17/11/2024
ဒီကနေကတော့ တောင်ငူဒေသရဲ့ နာမည်ကြီး စားစရာတခု ကို ပြောပြမယ်နော်..
ဒီဟင်းကတော့ မိုးဦးကျ ရာသီ အသီးအရွက်စုံတဲ့ အချိန်မှာ နေရာအတော်များများမှာ ချက်ဖြစ်ကြတယ်။ အထူးသဖြင့် ကောက်စိုက်ချိန်ပေါ့..
မင်မင့်အဒေါ်တွေကတော့ တခါချက်ရင် အိုးကြီးကြီးနဲ့ ချက်ပြီး အရှေ့၇ အိမ် အနောက် ၇ အိမ် ဝေခြမ်းရတာလည်း တောဓလေ့ပေါ့..
မင်မင်ကတော့ ဒီဟင်းချက်ပြီဆို ထမင်းလွတ် စားတာက ဟင်းရည်သောက်ပန်းကန် ၂ လုံးလောက်က အသာလေးပဲ ...😊😊🤤😋😋
မင်မင် အဲ့လောက်ကြိုက်တဲ့ ဟင်းကတော့
ဒေသအခေါ် ကျည်တောက်ထိုး (သို့) ငရုတ်သီးဟင်း လို့ခေါ်တဲ့ အသီးအရွက်အစုံနဲ့ ချဉ်ရည်ဟင်းလေးပါ.. အဆင်းမလှပေမယ် အချင်းကတော့ ပြည့်စုံတယ်ဗျ
စပါးလင်နံ့မွှေးမွှေး ပင်းစိမ်းနံ့ သင်းသင်းနဲ့ ထမင်းမြိန်ဖွယ်ပေါ့ဗျာ ..
ပါဝင်ပစ္စည်းလေးတွေကတော့ အတော် စုံတယ်ဗျ.. ကျတော်ထည့်ဖြစ်လိုက်တာလေးတွေကိုပြောပြပေးမယ်နော်
၁။ ချဉ်ပေါင်ရွက်
၂။ ဖရုံညွန့်/ရွက်+ပွင့်
၃။ ကန်စွန်းရွက်
၄။ မျှစ်ချဉ်/ပြုတ် (အဆင်ပြေရာ)
၅။ ပဲသီး (မင်မင်က ပဲတောင့်ရှည်မရှိလို့ နွေပဲသီး အနည်းငယ်ထည့်ချက်ပါတယ်)
၆။ ခရမ်းကဆော့ (မပါမဖြစ်ပေါ့)
ခရမ်းသီးလည်းထည့်ပါတယ် မင်မင်ကတော့ ဝယ်ပြီးသားအသင့်မရှိတာနဲ့ မထည့်လိုက်ပါဘူး
၇။ မုန်လာပင် နုနု လေးတွေ (မပါလည်း ရပါတယ်ဗျ မင်မင်က ရှာလို့ရသမျှ ထည့်တာမို့ ထည့်ချက်ထားတာပါ)
၈။ ကင်းမုံညွန့် ( အရွက်ရှားလို့ထည့်တာ စုံအောင်လို့ပါ၊ မပါမဖြစ်မဟုတ်)
၉။ ငှက်ပျောသီးစိမ်း (ပါရင်တော့ အကောင်ဆုံးပေါ့)
၁၀။ ငရုတ်ရွက်
၁၁။ ငရုတ်သီးစိမ်းတောင့်
၁၂။ ကြက်သားဟင်းရွက်လေးလဲ ထည့်ချက်ဖြစ်လိုက်တယ်
၁၃။ စပါးလင်
ဒီအရွက်အသီးတွေကို ရေစင်အောင်ဆေးပြီး ပြုတ်လိုက်ပါတယ်။ ဘာအရသာမှ မထည့်သေးပါဘူးဗျ။
အရွက်အသီးတွေ နူးပြီဆို ငြုပ်ဆုံလေးနဲ့ ထောင်းလိုက်ပါ။ မင်မင်ကတော့ မထောင်းတော့ပဲ ကျိတ်စက်လေးနဲ့ ကြေရုံလေး ချေလိုက်ပါတယ်... မင်မင့်အကြိုက်ကတော့ ထောင်းလိုက်တာက ဟင်းရည်ကို ပိုပြစ်စေပါတယ်ဗျ။
ပြီးရင် အိုးထဲ ထည့်ပြီး ပွက်ပွက်ဆူအောင်တည်ပြီးတော့ ဟင်းရည်ဆူတော့မှ ရေကြိုငါးပိစိမ်းလေးကို ပန်ကန်လေးထဲ ထည့်ပြီး ဟင်ရည်လေးနဲ့ ပေါက်ပေါက်ပြီး အရိုးစစ်ပြီးထည့်ပါ။ မင်မင်ကတော့ ကြိုပြီးသား ငါးပိရည်လေးကို ပဲသုံးလိုက်ပါတယ် (စားဖို့ဖျော်ထားတာ မဟုတ်ဘဲ အလွတ်ကြိုထားတာလေးပါ)။ပြီးတော့ အချိုအရသာလေးကတော့ ကြိုက်နှစ်သက်ရာ အချိုမှုန့် /ကြက်သားမှုန့် ကြိုက်နှစ်သက်ရာ အရသာ ပြည့်အောင်ထည့်ပြီးတော့ တည်ထားလိုက်ပါ။ ဟင်းရည်ကလည်းကျပြီး အရသာ ကြိုက်ပြီ ဆိုရင်တော့
နောက်ဆုံးပါဝင်ပစ္စည်းဖြစ်တဲ့
၁၄။ ပင်စိမ်းရွက်လေး အုပ်ပြီး စားဖို့အသင့်ဖြစ်ပါပြီဗျ..
တွဲဖက်စားဖို့ကတော့ ရေကြိုငါးပိကိုစင်းပြီး ငါးလေးရယ် နနွင်းရွက်လေးနဲ့ ထုပ်ပြီး မီးကင်ထားတဲ့ ငါးပိလေးကို စပါးလင်ရိုး ပါးပါးလှီးပြီး ကြက်သွန်ဖြူ ငရာတ်သီးစိမ်းတို့နဲ့ ထောင်းထားတာလေးက မိုက်တာပေါ့..
မင်မင်ကတော့ ပုစွန်ငါးပိလေးကိုပဲကင်ပြီး စပါးလင်လေးနဲ့ ထောင်းထားပါတယ်ဗျ ..
စကားချပ်..
နနွင်းရွက် နုနု အလိပ်လေးတွေကို ပါးပါးလှီးပြီး အရွက်တွေပြုတ်ကတည်းက ထည့်ပြုတ်ရင်လည်း ရပါတယ်ဗျ မွှေးမွှေးလေးပေါ့..
ကဲ အရသာရှိပြီး မွှေးပျံကြိုင်သင်းတဲ့ တောဟင်းတခွက်ကို ရပါပြီဗျ..
