدها قفلت الفرن وفتحت عليها الشوايه تاخد لون من فوق بس نتابعها وبعدها خرجتها وغطيتها بفوطه لمدة 10 دقائق.

- بعدها نقلبها ونشيل منها ورق الزبده وندهنها بالمربى ونقسمها لنصين بالعرض ونحط النصين على بعض ونقطع الاطراف بالسكينه وطبعا هناكلها احتا وواقفين
بعدها هنقسم الكيك لنصين بالعرض ونقسمها لنصين بالطول وكل نص هنقسمه لنصين.

- وبكده هيكون معاكى أحلى كيك نايتي بنفس طعم زمان جربوها بطريقتى هتطلع معاكم تحفه ولون الكيك فاتح ومسامه ضيقه زى الكيك الاسفنجى .

- وبألف هنا وشفا عليكم حبايب قلبى❤️🥰
#كيك

الطريقه المظبوطه لعمل الزلابيه👌❤️*طريقة عمل الزلابيه:-*المقادير:- 2 كوب دقيق - 2معلقه كبيره لبن بودر - معلقه كبيره بودرة...
18/08/2026

الطريقه المظبوطه لعمل الزلابيه👌❤️
*طريقة عمل الزلابيه:-
*المقادير:
- 2 كوب دقيق
- 2معلقه كبيره لبن بودر
- معلقه كبيره بودرة كاستر
- معلقه صغيره بيكنج بودر
- ربع معلقه صغيره ملح
- 2معلقه كبيره زيت
- كوب وربع ماء دافى ( من كوب ماء لكوبين يضاف بالتدريج )
- معلقه كبيره خميره
- 2 معلقه كبيره سكر
*الشربات:
- 2 كوب سكر
- كوب مياه
- عصرة نصف ليمونه
- معلقه كبيره عسل جلوكوز

* الطريقة:-
- نحضر الشربات علشان لازم يكون بارد فى اناء نضع السكر والماء على نار متوسطه بدون اى تقليب اول م يغلوا نضيف الليمون وعسل الجلوكوز ونهدى النار ونتركه ٧ دقايق ونرفعه من على النار
- نقوم بتحضير الخميره كوب ماء دافى نضيف عليه الخميره والسكر وندوبهم ونتركهم لحد م نتاكد من تفاعل الخميره
- فى بوله العجن نضيف المكونات الجافه الدقيق واللبن البودر وبودرة الكاستر والبيكنج بودر والملح والزيت ونضيف عليهم الخميره بعد تفاعلها ونبدأ نعجنهم ونضيف المياه بابتدريج انا احتجت ان اضيف ربع كوبايه مياه بعد الخميره وده على حسب نوع الدقيق ممكن تحتاجى مياه اكتر او اقل والمياه ضرورى تكون دافيه
- نعجنها لمده 10 ل15 دقيقه لحد م نوصل لقوام سايل مطاطى بدون اى تكتلات نغطيها كويس ونتركها فى مكان دافى من ساعه ل ساعه ونصف
- بعد م عجينة الزلابيه تختمر نخرج منها اى هواء ونضع العجينه فى كيس حلوانى ونفتح الكيس فتحه صغيره من تحت وفى زيت غزير وسخن بدرجه حراره ١٨٠ ننزل قطعه من العجين ونقصها لحد م نملى الزيت بالزلابيه ومنصغرش حجمها عشان تبقى فيها قلب طرى من جوه لازم يكون حجمها كبيره واول م تبدأ تتشكل نستمر فى التقليب لحد م تاخد اللون الدهبى الفاتح منغمقش لونها عشان متنشفش
- اول م تاخد اللون الدهبى الفاتح نخرجها ونصفيها كويس ونضعها بالشربات التقيل البار لمدة دقيقه ونخرجها نصفيها ونقدمها
- وممكن نقدمها مع سكر بودر او مع اى صوص بنحبه
- ودوقى على زلابيه مقرمشه من بره وهشه وطريه من جوه وبالف هنا وشفا عليكم حبايب قلبى❤️
#زلابيه #وصفات #مطبخ

17/08/2026

اكلة الطيبين صنية بطاطس باللحمه اكله فيها روايح زمان.. بعد الطريقه دى هتلغوا كل الطرق اللى شوفتوها👌انتظروا الوصفه❤️
#وصفات #مطبخ

جربى تعملى الكيك الاسفنجى بالطريقه دى بجد هتعتمديه فى كل التورت والقشطوطه هيبقى معاكى خطير❤️🎂🍞*طريقة عمل كيك الاسبونج ال...
16/08/2026

جربى تعملى الكيك الاسفنجى بالطريقه دى بجد هتعتمديه فى كل التورت والقشطوطه هيبقى معاكى خطير❤️🎂🍞
*طريقة عمل كيك الاسبونج البيتى:🍰
*المقادير:
- 2 كوب دقيق ( ونشيل منهم معلقه كبيره )
- كوب سكر ( حبيبات ناعمه )
- ربع كوبايه نشا مليانه(ما يعادل 4معالق كبيره ونص ممسوحه)
- معلقة صغيرة بيكنج بودر
- 5 بيضات بدرجة حرارة الغرفة
- ربع معلقه صغيره فانيليا بودر
- نصف كوب ماء (مش مليان ١٠٠ مللى)
- معلقه كبيره خل
- معلقه كبيره محسن جل
*الطريقة:
- فى بوله نضيف الدقيق والنشا بعد م ننخلهم ونضيف عليهم السكر ويكون حبيباته ناعمه والبيكنج بودر ونقلب المكونات الجافه مع بعضها
- نضيف عليهم البيض والفانيليا والماء والخل والاحسن الجل كله فوق بعض مفيش حاجه قبل حاجه ونبدأ نخفق المكونات دى كلها مع بعضها كويس جدا لمده تصل ل 10 دقائق
- نلاحظ ان القوام بيتضاعف بالتدريج ولونه بيفتح وبيكون شبه الكريمه اول م هنوصل للقوام ده خليط الكيك هيكون جاهز معانا وده بيدل على نجاحه
- نحضر صينيه نغلفها بورق زبده ولو مش بتاع ندهن الصينيه كويس جدا فى بوله نضع معلقه سمنه صغيره ومعلقه زيت ومعلقه دقيق ونقلبهم مع بعض كويس وندهن الصينيه بالخليط ده بوعدك مستحيل الكيكه تلزق معاكى هتخؤج من الصينيه بكل سهوله
- نصب خليط الكيك فى الصينيه مباشره بعد م نخفقها وبعوده الشيش نمشى فى خليط الكيك
- ونكون مسخنين الفرن على درجه حراره 180 ندخلها الفرن بتقعد ساعه بالظبط وبتكون استوت وعلشان تتأكدي من سواها اختبريها من النص لو العوده طلعت نضيفه كده تمام مستويه
- وبجد بوعدك انك هتعملى احلى تورته بأجمل كيك اسفنج هش جدا وهينجح معاكى من اول مره اجمل من الاسبونج الجاهز🍰
- وبالف هنا وشفا عليكم حبايب قلبى 🥰
#تورت #وصفات

15/08/2026

طريقه عمل تورتة عيد ميلادى كامله من اول تحضير الكيك لحد التزيين🍰❤️
#تورته #وصفات

14/08/2026

ألذ واطعم كيك خطيره جربوها👌🍰
*طريقة عمل كيكة الجوزهند:❤️🍞
*المقادير:
- 2كوب دقيق
- كوب الا ربع سكر
- 4 بيضه بدرجة حرارة الغرفه
- ربع كوب زيت + 2معلقه كبيره زيت
- كوب حليب
-2معلقه كبيره جوزهند
- كيس بيكنج بودر
- ربع معلقه صغيره فانيليا بودر
- معلقه كبيره خل
- رشة ملح
- للتزيين جوزهند ومربى

*الطريقة:
- فى الخلاط نضيف الزيت ونضربه لمده ثوانى بعدها نضيف السكر والحليب ونضربهم احد م السكر يدوب تماما
- نضيف البيض والفانيليا والخل ونرجع نضربهم لحد م المكونات كلها تتجانس مع بعضها
- فى بولة نحضر المكونات الجافه ننخل الدقيق ونضيف عليه البيكنج بودر والجوزهند ورشة الملح ونقلبهم مع بعض ونضيف عليهم الخليط السائل بعد م اتخفق تماما فى الخلاط ونخفق المكونات كلها بمضرب كهربائى لحد م الدقيق يختفى وعلشان نتأكد ان مفيش دقيق بالسباتيولا نقلب الخليط من تحت لفوق وهنكون محضرين صينيه مقاس 26مدهونه بخليط من الزيت والسمنه والدقيق ونضع بها الخليط ونخبط الصينيه خبطتين
- احنا وبنجهز الكيك الفرن يكون متشغل على درجه حراره 180 وندخل الصينيه رف أوسط بتقعد ساعه الا تلت ونخرجها نختبرها
- نترك الكيك لحد م يهدأ ونزين وشها بمربى ورشة جوزهند❤️
ملحوظه:
لو مش بتحبى نكهة الجوزهند متضيفهوش جوه الكيك ومتزينهاش وخليها كيك ساده يومى ينفع جنب الشاى بس طبعا هنزود كمية السكر بدل كوب الا ربع نضيف كوب ونصف سكر
- وبالف هنا وشفا عليكم حبايب قلبى❤️
#كيك #وصفات

مستحيل اغير الطريقه دى من جمالها جربوها بجد رهيبه❤️❤️👌طريقة عمل شاورما اللحم:🥩🍔*المقادير:- نصف كيلو لحمة بوفتيك او (من و...
14/08/2026

مستحيل اغير الطريقه دى من جمالها جربوها بجد رهيبه❤️❤️👌
طريقة عمل شاورما اللحم:🥩🍔
*المقادير:
- نصف كيلو لحمة بوفتيك او (من وش الفخده او السمانه او الانتركوت)
- عصرة نصف ليمونه
- ٤ معالق كبيره خل
- ٣معالق كبار زيت
- علبة زبادى صغيره
- مية بصل (حوالى بصلتين نصفى منهم الميه)
- التوابل (نصف معلقه صغيره من (٧ بهارات - بصل بودر - توم بودر - بابريكا - فلفل اسود )
- رشة صغيره من ( الكمون - القرفه )
- معلقه صغيره ملح
- 2بصلة متوسطه متقطعه جوليان
- 2طماطم متوسطه

*الطريقة:
- نقطع اللحمه شرايح رفيعه وطويله نضيف عليها مية البصل والزبادى والتوابل باستثناء الملح هنضيف فى التتبيله نصف معلقه صغيره فقط اثناء التسويه لو احتاجت تانى نضيف باقة معلقه الملح ومع التتبيله نضيف معلقتين كبار من الخل وده مينفعش نستغنى عنه وهنضيفلها الليمون ونقلبهم كويس جدا مع بعض ونغطيها ونتركها فى التلاجه اقل حاجه ٦ ساعات

- وقت التسويه فى طاسه نضيف الزيت وتكون سخنه جدا ننزل باللحمه ونقلبها هتنزل العصاره وهتشربها تانى فى الوقت ده نضيف البصل ونكون مقطعينه جوليان ونقلبها مع البصل اول م تدبل البصله ننزل بالطماطم نكون مقطعينها قطع صغيره ونقلب ده كله كويس مع بعض ونهدى النار ونغطيها ونسيبها تستوى من وقت لتانى نقلبها مش بتاخد وقت وهتكون استوت قبل م نطفى عليها نضيف ليها معلقتين كبار خل هيفرق جدا جدا فى طعمها

- هنقدمها مع صوص طحينه وعيش كيزر وهتعملى احلى ساندوتشات شاورما احلى من اللى بتاكليها بره وانضف بكتير جربيها بالطريقه والمقادير دى بجد تحفه👌🥩🍔❤️🥰
#وصفات

الجو ده مش عاوز غير حلويات بارده❤️طريقة عمل كيكة البسكوت البارده:🍰🍫*المقادير:- لتر حليب- كوب الا ربع من السكر - نصف كوب ...
13/08/2026

الجو ده مش عاوز غير حلويات بارده❤️
طريقة عمل كيكة البسكوت البارده:🍰🍫
*المقادير:
- لتر حليب
- كوب الا ربع من السكر
- نصف كوب نشا الا معلقه كبيره
- 2معلقه كبيره كاستر
- معلقه صغيره من الفانيليا
- نصف كوب كريم شانتيه خام
- بسكوت ( اى نوع انتو حابينه )
- كوب حليب + معلقه صغيره سكر ( لتسقية البسكوت )
(صوص الشيكولاته):د
- شيكولاته 130gm (حوالى كوب معيارى)
- 2معلقه كبيره زيت
- معلقه كبيره زبده
- تلت كوب حليب

*الطريقه:-
- فى البدايه هنحضر طبقه الكريمه أو الكاستر فى حله نضع الحليب والسكر والنشا والكاستر وندوبهم كويس مع بعض بعدها نضع الفانيليا السائله ونقلبهم تانى.

- نرفع الحله ع نار متوسطه مع استمرار التقليب لحد م الخليط يتقل ويبقى قوامه كريمى خفيف تماما نرفعهم من ع النار ونصب الكريمه فى طبق خارجه ونغطي وشها عشان متعملش قشره ونتركها تبرد تماما حتى تصبح بدرجه حراره الغرفه وممكن ندخلها التلاجه عشان تبرد بسرعه.

- بعد م هتكون بردت هنخرجها ونضيف ليها الكريم شانتيه ونخفقهم بمضرب كهربائى لحد م يصبح القوام كريمى وناعم.

- دلوقتى هنحضر صينيه بحجم مناسب لينا ع حسب اذا كنتو بتحبو طبقاتها تبقى كتيره يبقى نستخدم صنيه صغيره أو ممكن نستخدم قوالب صغيره ناكل منها ع طول.

- لو هتستخدموا صينيه كبيره مثلا بحجم 27 هتكون الطبقات اقل.

- هندوب الحليب ومعلقه صغيره من السكر مع بعض وهنسقى فيها البسكوت سريعا م هنسيبها كتير هنزل البسكوت فى الحليب ونخرجه فى وقتها وهنرص اول طبقه فى الصينيه من البسكوت وفوقيها طبقه من الكريمه اللى حضرناها وبعدها طبقه بسكوت وهكذا لحد م نخلص كل الكميه اللى معانا.

- آخر طبقه قبل الصوص هتبقى كريمه نحاول نفرد وشها ع اد م نقدر وندخلها التلاجه من ٦ساعات أو ليله كامله عشان الطبقات تتماسك وتندمج مع بعضها بعد الوقت ده هنحضر صوص الشيكولاته.

- تحضير صوص الشيكولاته نضع قطع الشيكولاته وعليها الزيت ونسخن الحليب مع الزبده ع النار اول م يسخنوا تماما نضعهم فوق الشيكولاته وندوبهم كويس اوى لحد م يبقى صوص شيكولاته خفيف .

- نخرج الصينيه من التلاجه ونضع عليها الصوص ونحرك الصينيه بأيدينا عشان طبقة الصوص تتوزع بالتساوي ع كل الصينيه وندخلها التلاجه 10 دقايق وبعدها نخرجها هنقطعها للتقديم.

- ودوقوا أحلى حلى بارد طعمه خطير وبيدوب ومش هتبطلوا تعملوه لو جربتوه وسهل وسريع مش بيحتاج وقفه كتير فى المطبخ.

- وبألف هنا وشفا عليكم حبايب قلبى❤️
#حلويات #وصفات

13/08/2026

ازاى تكونى بتابعينى ومجربتيش الكوسه بالبشاميل بطريقتى👌❤️
طريقة عمل كوسة بالبشاميل:-❤️😋
*المقادير:
- 2 كيلو كوسه
- معلقه صغيره توم مفروم ( 2 فص توم )
- معلقتين كبيره زيت
- فلفل اسود وملح
- نصف كيلو لحمه مفرومه
- معلقة سمنه صغيره
- بصله كبيرة مفرومه
- معلقه صغيره( فلفل أسود - ملح )
- رشة جوزة الطيب
- 3 معالق كبيره سمنه
- 2 معلقه كبيره زيت
- نصف كوب دقيق(3 معالق كبيره دقيق بشكل هرمى)
- معلقة صغيرة ( فلفل أسود - ملح )
- لتر حليب
- نصف علبة صغيره من الكريمه اللبانى ( اختيارى )
- جبنة موتزاريلا ( اختيارى)

* الطريقة:-
- أول حاجه نبدأ بيها نشوح الكوسه هنجيب الكوسه ونشيل منها الجزء اللى من فوق وتحت ونقشرها نغسلها كويس ونجففها من اى ميه تكون عليها وبعدها ناخد منها جزء بسيط من كل جنب ونقسم الكوسه ل3 قطع أو 2 قطعه على حسب حجمها ويفضل إحنا وبنختار الكوسه نجيب الحجم الوسط

- فى طاسه ننزل بمعلقتين كبار من الزيت ومعلقه صغيره من التوم المفروم اول م نبدأ نشم ريحته نرفعه إحنا محتاجين ناخد نكهته بس بعدها هننزل بشرايح الكوسه على نار عاليه اول ٣٠ثانيه بعدها نهدى النار لمتوسطه ونتبلها بملح وفلفل اسود من كل جنب ونقلب فيها لحد م تاخد لون دهبى من كل جنب نخرجها نصفيها على مصفى من اى دهون زياده.

- تانى خطوه نعصج اللحمه فى طاسه ننزل بمعلقه صغيره سمنه وننزل باللحمه ونقلبها لحد م تاخد لون بسيط نضيف ليها بصله كبيره مفرومه ونقلب والتوابل معلقه صغيره من ( الفلفل الأسود - الملح ) ورشة جوزة الطيب (اللحمه بتستوى على نار متوسطه أقرب للهاديه) نسيبها ٥ دقايق وهتكون استوت.

- تالت وآخر خطوه نحضرها البشاميل فى حلة نضيف 3معالق كبيره سمنه و2 معلقه كبيره زيت اول م يسيحو ننزل ب3 معالق كبيره دقيق ونقلبهم مع بعض على نار متوسطه لغايه م الدقيق نشم ريحته انه اتحمس وخد لون دهبى ننزل بلتر حليب وممكن نستبدل بنصف الكميه حليب والنصف التانى نضيف شوربه هنقلب وننزل عليهم بالكريمه اللبانى ودى اختيارى ممكن تستبدليها بمعلقه كبيره قشطه لو الحليب مش كامل الدسم أو ممكن تضيفى جبنه موتزاريلا وهنضيف التوابل معلقه صغيره ( فلفل اسود - ملح ) نستمر فى التقليب لحد م قوام البشاميل يتقل إحنا محتاجين ان قوامه يبقى وسط لا تقيل ولا خفيف فى الوقت ده نرفعه من على النار.

ملحوظه: سبب ان حضرنا البشاميل آخر حاجه علشان يبقى سهل معانا إحنا وبنحضر وبنوزعه جوه الصينيه.

- نجيب صينيه بايركس حجمها وسط نضع بها طبقه حلوه من البشاميل نرص فوقيها شرايح الكوسه لغايه م نملى الطبقه كلها بالكوسه ننزل عليها بطبقة اللحمة وفوقيها طبقه خفيفه تماما من البشاميل عليها نرص باقى شرايح الكوسه اخر طبقه هتكون باقى كميه البشاميل واختيارى على وش الصينيه نضيف جبنه موتزاريلا ندخلها فرن تحت الشوايه تاخد لون من فوق نطفى الشوايه ونشغل الفرن على درجه حراره 200 هتاخد 10 ل15 دقيقه ونخرجها.

- حلاوتها انها تتقدم وهى سخنه لكن لو عاوزه تستنى عليها تبقى قطعه متماسكه يبقى سيبيها تهدى بس الاكله دى كل ماتبقى سخنه ولسه طالعه من الفرن بتبقى خطيره.

- وبكده هنكون حضرنا ألذ صينية كوسه بالبشاميل ولو مش بتحبى الكوسه هتحبيها بالطريقه دى وبألف هنا وشفا عليكم حبايب قلبى ❤️
#وصفات #مطبخ

Address

سوهاج
Sohag
82749

Website

Alerts

Be the first to know and let us send you an email when Hadeer Atif هدير عاطف posts news and promotions. Your email address will not be used for any other purpose, and you can unsubscribe at any time.

Shortcuts

Share

Category