Fiora

23/10/2024

صباح الورد و إزيكم كلكم واحد واحد ♥️
طولت من النشر لكن جيتكم الليلة بمناسبة ذكرى تأسيس Fiora ♥️✨

شكراً لكل الناس الكانو بيرسلو لي يسألو عني والكانو بيقولو لي إرجعي أنشري إشتقنا لبوستاتك ♥️♥️ وللبيرسلو يسألوني ليه ما بترسمي ؟! ..والله انا شغالة وبرسم بس فعلاً انشغلت من النشر وتصوير الأعمال نسبة لأسباب كتيرة..
لكن حرجع قريب بإذن الله ✨

الليلة ذكرى لي يوم سعيد فيه قدرت أبدا فكرة كانت قبلها وقت طويل على بالي وهي إني أسس صفحة لأعمالي الفنية ♥️♥️✨

صفحة من خلالها أقدر أعبر عن نفسي وعن أفكاري وأقدر أوصل صوتي✨
بالنسبة لي الفن عمره ما كان مجرد هواية بالعكس كان ومازال جزء مني ومن وجودي و شكل من أشكال تعبيري عن نفسي..و رحلتي مع الرسم بعتبرها شهادة على الإصرار والعزيمة والارادة لأني كفنانة في مجتمع بتطغى فيهو مقاييس النجاح التقليدية على الرغبات الإبداعية من بدري واجهت تحديات كتيرة في التمسك بحلمي إني أواصل ارسم لحدي ما قدرت أسس الصفحة وأصل لمستوى ألقى شغلي واصل كل مكان بس ابداً سمحت للتحديات ولا العقبات توقف في طريقي
في بداياتي أغلب الحولي كانو بيصرو إني أخلي الرسم وأشوف وظيفة تقليدية. لكن كل الإنتقاد وكل محاولاتهم ما خلتني ولا للحظة أفكر : "هل حبي للرسم بيستحق كل النضال دا ؟" بالعكس كنت ما بسمع أي شخص يحاول يحدد لي (أنا منو) و(مفروض أعمل شنو )♥️ ودايماً كان عزائي في إني وانا بعمل الحاجة البحبها لاقية نفسي لأنه دي هويتي ! ومع الواني، بكون قادرة أوجه أفكاري وعواطفي و أسمع نفسي . لأنه الفن ما بس مجرد القيمة الجمالية لا هو كمان بيربط الفنان على مستوى عميق مع جوهره وباطنه.♥️
الحمدلله رب العالمين حاجات كتيرة قدرت أحققها من خلال الرسم- لو أهداف شخصية لنفسي أو أهداف مجتمعية ورسائل كنت بحاول أوصلها للناس عبر لوحاتي - ولسه برضو بعتبر نفسي في بداية الطريق وفي حاجات وأحلام وأهداف كتيرة في طريقي إني أحققها بإذن الله✨
أكيد بتمر علي أوقات بتوقف شوية بس برجع بحماس أكبر من اول ودائماً بذكر نفسي انو رحلة الإبداع ما رحله خطية، ممكن يكون في لحظات نتوقف فيها أو نتباطأ فيها أو تحصل أي عراقيل خارجة عن إرادتنا . لكن كل تجاربنا في الحياة هي جزء ما بيتجزأ من نمونا وكل تحدي هو فرصة لي تعميق فهمنا لي نفسنا وللحياة.
اكتر فترة غريبة هي من ٢٠٢٣ وللآن حصلت احداث كتيرة بالإضافة لناس ماقريبين لي بيحاولو يوقفوني ويضروني !! بس دايماً بقول " رفعت لله قنديلي فأوقده ، فهل تظن يداً في الأرض تطفئه !!! "... حأستمر و "حأعيش " وحرسم وحبدع رغم أنف أي ناس حاولت توقفني .

✨✨✨..

حالياً بعد ٥ سنوات من تأسيس Fiora البيهمني إني سعيدة لأني قدرت ألهِم كتيرين سواء من خلال الصفحة أو من وراء الكواليس وفي الحياة اليومية عشان يبدو هم كمان أعمالهم وعشان يستمرو في متابعة شغفهم، بغض النظر عن توقعات المجتمع وبغض النظر عن اي شي ممكن يعترض طموحهم ورغباتهم ويذكروا نفسهم دايماً انو "الفن رسالة".

اخر حاجة رسالتي لي أي فنان و أي شخص " إنت عندك رسالة افتخر بي دورك في الحياة وعيش حلمك كامل"
و
Don't let anyone tell you who you are
YOU KNOW WHO YOU ARE

والحمدلله أولاً وآخراً ودائماً وأبداً لأنه معاي في كل خطوة ♥️♥️♥️
......
عني انا وفني :

إيمان هشام محيي الدين
فنانة تشكيلية
مؤسسة منصة -Fiora- للفنون التشكيلية.
ولدت في الخرطوم عام 1994. تخرجت من جامعة "الزعيم الازهري - AAU" ، كلية التخطيط الحضري قسم التخطيط العمراني "Urban Planning " عام 2015.
عملت في مجال الفن التشكيلي
نفذت:
1- معرض مستقل ( Original - 2014 ).
2- معرض مستقل (Mama Africa - 2015).
3- معرض مستقل ( Intorno al mondo مركز CIC مركز اللغة الإيطالية كلية كمبوني – 2018).
4- شاركت في معرض Afrabia - مجلس الشباب العربي والإفريقي 2016،
5- شاركت في مهرجان الفنون التشكيلية النادي الألماني السوداني 2018.
6- أسست Fiora "منصة متخصصة في دمج الفن بالزراعة وتعزيز الثقافة والتراث السوداني، بالإضافة إلى مناقشة قضايا المجتمع المحلي من خلال الفن 2019.
7- أسست مبادرة (Go Greeny) لتشجيع الزراعة المنزلية 2019.
8- أسست مبادرة لتشجيع العاملين في مجال الرعاية الصحية في السودان خلال جائحة كورونا (ادعم طبيب).
9- أسست مجموعة فنية بعنوان (مَلامِح سُودانية ) لدعم التعايش السلمي وإبراز الثقافة السودانية 2021.
10- شاركت في لجنة الإختيار كعضو لجنة التحكيم كـ (فنانة تشكيلية) - لبرنامج (مساحات جديدة _ صندوق الإنتاج) الذي ينفذه معهد جوته وتموله وزارة الخارجية الألمانية الاتحادية 2021.
11-عملت على تفعيل التعاون بين الرجل والمرأة في الأسرة من خلال مجموعة أعمال فنية (دُكانْ البُهارات ) 2021م.
12- قامت بحملة توعوية من خلال مجموعة فنية للتوعية بسرطان الثدي (Fiora Rosa) 2021.
13-أسست مجموعة لتمكين المرأة السودانية (تَحيي تَعِيشي لا مَقْهورَة لا مَنْهورَة ) 2022.
14. أقامت معرض إحياءً لذكرى الكاتب والممثل و المخرج الايطالي Vittorio Gassman بطلب من السفارة الإيطالية بالسودان 2022.....
Fiora:
هو مشروع فني يعمل على إدخال الفن إلى مختلف طبقات المجتمع بطرق سهلة وبسيطة.
تركز *Fiora* على تقنيات الفنون البصرية وقوة الفن في مناقشة القضايا وإحداث التغيير المرغوب في المجتمع.
كما يهدف إلى تعزيز ثقافة الزراعة لتشجيع الأجيال الشابة على الاهتمام بالبيئة والتخفيف من آثار التغير المناخي؛ من خلال دمج الأعمال الفنية مع القطع الفخارية وزراعتها بأنواع مختلفة من الأشجار.
تسعى المنصة إلى مناقشة كافة القضايا المحلية والعالمية وتقديمها في شكل فني يلامس ضمير المجتمع.

05/01/2024

مجموعة الكتب المفضلة لي واللقيتها بعد تعب والخليتها في السودان 😢😢😢 وطقم الدرويش البحبه والخليتو في السودان برضو مع كل لوحاتي الكتيره الهناك 😔😔

عن المثنوي وكاتبه:
جلال الدين الرومي وهو شاعرٌ فارسيٌ صوفي تركت أشعاره ومؤلفاته الصوفية والتي كُتبت أغلبها باللغة الفارسية وبعضها بالعربية والتركية تأثيراً واسعاً في العالم حيثُ ترجمت بعض أعماله إلى كثير من لغات العالم ولَقِيَت صدىً واسعاً جداً.
💛💛
كتب جلال الدين الرومي المثنوي وهو ديوان ضخم مُكوَن من سلسلة من ستة كتب تحتوي على شعر روحي فلسفي ومترجمة عن الفارسية في ما يقرب من ثلاثين ألف بيت من الشعر الراقى، أفنى فيها المؤلف عمره كله وقدم من خلال عمله عالمه الخاص، ولأنه لم يكن إنساناً عادياً فكان ما كتبه غير عادي أيضاً،و ستجد فيه الإلهام البشري المقدس في أسمى صوَرِه.حيث يقدم أفكارًا جديده، وإلمامات لكل ما يصادف الإنسان من مشاكل فى تعامله مع نفسه ومع المجتمع، وفى سعيه الحثيث نحو التسامي فوق صراع الحياه.
💛💛
كل جزء من الأجزاء الستة هو عضو حي يتناسق مع البقية ليكوِّن كائن متكامل لا ينتمي إلى العالم البغيض بل ينتمي إلى الكون السامي الفريد. ستة أجزاء عن الإنسان، أفعاله وتصرفاته،حقوقه وواجباته،حُبهُ وبُغضهُ،طُهرهُ ودَنسهِ،عُلُوَهُ وتدانيه،فناءهُ وخلودهُ،حريتهُ وجبرهُ،روحهُ وبدنهُ،كل ما يحيط بهِ، كل ما يؤثر فيهِ ويتأثر بهِ. هو كتاب الإنسان الذي يرغب في تأمل معنى الحياة
💛💛
من مقولاته:

•إن الطريقة التي نرى الله فيها ما هي إلا إنعكاس للطريقة التي نرى فيها أنفسنا. فإذا لم يكن الله يجلب إلى عقولنا سوى الخوف والملامة، فهذا يعني أن قدرًا كبيرًا من الخوف والملامة يتدفق من نفوسنا. أما إذا رأينا أن الله مفعمًا بالمحبة والرحمة فإنا نكون كذلك.

•يوجد نوع واحد من القذارة لا يمكن تطهيرها بالماء النقي, وهو لوثة الكراهية و التعصب التي تلوث الروح. نستطيع أن نُطهر أجسامنا، لكن الحب وحده هو الذي يُطهر قلوبنا.

•على المرء أن يَنفُذ إلى قلبه بنور العقل ويرى واقعهُ لا أن يكون عبدًا للنقل.

•لايوجد فرق كبير بين الشرق والغرب،الشمال والجنوب.فمهما كانت وجهتك ،يجب ان تجعل الرحله التي تقوم بها رحله في داخلك. فاذا سافرت في داخلك،فسيكون بوسعك اجتياز العالم الشاسع وما وراءه.

•ما تبحث عنه يبحث عنك.

•النور الذي في العين ليس إلا أثراً من نور القلب.

•إذا كنت مثل القشة لا مبدأ لك تميل مع كلّ نسمة فإنّك لن تَعدل قشّةً حتى ولو صرت جبلًا.. فالمرحلة المأزومة تدُلّنا الى المُدِّعين المنافقين والمهترين مع كلّ ريح.

•لا يهدأ قلب العاشق قط ما لم يبادله المحبوب الوله. وحين يشع نور الحب في القلب فذاك يعني أن هناك إحساساً بالحب في القلب الآخر.

•للمرأة حضور خفي لا يراه ويهتدي به إلا رجل متفتح عارف.. ربما كانت المرأة نوراً من نور الله، ربما كانت خَلَّاقة وليست مخلوقة، ربما هي ليست مجرد ذلك الشكل الأنثوي الناعم الذي تراه!..
💛💛💛

سأل أحدهم جلال الدين الرومي:
نراك تقرأ وتكتب كثيرا فماذا عرفت؟؟
فقال:
عرفت حدودي !
💛💛💛💛💛

02/01/2024

مسا الورد🌹
اول طقم لوحات اعرضه في السنة الجديدة ♥️
بس هو اوردر مؤكد السنة الفاتت من شهر تمنية 😥🙆🏻‍♀️😔😔
شكراً جداً لي salah
على طول باله ولطفه🌹
بس انا ما كنت الفترة دي كلها متأخرة ساي والله لو وريتكم كمية اللوحات الببدا ارسمها والغيها لأنو بحسها ما بتشبه توقعاتي لي نفسي، ولا توقعات الكستمر مني ، حتحتارو !! الشغل الملغي اكتر من الشغل البسلمو،، طبعاً ما دايماً ، لكن في الاوقات البكون فيها مدبرسة واحس انو مزاجي ظاهر في رسمي ،، بضطر افضل الغي واعيد من الأول لحدي ما احس انو اللوحة ما حزينة زيي
هو كان طالب لوحة بس عشان كان لطيف جداً وصبور وكأعتذار ليهو عملت ليهو لوحتين وڤازة 🌹🌹🌹
اللوحة كان طالبها تكون نوبيه سودانية ♥️
وعملت ليهو ڤازة على شكل برج حمام طلعت جميلة شديد 🥺🥺♥️♥️
عملت ليكم صور من كل الاتجاهات عشان تشوفو التفاصيل كلها ♥️♥️

01/01/2024

كل سنة وانتو طيبين ويارب سنة جديدة سعيدة وملانة توفيق ربنا ينهي حرب السودان ويرجع لينا بلدنا ويملاها سلام ومحبة يارب السنة دي تكون كلها نجاح وتعويض عن كل الحصل السنة الفاتت ويارب تكون كلها سعادة ولمة ونشوف ناسنا المشتاقين ليهم ونتجمع مع حبايبنا ♥️♥️🌹🌹
انتهت اكتر سنة غريبة بالنسبة لي ،،كل سنوات حياتي في كفة و2023 في كفة
بس على قدر ما كانت صعبة وقاسية على قدر ما اتعلمت منها حاجات كتيره وعرفت فيها نفسي اكتر وقربت من نفسي اكتر
شكراً لي اي شخص وقف جنبي في الاوقات الصعبة وهون علي ♥️♥️ وممتنة جداً لي كل كلمة لطيفة في لحظة حزن أو ضيق أو إحباط ♥️♥️♥️
وقبل كدا بشكر نفسي لأني رغم كل شي ما استسلمت مع اني أوقات كتيرة كنت ما بتمنى حاجة اكتر من اني اتخلى عن اي شي بس ما خليت لحظات الضعف تكون أقوى مني
بعتذر لي اي شخص كان طالب مني اوردرات السنة الفاتت واتأخرت فيها وما حنسى للأبد كيف كنتو لطيفين واديتوني العذر واديتوني مساحة♥️♥️🌹🌹
كنت أوقات بمر بتأنيب ضمير سيء شديد من اني ما قادرة ارسم بس السنة دي خلتني اقرب من نفسي واعرفها اكتر و بعد فهمت نفسي عرفت انو انا ما ينفع ارسم وانا بمر بضغط نفسي طبعاً ما كل الفنانين كدا في فنان إبداعه بيظهر وقت الضيق بس انا عرفت انو تركيبتي النفسية بتحتاج مني ذهن صافي ومشاعر مستقرة عشان اقدر أبدع ، أوقات كنت بقبل الطلب وبعدها أمر بظرف سيء يغير كل شي ويخليني كل ما ارسم لوحاتي تطلع باهتة !! الواني تطلع مشوشة !! ملامح اللوحة المفروض تكون سعيدة تطلع حزينة !!💔💔 ودا لأنه اسلوبي في تعبيري الفني هو انعكاس للجواي ومن وقت ما انا فهمت تركيبتي وانا حاسة براحة نفسية وارتحت من جلد الذات
دا ما معناه انو الناس تتجبر على مزاجي بس معناه أنا مفروض اتبع اسلوب جديد في شغلي واعتمد اكتر على الكولكشنات الجاهزة للإستلام الفوري
بس حالياً اي شخص عندو اوردر عندي ولسه ما استلمه واتحملني وبالعكس كمان واساني انا ممتنة جداً وما حنسى ابداً كيف كنتو جميلين شديد ♥️♥️🌹🌹

وشكراً ليكم كلكم في الصفحة على الكومنتات الحلوه شديد البتكتبوها لي والحب البتحسسوني بيه والله أوقات كنت ببكي من شدة ما بكون متضايقة وبحس الكلام حلو لدرجة غير شعوري وأداني أمل ♥️♥️🌹🌹
بحبكم جداً وسعيدة بوجودكم كلكم
ويارب تكونوا كلكم بخير والسنة الجديدة تكون حلوه عليكم وتحققو فيها كل ما تتمنو وأكتر ♥️♥️♥️

28/12/2023

😯😯😯♥️♥️♥️♥️🥺🥺🥺

أضان فيل عملاقة
تسوي حديقة براااها
خلينا مع البستنة والزهور ياخ!
(الصورة من النت موقع انجانتد فلورز)

26/12/2023

صباح الورد😁😍✨
أحلى حاجة ابدا بيها اليوم وأحلى حاجة تكون جنبي وانا برسم 😁😍😍♥️♥️✨✨

وروني حاجات غريبة بتحبو تاكلوهم مع بعض
انا بحب الشوكولاته مع البرتقال😍😋😋🍊🍑🍫🍫

ودا صحبي الجديد😁♥️🥺 ماعارفه اسميهو منو اقترحوا لي برضو اسم ليهو يكون كرييتڤ ومضحك♥️😂🥰🌝🌝

25/12/2023

😍😍😎😎✨✨

الفترة الجاية حنزل صور الاوردرات الشغالة عليها حالياً
تُحف😌😍😍✨✨✨

24/12/2023

دي انا بعد حياتي بقت ساهلة و سعيدة 😍😍😍♥️♥️♥️♥️
مع الSuper heroes عهد عبدالله ومهند عصام 🦸🏻‍♀️🦸‍♂️ 😌😌♥️♥️
شالو مني هم ادارة الشغل كلو
نظام واجتهاد
كدا ياداب اقدر اركز في الرسم وبس 😍
ماعايزة أعمل اي شي في الدنيا غير اقعد براي انا والواني وريشتي وأسبح في خيالي 😁♥️♥️😍😍

لحدي ما اخلص من الحاجات الشغالة عليها حالياً وأنظم شغلي وبعدها أعرفكم على التيم الحيتكون والأفكار الجديدة العايزة أضيفها لشغلي 😍👏🏻👏🏻

14/12/2023

طلبها 💙💙💙

الفكره العامه راجل لابس جلابيه وعمه ومرأة لابسه توب متكله على كتفه
وراهم ممكن احساس البيوت النوبيه
درجات الوان بلو ورمادي لكن بثق في احساسك اكتر ،المهم يعني ارسميها بشعورك انتي حق اللحظه البديتي فيها و متاكده انه النتيجه حتكون مرضيه شدييد لي 🌷🌷🌷

💙💙💙
التنفيذ ✨✨
كانت عايزة ڤازة لكن اقترحت ليها اعمل ليها كبايات فخار وطلعو حلويييين شديد ✨✨

💙💙💙