08/06/2026
من فترة مو قصيرة وأنا عايشة بحيرة ما عم تتركني.
صارلنا بألمانيا كم سنة، والحمد لله تجاوزت مرحلة كانت صعبة كتير عليّ بالبداية، بس لحد هلق عندي إحساس إني مو قادرة أندمج بشكل كامل، وكأنو هالمكان مو المكان اللي كنت متخيلته لأولادي.
أكبر همّي بناتي. الكبيرة عمرها حوالي 15 سنة، وهنن الحمد لله محافظين على صلاتهن وصيامهن، وأنا وأبوهن منتابع كل صغيرة وكبيرة بحياتهن ومنحاول نربيهن على اللي منآمن فيه.
بس رغم هيك، كل يوم بسمع قصص وتجارب من ناس حواليي، وبيزيد عندي الخوف والتفكير بالمستقبل. أوقات بحس إني ضايعة بين خيارين، لا قادرين نرجع على البلد اللي طلعنا منها بعد تعب كبير، ولا مرتاحة نفسيًا بشكل كامل هون.
حتى فكرة الانتقال لبلد عربي تاني صارت تخطر ببالي، خاصة إنو عنا التزامات وديون ولسا الطريق طويل. بنفس الوقت بنتي عندها طموح كبير وهدفها تدرس طب، وهاد الشي بيخليني أتردد أكتر بأي قرار.
يمكن اللي مخليني أكتب هالكلام هو إني حابة أسمع تجارب ناس مرّوا بنفس الشعور. مع الوقت فعلاً الواحد بيتأقلم وبيخف هالخوف؟ ولا إذا بقي الإحساس من البداية بيكون إشارة لازم الواحد ياخده بجدية؟
من بريد الصفحة، وننشره كما وصلنا تقريبًا…
