https://www.facebook.com/102957532861276/

SOVI N BITHU, Auckland (2026)

04/09/2025

සීත සෘතුවේ අවසාන භාගයත් වසන්තයේ ආරම්භයත් අතර ඉන්න නවසීලන්තයේ අපි.. ලස්සන ම ලස්සන මල් පිපෙන මේ කාලේ 😍🌸🌻🌺🪷🍄

04/06/2025

නවසීලන්තය කියන්නේ ම දක්ෂ සිත්තරෙක් ඇන්ද චිත්‍රයක් වගේ❤️🌍🧿

20/05/2025

චූටි චූටි පොද වැස්සක් වැටුනත් ලස්සන ම ලස්සන රෝස මල් වත්තක් බලන්න යමු කියලා අපි දෙන්නා කතා වුනා. නවසීලන්තයේ ඉන්න අයට වැස්ස කියන්නේ තමන් කරන්න ඉන්න වැඩ කල්දාන්න හේතු සාධකයක් නෙවෙයි කියලා මෙහෙට ආව මුල් දවස්වල ම මම තේරුම් ගත්තා. 🙃

ඉතිං අපි දෙන්නා නිවාඩු ඉරිදාවේ මේ රෝස මල් වත්ත බලන්න ගියා. පුදුමාකාර ලස්සන රෝස යායක් අතරේ අතරමං වුනා වගේ ෆීලින් එකක් තමයි මට දැනුනේ. ලා අව් රැල්ලක් එක්ක විඩෙන් විඩෙන්ට වැටෙන පොද වැස්ස අස්සෙන් අපි එදා මේ රෝස වත්ත පුරා ම කරක් ගැහුවා. පාට පාට එක අතට ගන්න බැරි තරමට ලොකු රෝසස්වල සුවඳ ගැන කියන්න වචන නෑ. 🌹

මේ රෝස් ගාඩ්න් එක තියෙන්නේ parnell (පාර්නෙල්) වල. මෙම උද්‍යානය පාර්නෙල් රෝස උද්‍යාන සහ නැන්සි ස්ටීන් උද්‍යාන සඳහා නිවහන කියලා හදුන්වනවා. රෝස පඳුරු 5000 ක් පමණ වැඩෙන බැවින් එය වර්ණ හා සුවඳ උත්සවයක් නොවැම්බර්වල පැවැත්වෙනවා. ඕක්ලන්ඩ් හි පැරණිතම manuka (මනුකා) සහ විශාලතම pohutukawa (පොහුටුකාවා) ගස ඇතුළු කැපී පෙනෙන දේශීය ගස් කිහිපයක් ම බලාගන්නත් පුලුවන්. 🌴

ආයෙත් ලස්සන ම ලස්සන මේ වගේ තැනක් ගැන විස්තර අරන් එනකම් පරිස්සමින් ඉන්න. ආදරෙයි❤️

28/04/2025

හුඟ දවසකින් නිවාඩුවක් ලැබුනාහම කොහේ හරි ඇවිදින්න යන්න තමයි අපි දෙන්නාගේ ම ආසාව. ලස්සන දේවල් තියෙන්නේ විදින්න කියලා කතාවක් තියෙන නිසා මේ අවුරුද්දේ ආව පාස්කු නිවාඩුවේ අවසාන දවසේ කොහේ හරි යමු කියලා කතා වුනා.
ඔන්න ඉතිං ලොකු ගමනක් ලෑස්ති කරන් හිටියත් මෙහෙ කාලගුණේ ඒ දවස් ටිකේ ටිකක් කුණාටුවක් වගේ වුන නිසා අපි "blue spring” බලන්න යමු කියලා කතා වුනා.

Blue spring මම ජීවිතේ දැකපු ලස්සන ම ලස්සන වතුර කිව්වොත් හරි. ඒ තරම් පිරිසිදුයි. මම දාලා තියෙන පොටෝවල ඔයාලත් බලන්න මම කිව්වේ බොරු ද කියලා.

Blue spring කියන්නේ Putaruru (පුටාරුරු) මධ්‍යයේ ඉදන් 9km පමණ දුරකින් ලෙස්ලි මාවතේ අවසානයේ කදුකරයේ සැඟවිලා තියෙන ලස්සන ම ලස්සන ඇළ මාර්ගයක්. නවසීලන්තයේ බෝතල් කළ පානීය ජලයෙන් 70%ක් ම ගන්නේ මෙතනින්. ඔයාලාට ම හිතා ගන්න පුලුවන් නේ ද කොච්චරනම් මේ වතුර පිරිසිදු ඇති ද කියලා.

ඇඟ පිලි පොලා යන සීතල සීත වතුරවලින් මේ ඇළ මාර්ගය හැදිලා තියෙන්නේ. පයිනස් ගස්වලින් වටවුනු ලස්සන මාවතක් දිගේ විනාඩි 30ක් පමණ ඇවිදන් යනවිට මේ ලස්සන මනස්කාන්ත ඇළ මාර්ගය ලගට යන්න පුලුවන්. ඒ අතරින් පතර ඈතින් ඇළ මාර්ගය ගලා බසින ආකාරයක් අපිට බලාගන්න පුලුවන්.

මමකු සානුවේ ජලය blue spring වෙත ළඟා වීමට වසර 50 ත් 100 ත් අතර කාලයක් ගතවේ. උල්පතෙන් ජලය මිනිත්තුවකට 42m³ අනුපාතයකින් ගලා යයි (එමගින් මංතීරු හයක් සහිත මීටර් 25 ක තටාකයක් මිනිත්තු 12 කට වඩා වැඩි කාලයක් තුළ ඵලදායී ලෙස පිරවිය හැකිය). ශීත ඍතුවේ හෝ ගිම්හානයේදී ජලය නියත 11°C වේ. ඉතිං මම කලින් කිව්වා වගේ ඇඟ කිලි පොලා යන කටු අනිනවා වගේ ස්වරූපයක් තමයි මේ වතුරට බැස්සාහ ම ඇඟ දැනෙන්නේ.

ඉතිං හිත ම නිවන මේ ලස්සන ම ලස්සන පරිසරය දැක්කාහම මට ඔයාලා එක්කත් මේක බෙදා ගන්න ඕනි කියලාමයි හිතුනා. ඉතිං ආයෙත් දවසක මේ වගේ ම ලස්සන දෙයක් අරගෙන එනකම් පරිස්සමෙන් ඉන්න. ආදරෙයි❤️

08/04/2025

ලංකාවේ අපේ පැරණිත ම ජන කොට්ඨාසය ආදීවාසීන් වගේ නවසීලන්තයේ පැරණිත ම ජන කොට්ඨාසය විදියට Māori (මාඕරි) ජනතාව හදුන්වන්න පුලුවන්. ඉතිං මම අද ඔයාලට කියන්නේ යන්නේ මාඕරි ජනතාව ගැන. එයාලාට ම ආවේණික දේවල් ගැන තමයි මම අද කතා කරන්නේ.

මාඕරිවරු නවසීලන්තයේ ආදිවාසී පොලිනීසියානු ජනතාව විදියට හදුවන්න පුලුවන්. මාඕරිවරු ආරම්භ වූයේ නැගෙනහිර පොලිනීසියාවේ පදිංචිකරුවන්ගෙන් වන අතර, ඔවුන් දළ වශයෙන් 1320 සහ 1350 අතර කාලය තුළ කැනෝ ගමන් රැළි කිහිපයකින් නවසීලන්තයට පැමිණියේය.

ඉතිං මේ අයට ම විශේෂ වුනු ගොඩක් දේවල් අපිට බලාගන්න පුලුවන්. ලංකාවේ ආදීවාසීන් බලන්න අපි දඹානට යනවා වගේ මෙහෙ මාඕරි අයගේ ජීවන රටාව බලන්න Rotorua mitai maori village (රොටරුවා මිටයි මාඕරි විලේජ්) එකට යන්න පුලුවන්. සාමාන්‍යයෙන් ඒ ප්‍රවේශපත්‍රය ටිකක් මිල අධික වුනත් සංචාරක ආකර්ෂණය නොඅඩුව ඒ ස්ථානයේ දකින්න පුලුවන්.

මේ මාඕරි ජනතාවට ම විශේෂ වුනු දෙයක් තමයි ටැටූ කලාව කියන්නේ, ඉතිං එයාලා මේ ටැටූ කරන්නේ ගැඹුරු සංස්කෘතික පුරුද්දක් විදියට වගේ ම පරම්පරාව, තත්ත්වය හා ජයග්‍රහණය සංකේතවත් කරන්න. එයාලාගේ මේ ටැටූ කලාව කියන්නේ ලොකු විස්තරාත්මක දෙයක්. එයාලා මේ ටැටූ කලාව tāmoko (ටමෝකෝ) කියන්නේ නමින් හදුන්වනවා.

සාම්ප්‍රදායික මාඕරි පච්ච කෙටීම හෙවත් ටමෝකෝ කියන්නේ ගැඹුරු සංකේතාත්මක හා සංස්කෘතික වශයෙන් වැදගත් ක්‍රියාවලියක් වන අතර එහිදී මෝස්තර සමට කැටයම් කරනු ලබන්නේ ඉඳිකටු නොව කැටයම් කළ අස්ථි හෝ ලී වැනි ස්වාභාවික ප්‍රභවයන්ගෙන් සාදන ලද වර්ණක භාවිතා කරයි.

මාඕරි සාම්ප්‍රදායිකව ඔවුන්ගේ ටාමොකෝ තීන්ත සදහා ස්වභාවික අමුද්‍රව්‍ය භාවිතා කළ අතර, ඒ අතරට අව්හෙටෝ දළඹුවාගෙන් ලබාගත් මළපහ සහ අනෙකුත් ද්‍රව්‍යවන කෞරි ගම්, ජලය, මාළු තෙල් හෝ මහෝ සහ පොරෝපොරෝ වැනි ශාක වලින් ලබාගත් ලාටු සමඟ මිශ්‍ර කර ඇත. අඳුරු මුහුණේ පච්ච කොටා ගැනීම සඳහා, ඔවුන් අව්හෙටෝ වෙනුවට තද නිල් මැටි වර්ගයක් වන පුකෙපොටෝ භාවිතා කළහ.

මේ ටමෝකෝවලට විවිධ අර්ථයන් පවා තියෙනවා.
ටමෝකෝ මුහුණේ සහ ශරීරයේ පැළඳ සිටින නමුත් මුහුණේ පච්ච කොටා ගැනීම සඳහා ස්ත්‍රී පුරුෂ භාවය අනුව වෙනස් වෙනවා. පිරිමින්ට මුළු මුහුණේම හෝ මුහුණේ පහළ භාගයේ පමණක් දක්නට ලැබෙන අතර, කාන්තාවන් නිකටේ සහ සමහර විට නිකට සහ තොල් දෙකෙහිම ටමොකෝ අදිනු ලබයි. වර්තමානයේ, කාන්තාවක් තොල්වල ටමෝකෝ පැළඳ සිටී නම්, එයින් අදහස් වන්නේ ඇය මාඕරි භාෂාව චතුර ලෙස කතා කරන්නියක් බවයි.

ඉතිං ඇත්තට ම මේ මාඕරි ජනතාව ගැන එක ලිපියකින් ලියලානම් ඉවර කරන්න අමාරුයි. එයාලාගේ කලාව, කෑම බීම, ඇදුම් පැලදුම් මේ හැමදේම එක ම ලිපියකින් ලියා අවසන් කරන්නේ කොහොමද? ලස්සන ලස්සන දේවල් දඩිබිඩියේ ඉවර කරනවාට වඩා හරි ලස්සනට ගලපලා මම ඔයාලට අරගෙන එන්නම්. අදට එයාලාගේ මේ ටැටූ කලාව ගැන විතරයි මේ ලිපියෙන් අරගෙන ආවේ. ඒකත් සම්පූර්ණ ම ටැටූ කලාව ගැන නෙවෙයි පොඩි අදහස් ඔයාලා එක්ක බෙදාගන්න. අවුරුදු දහස් ගණනක් පැරණි මේ දේවල් පොඩි ලිපියකින් සම්පූර්ණයෙන් ලියා අවසන් කරන්නනම් කිසි ම කෙනෙක්ට අමාරුයි.
අනෙක් ලිපියෙන් මාඕරි ජනතාවගේ කලාව වගේ ම "හකා" නර්තනය ගැනත් අරගෙන එනකම් පරිස්සමින් ඉන්න. ආදරෙයි❤️

04/04/2025

මම අද ඔයාලාට කියන්න යන්නේ මම මෙහෙ ආවට පස්සේ යන්න හිටපු ලස්සන තැනක් ගැන. මේක මම විතරක් නෙවෙයි ඔයාලා හැමෝම දන්න ලස්සන ම ලස්සන කන්දක්. මම මෙහෙම කියන්නම්කෝ...🦋

ඔයාලාට මතක ද පොඩි කාලේ ටීවි එකේ බලපු ඇන්කර් කිරිපිටි ඇඩ් එක, තව ඇන්කර් කිරි පෙට්ටියේ තිබුන ලස්සන කන්ද එහෙම. මතක් කරලා බලන්න. ඒ කන්ද තමයි මේ මම පොටෝවල දාලා තියෙන්නේ. නවසීලන්තයේ තියෙන මේ කන්දේ නම
තමයි"Mount Taranaki" ( මවුන්ට් ටරනාකි)

නවසීලන්තයේ උතුරු දූපතේ බටහිර වෙරළ තීරයේ තාරනාකි කලාපයේ තියෙන නිද්‍රාශීලී ගිනි කන්දක් වන ටරානාකි කන්ද, මීටර් 2,518 ක උසකින් යුක්ත වන අතර, එය රුපෙහු කන්දෙන් පසු උතුරු දූපතේ දෙවන උසම කන්ද. දකුණු පැත්තේ මීටර් 1,966 ක උසකින් යුත් ද්විතියික කේතුවක් වන ෆැන්තම්ස් කඳු මුදුනකින් සමන්විතයි.🍄‍🟫

එදා අපි ගිය දවසේනම් කන්ද මීදුමෙන් වැහිලා. මේ කන්ද හැමවෙලේ ම වගේ වලාකුලෙන්, මීදුමෙන් වැහෙනවා. හරි ම ලස්සන හීතල පරිසරයක තියෙන ලස්සන ම ලස්සන කන්දක්. මේ පලවෙනි පොටෝ එක මම ගන්නේ නෙට් එකෙන්. මොකද මෙච්චර පැහැදිලිව මම ගිය දවසේ මට බලන්න බැරි වුනා. හැබැයි අනිත් පොටෝස්නම් මම ගත්තුවා..
ඇඟ ම කිලිපොළා යන සීතලක් තමයි මේ වටපිටාවේ ම තියෙන්නේ. ❄️❄️

ලස්සන ලස්සන ගව පට්ටි, පුංචි ගම්මාන, බැටලු රැලවල් මේ ටරනාකි කන්ද පාමුල අපිට බලගන්න පුලුවන්. පුංචි ගොවි ගෙදරක නතර වෙලා උදේ ම හරි ලස්සන ට මේ ටරනාකි කන්ද බලාගන්න පුලුවන්. උණු ම උණු කොකෝවා කෝප්පයක රස බලන ගමන් බැටලු ගොවිලක ලස්සන ලී ගෙදර ජනෙල් කවුලුවකින් මේ කන්ද දිහා බලන් ඉන්න එක කොච්චර ආශ්වාදජනක ද කියනවානම් ලෝකේ ම එක මිලි තත්පරයකට අමතක කරන්න පුලුවන් ලස්සනක් තියෙනවා. ඉතිං ආයෙමත් දවසක ඒ ලස්සන මාත් එක්ක ඔයාලත් විදිමු.😍🐏🐄

ජීවිතේ තියෙන්නේ විදින්න මිසක් විදන්න නෙවෙයි කියලා මේ ස්භාදමේ ලස්සන දකින වාරයක් ගානේ මගෙ හිත මට කියනවා. ආයෙමත් ලස්සන ම ලස්සන තැනක් ඔයාලාට අරගෙන එනකම් පරිස්සමෙන් ඉන්න. ආදරෙයි❤️

30/03/2025

ගිම්හාන සෘතුවේ අවසානයත් සරත් සෘතුවේ ආරම්භයත් පිලිගන්න මේ දවස්වල නවසීලන්තයේ ඉන්න අපි ලක ලෑස්ති වෙනවා. ලස්සන ම ලස්සන දුඹුරට හැරුනු කොළ පුරවාගෙන සරත් සෘතුවේ අවසානයේ දී සීත සෘතුවේ විවේකයට ලෑස්ති වෙන ඕක් ගස් යායවල් හරි ම ලස්සනට මේ දවස්වල අපිට බලාගන්න පුලුවන්. 🍂

යුරෝපයේ රටවල් වසන්තයට ලෑස්ති වෙනකොට කැන්ගරු දේශයත්, මාඕරි රාජ්‍යයේ අපිත් ගිම්හානයේ ලස්සන බලමින් සීත සෘතුවට පෙරමන් තනනවා.🌾

සෘතු හතර ම තියෙන ලස්සන රටක මෙහෙම ජීවත් වෙන එකත් හරි වෙනස් කලාවක් වගේ දැනෙනවා. කාලෙන් කාලට ඇදුම් ආයිත්තම් පවා වෙනස් කරගෙන සෘතුවලට හැඩ ගැහෙන්න බලාගෙන ඉන්නවා. අස්සකට මුල්ලකට වෙලා ඔහේ තිබුන ගිනි උදුන් එහෙම අස් කරලා, සීත කබා එලියට අරගෙන අරගෙන හැමෝම කඩි ගුලක් වගේ සීත සෘතුවට සරත් සමයේ ලෑස්ති වෙනවා. ඒකත් හරි ලස්සන දෙයක්.. කලින්ට වඩා ඇගේ හිරි පිපෙන සීතල, මීදුම් බාන හවස් කාලය හරි ලස්සන හැගීම් උපදවන පරිසරයක් මේ කාලයේ අපේ හිත් වසඟ කරනවා.🤍

ඉතිං ආදරණීය සරත් සෘතුව සීත කාලය අත ලඟ කියලා කාර්‍යබහුල අපට මතක් කරනවාට බොහෝම ස්තූතියි.. ඉතිං ලස්සන ම ලස්සන සීත කාලයක් මගෙත් එක්ක විදගන්න ඔයාලාත් ඉස්සරහට ලෑස්ති වෙන්න. එතකල් හැමෝම පරිස්සමින් ඉන්න. ආදරෙයි❤️

28/03/2025

නවසීලන්තය කියන්නේ හරි ම ලස්සන රටක්. ඉතිං මෙහෙ එන්න කලින්නම් මම ඒක එච්චර දැනගෙන හිටියේ නෑ.. ඒත් මෙහෙ තියෙන ලස්සන තැන් බලන්න ගියහම මට ඒක තේරුනා. 😍

මේත් ඉතිං ලස්සන ම ලස්සන ඉරිදාවක අපි දෙන්න ගියා මෙහෙ තියෙන ලස්සන මුහුදු වෙරලක් බලන්න. මේ වෙරළ ලංකාවේ අපේ තියෙන මුහුදු වෙරලට වඩා ගොඩක් වෙනස්. එහෙම කියන්න හේතුව තමයි මේ බීච් එකේ තියෙන වැල්ල කලු පාටයි. සුදු වැලි තලාවක් වෙනුවට කලු වැලි තලාවක් තමයි අපිට බලන්න පුලුවන් වෙන්නේ. මේ තමයි "පිහා බීච්"(Piha beach) සුදුපාට පෙණ කැටි විසිරිලා කලු වැල්ලේ රැදෙනකොට අපි වෙනදා දකින මුහුදේ ලස්සනට වඩා වෙනස් ලස්සනක් මවන්න මේ ස්භාදම් මාතාව සමත් වෙලා කියලා මට හිතුනා. ලස්සන ම ලස්සන කදු ගැටයකුත් මේ වෙරළ අසබඩ තියෙනවා.

පිහා කියන්නේ නවසීලන්තයේ උතුරු දූපතේ ඕක්ලන්ඩ් නගරයට බටහිරින් පිහිටි වෙරළබඩ ගම්මානයක්. කළු වැලි සහිත පිහා වෙරළ එහි ශක්තිමත් රළ පහර සහ රළු දර්ශන සඳහා ප්‍රසිද්ධයි. "ලයන් රොක්" යන යුද ස්මාරක සහ මාඕරි කැටයම් සහිත ගිනිකඳු ඒකලිතයක්.🌊🫧

පුංචි කාලේ කියවපු පොත්වල තියෙන ලස්සන බලන්න මේ මුහුදු වෙරළට ආවහ ම පුලුවන් වුනා. මගෙ ගෙදර ඉදන් පැයක වගේ වෙලාවක් යද්දී මෙතනට එන්න පුලුවන්. ඒ ගිය වෙලාවේ ඉතිං පුංචි යාලුවෙකුත් හම්බෙලා පොටෝ එකකුත් ගන්න අමතක කරේ නෑ මං. ගොඩක් අයගේ ආකර්ෂණය දිනා ගත්ත නවසීලන්තයේ තියෙන ලස්සන තැනක් විදියට මේ පිහා බීච් එක හදුන්වන්න පුලුවන්. 🌊💧

ඉතිං ආයෙත් මේ ලස්සන රටේ තියෙන ලස්සන දෙයක් ඔයාලත් එක්ක බෙදාගන්න අරගෙන එනකම් හැමෝම පරිස්සමෙන් ඉන්න. ආදරෙයි❤️

25/03/2025

ඉරිදාවක උදේ ම මම යන්න ආසාවෙන් ම හිටිය තැනක් බලන්න යන් කියලා අපි දෙන්නා කතා වුනා.. අපේ ගෙදර ඉදන් විනාඩි 20ක වගේ දුරක් තමයි එතනට තියෙන්නේ.. වින්ටේජ් කියන්නේ ම මම ආස ම විදියක්. චූටි කාලේ කියවපු කතාපොත්වල ඇත්තට ම ජීවත් වෙන්න හීන දැක්ක මට මෙහෙ ආවහම ඒ දේවල් හැබැහින් දකින්න වාසනාව උදා වුනා.. මේ තමයි howick historical village එක. අවුරුදු ගානකට කලින් මෙහෙ තිබුන ගෙවල්, කම්හල්, පාසල්, පාවිච්චි කරපු දේවල් ඔක්කෝම එකතු කරලා ලස්සන ගම්මානයක් මේ විදියට නිර්මාණය කරලා තියෙනවා.. 🌷🌾
ලස්සන චූටි විලක් මැද්දේ මේ ගම මාර ම ලස්සනට හදලා තියෙනවා. ඒ කාලේ තිබුන ලස්සන මාලිගා වගේ ගෙවල් ඇතුලේ එයාලා පාවිච්චි කරපු ලස්සන ලස්සන මල් වැටුන පිඟන් භාණ්ඩ, ලස්සන ඇද ඇතිරිලි අතුරපු ඇඳන් වගේ සීත කාලේට පාවිච්චි කරපු ගිනි උදුන් එහෙමත් තාමත් හරි ලස්සනට තියෙනවා.. ❄️❄️
ඒ කාලේ එයාලා කෑමට භාවිත කරපු අච්චාරු වගේ.. ටින් කරන ලද මස්, මාලු කුස්සිවල පැන්ටි උඩ තාමත් හරි ලස්සනට අතුරලා තියෙනවා.🥦🌽🍗
මේ ගමේ පාසලේ ඩෙස් බංකු පවා 1920 දශකයේ භාවිත කල ඒවා. හරි ලස්සනට ඒ හැමදේම තාමත් තියෙනවා.. 🪵🪵
මෙහෙ අතීත ජීවිතය ගැන ලස්සන අදහසක් ගන්න යන්න ඕනි ම තැනක් තමයි මේ howick
Historical village එක. 💼
මෙහෙ තියෙන තව ලස්සන තැන් ගොඩක් මම ඔයාලාට ආයෙ අරගෙන එන්නම්. එතකල් හැමෝම පරිස්සමින් ඉන්න. ආදරෙයි❤️

SOVI N BITHU

04/09/2025

04/06/2025

20/05/2025

28/04/2025

08/04/2025

04/04/2025

30/03/2025

28/03/2025

25/03/2025

Address

Website

Alerts

Shortcuts

Share