18/07/2025
روٹی گل وچ پھا پاندی اے
روٹی نُکرے چا لاندی اے
بندے روٹی کی کھانی اے
روٹی بندہ کھا جاندی اے
روٹی ھے دلدار تُوں اگے
روٹی دا دُکھ پیار تُوں اگے
اگ شِکم دی رشتے ساڑے
روٹی ہر اک یار تُوں اگے
جد وی سامنے آوے روٹی
اپنا ، غیر بناوے روٹی
شادیاں اندر___وچ ولیمے
کی کی رنگ وکھاوے روٹی
روٹی یارو کھوٹ نو ویچے
روٹی نقلی__نوٹ نو ویچے
جد وی موسم ووٹ دا آوے
روٹی ہر اک ووٹ نو ویچے
تگڑے یا معزور دی روٹی
حاکم یا مجبُور دی روٹی
کدی وی پُوری ہوندی نئیں
عاجر اس مزدُور دی روٹی