Hayet’s cake&sweet

01/07/2025

14/03/2024

السلام عليكم رمضان كريم .
وصفة قلب اللوز معشوق الجزائريين:
المقادير وطريقة التحضير:
الشربات:
نحتاج في كاسرولة 500غ سكر عادي+1 لتر ماء+كوب ماء الزهر ونحطها تغلي،نحسب 10دقايق ونطفي عليها.
للعجينة:
1)كيلو سميد خشن
2)700غ سكر عادي
3)ربع كاس سمن ذايب
4)300ملل ماء (خليط بين ماء وماء الزهر)
5)قرصة ملح.
في جفنة نضع كيلو سميد خشين (نشري بالميزان احسن) نزيدلو السكر وربع كاس سمن ذايب او زبدة والملح ونضيفله 150ملل ماء مخلط مع ماء الزهر ونخلط الكل او نفتلو ونتركه يرتاح ليلة كاملة .في الغد نضيف 150ملل ماء المتبقية للخليط ونعجن جيدا اما باليد او في العجانة حتى يتلم ويصبح كعجينة الكسرة كالكتلة الواحدة يصبح يتعلك هذا السر باش مايجيش يابس،ثم ندهن السنيوة 30/40سم بالسمن او الزيت ونضيف الخليط.
مدة الطهي:(60-40دقيقة)على درجة حرارة:170.
_في15دقيقة الاولى نخرج السنيوة نقسموها في الأول نكونوا رسمنا فقط بالموس وبعدها ب15دقيقة ندهنوها بالسمن الذايب ونرجعها اتطيب من الفوق.
بعد الطياب نشربوها على ثلاث دفعات ثم نتركها ترتاح مدة 6-10ساعات على الأقل في الفرن بعد ما نكونوا طفيناه،وبالصحة والعافية.

02/03/2024

08/01/2024

السلام عليكم
اليوم جيتكم بوصفة لا غنى عنها وهي وصفة سلطان المايدة الجزائرية مقرود الكوشة او مقرود الغرس كيما نسميوه في الشرق الجزائري وهكذا نخدمو ويجي طري وهشيش ويذوب في الفم.
المقادير وطريقة التحضير:
نحتاجو للعجينة ثلاث كيلات سميد متوسط ونزيدلهم كيلة غير إصبع خليط بين سمن ومرغرين ذايبين وباردين ونضيفلها الزيت حتى تفيض الكيلة ثم نخلط الخليط جيدا بين ايدينا حتى تتشرب كل حبة سميد من خليط السمن والمرغرين،بعدها نضع قرصة الملح حسب الكيل اذا وضعنا كيلة كبيرة نضع ملعقة طعام ملح واذا وضعنا كيلة صغيرة مثلا انا نكيل بعلبة المرغرين500غ اضع فيها ملعقة صغيرة ملح،ونلم الخيط بكيلة مزيج بين ماء وماء الزهر ونتركه يرتاح من الافضل يبات ليلة كاملة.
بالنسبة للحشو:
نحتاج كيلو غرس منقي مليح ومرحي ونضيف له جلجلان محمص اختياري وملعقة صغيرة قرفة مرحية مع ملعقة صغيرة قرنفل مرحي ونعجن بماء الزهر مليح وفي الاخير نضيف له ملعقة مرغرين باش يجيني طري،ثم نشكله حرابش صغار .
على سطح العمل ناخذ شوية عجينة بعدما ارتاحت جيدا واذا وجدنا الخليط نشف ويبس نقدرو نضيفولو شوية ماء دافيء ونجمعوه،ونشكلو حربوش ونضع في داخله حربوش صغير نتاع الغرس ثم نضغط عليه برفق ونسوي سطحه حتى الحصول على حربوش شكله معتدل بعدها نطبع الحربوش بطابع المقرود ونقسمه حبات ونضعها في صينية ثم الى الفرن.
ملاحظة:عند وضع المقرود في صينية الفرن من المستحسن تكون كل حبة مقرود تقابل اختها يعني الغرس يقابلو الغرس باش مايتحرقش.ومن الافضل يطيب على درجة حرارة متوسطة ونعسوه ،نحمروه من الأسفل وشويه أحمر من الفوق وكاين اللي يحبو يطيب اصفر من الفوق.
مقرود الكوشة مانعسلوش الا عند تقديمه،نسخن في كاسرولة شوية عسل مع ماء الزهر حتى يولي دافيء ونبدا نغسل بالحبة ونقطرها،ثم نوضعها في صحن التقديم ونرش عليه جلجلان محمص للتزيين،وبالصحة والعافية.