Chef Fi El Ghorba - Jeddah شيف في الغربة - جدة

10/04/2026

طريقة عمل الارز بلبن 😉


#حلويات

#مطبخ
#وصفات

#جدة

10/04/2026

10/04/2026

طريقة عمل الترمس 😋

#ترمس

#مطبخ
#وصفات

#جدة

05/04/2026

✨ بسبوسة سهلة وطعمها حكاية 😋
لو أول مرة تعمل بسبوسة… الوصفة دي هتنجح معاك من أول مرة 💯

📌 المكونات:
• 2 كوب سميد
• ½ كوب سكر
• 2 ملعقة كبيرة جوز هند
• 2 ملعقة صغيرة بيكنج بودر
• 100 جرام زبدة
• 2 ملعقة كبيرة عسل نحل
• ¾ كوب حليب دافئ
• مكسرات حسب الرغبة

📌 ملحوظة مهمة:
نفس الكوباية المستخدمة للسميد هي نفسها للسُكر والحليب 👌

⸻

👨‍🍳 طريقة التحضير:
1. في بولة، نخلط السميد + السكر + جوز الهند + البيكنج بودر كويس أوي.
2. نسيّح الزبدة على نار هادية، ولما تسيح نضيف عليها العسل ونقلبهم كويس (من غير ما نسيبها تبرد، بس تهدى شوية).
3. نضيف خليط الزبدة على السميد ونقلب لحد ما يتجانس.
4. نسخّن الحليب (دافئ بس مش سخن أوي)، ونضيفه للخليط بدون تقليب كتير.
5. نجهّز الصينية وندهنها زبدة كويس (حتى الأطراف).
6. ننزل بالخليط في الصينية، ونخبطها خبطتين تلاتة على الرخامة عشان تتساوى.
7. ممكن نقسمها بالسكينة مربعات قبل ما تدخل الفرن، أو نسيبها زي ما هي حسب الرغبة.
8. نحط المكسرات على الوش مع ضغطة خفيفة عشان تثبت.

⸻

🔥 طريقة التسوية:
• فرن على درجة حرارة 200 لمدة 25 دقيقة
• ممكن تتحمر من فوق في الفرن نفسه لو حرارته كويسة
• ولو محتاجة تحمير زيادة، تدخل تحت الشواية

📌 نصيحة: بعد 15 دقيقة نبص عليها ونتأكد إن كل حاجة تمام

⸻

🍯 الشربات:
• 2 كوب سكر
• 2 كوب ماء
• ربع ليمونة

👉 يتحطوا على النار من 10 لـ 15 دقيقة

📌 ملحوظة مهمة جدًا:
البسبوسة من الحلويات اللي لازم الشربات والبسبوسة يكونوا سخنين وإحنا بنضيف الشربات

⸻

✨ التقديم:
أول ما تطلع البسبوسة، نحط عليها الشربات واحدة واحدة
ونسيبها تشربه كويس

وبالهنا والشفا ❤️

أكل بيتي بطعم الغربة 💛 | شيف في الغربة

#بسبوسة
#حلويات

#مطبخ
#وصفات

#جدة

04/04/2026

أحلي تورتة عيد ميلاد 🎂 🎈 🎁❤️

04/04/2026

✨ أهلاً وسهلاً بيكم في صفحة شيف في الغربة - جدة ✨

هنا هتلاقوا وصفات شهية، نصايح طبخ، وفيديوهات هتخليكم تحبوا المطبخ أكتر 😋🍴
متنسوش تتابعونا عشان كل جديد يوصللكم أول بأول 💛

⸻—————————————————————————

✨ نبذة عن الصفحة

أنا شخص عادي جدًا، عمري ما كنت بعرف أطبخ ولا حتى فكرت في الموضوع قبل كده…
كل اللي كنت بعمله شوية حاجات بسيطة اتعلمتها من ماما.

لكن لما سافرت وبدأت رحلة الغربة، خصوصًا في فترة كورونا،
ملقتش عندي غير اختيارين…
يا أتعلم حاجة جديدة، يا أنكد على مراتي 😅
فقررت أشتري راحتي وأريح دماغي… وأتعلم الطبخ 🤣🤣

بدأت أتفرج على فيديوهات، وأجرب بنفسي… وزوجتي كانت دايمًا بتدعمني وتساعدني بنصايحها ❤️

مع الوقت، بقيت أصور كل تجربة بعملها، وركزت على أهم حاجة عندي:
“العين 👀 بتاكل قبل الفم”

علشان كده بحب أقدم الأكل بشكل بسيط، لكن يفتح النفس.

أنا بستمتع جدًا وأنا بطبخ، والأحلى لما أصحابي وأهلي يشاركوا معايا اللحظة ويأكلوا من إيدي…
وسعادتي بتكمل لما أشوف استمتاعهم بالأكل ❤️

وبحاول دايمًا إن الأكل يكون سبب يخليهم ميحسوش بالغربة…
لأن دي أكتر حاجة بتتعب أي مغترب.

خصوصًا إن كتير مننا بيبقى معتمد على الأكل الجاهز،
أو على حاجات بسيطة زي البيض والجبنة…

وأنا نفسي عِشت الإحساس ده في بداية غربتي،
وكنت بتمنى حد يعزمني عنده في البيت بس علشان أستمتع بأكل أهلنا،
أو بأي أكلة مصرية كنت مفتقدها.

وكمان لما بروح أي مطعم، بلاقي نفسي بركز في تفاصيل صغيرة جدًا…
يمكن ناس كتير تعديها، لكن بالنسبة ليا الفرق دايمًا بيكون في التفاصيل 👌

علشان كده بحب أشارك رأيي وتجربتي،
وبحاول أقدم طعم الأكل المصري الأصيل، زي أكل أهلنا…

علشان نخفف إحساس الغربة،
ونرجّع لكل واحد فينا إحساس البيت اللي مفتقده ❤️

⸻—————————————————————————

✨ الصفحة دي لكل حد مغترب، أو مبتدئ، أو حتى بيحب الأكل وعايز يجرب حاجة جديدة.