ChoCo IKo

04/10/2025

السلام عليكم ورحمة الله
عُدنا ^^

هيا نديرو اليوم حاجة تشدلكم حتى لسمانة تقريبا (إدا ماخبيتوهاش تشد نهار ههه)

كريات جوز الهند :

كيلة جوز الهند نخلطوها مع كيلة حليب ونخلوها تشرب تقدرو تزيدو نص كيلة جوز الهند إدا كان من النوع لي مايشربش
نزيدو نص كيلة كريمة سائلة ونخلطوهم مليح مادابيكم تخدمو في طنيجرة تقيلة وتحطو فوق نار قليلة وتقعدو تحركو تزيدو نص كيلة عسل التمر ولا دبس التمر ولا دبس الخروب... المهم حاجة تحلو بيها من غير السكر الأبيض.

تحركو فوق النار كيما الهريسة (طمينة اللوز) حتى تحكم روحها ولازم ماتحبسوش صح تعيي بصح في خاطر ولادكم.
كي تولي ماتلسقش فالطنيجرة تنحوها وتخلوها تبرد تقسموها على زوج نص خلوه هكداك ونص ديرولو كاكاو، كورهم احشوهم بحبة مكسرات ولا تحبو بلا حشو رمدوهم ف جوز الهند وقدموهم حبة فاللمجة كاقتراح مع حاجة تاع خضر جزرة.. خيارة.. ولا بيض...

ملاحظة: الحليب خاصة إدا تاع الشكاير ماشي صحي بصح مكون واحد علابالكم بيه خير من بيسكوي مشري مانعرفوش كامل مكوناتو

30/09/2025

اليوم نحضرو حاجة ساهلة ماهلة وماشي فكرة جديدة فالحق بصح ممكن تفيدكم.

زوج بيضات مغليين نراپيوهم (البيض وقت طيابو ماشي حتى ينشف الما لالااا كي يبدا الما يغلي نحسبو 8 دقائق ونحو البيض مالما باش لصفر يطيب بلا مايبدل لونو)

عندنا بيض مراپي نخلطولو جبن مادابيكم ماشي تحضيرة جبنية ملح، زيت زيتون ونطلسولهم فالخبز من الأحسن بيسكوت القمح الكامل وتربح رابح

مع حبيبة فاكية خفيفة خطيكم مالبنان هاداك نهار تمدوه مدوه وحدو هو أصلا يشبع.

هاد الكمية تاع زوج بيضات ندير ونخلي لي مايقراش فطور الصباح خاطر نحب اللمجة
تكون خفيفة باش بنتي ماتجيش شبعانة وقت الفطور

29/09/2025

السلام عليكم ورحمة الله

شفتو لي بيسكوي و الحلويات كامل المضرة لي تدمر صحة ولادكم نهار تتخلاو عليهم تلقاو روحكم وفرتو مصاريف.

اشرو كمية تاع لوز ماشي مقشر قيس 250غ واخدمو بيه زبدة اللوز بنفس الطريقة تاع زبدة الفول السوداني.

نحطو اللوز يتحمص في فرن مسخن مليح من قبل ونقصولو أدنى درجة ونخلوه يسخن نص ساعة وهو سخون نرحووه بلا مانحبسو حتى يطلق الزيت تاعو و تحبو تعاونو روحكم بشوية زيت الزيتون.

هاد الوصفة باينة تكونوا وجدتوها من قبل باش صباح كاقتراح:

ثلاث تمرات محشيين بزبدة اللوز
بيضة مغلية

وتربح رابح
بصحة ولادكم

28/09/2025

اللمجة تاع اليوم ماشي سهلة وسريعة بصح بنينة وصحية تحبو توجدوها فالليل إدا ماشي موالفين تبكرو شوية قبل وقت المسيد.

نديرو في مقلاة قيس تلاتة مغارف ماء مع شوية زيت زيتون ولا أي زيت غير مهدرج عندكم، الما علاجال باش مايتحرقش الزيت، ونحطو بصلة متوسطة مقطعة صغير تتقلا على نار قليلة ونغطو باينة باش مايتبخرش الما.
حبة زرودية مقطعة رقيييق بالطول ولا تحبو تراپيوها، من بعد نزيدو القرعة، من بعد الفلفل الألوان لي عندكم، وكل خضرا تحبو تزيدوها خير و بركة المهم واش عندكم نتوما خطيكم برك مالطوماطيش، حتى الكابويا إدا عندكم هايلة وتكون يا إما مقطعة رقيقةولا مراپيا.
ملح فلفل كحل توم ونغلقو نخلوها تدبال.

من جهة وحدخرا نجيبو البيض تلاتة ولا ربعة.. كاس ما ولا تحبو كاس حليب، كاس فرينة القمح الكامل، نص مغيرفة خميرة كيميائية ولا الأحسن لصحتكم عوضوها بنص مغرف بيكاربونات مع نص مغرف عسل.

خلطو وجلطو مليح من بعد جيبو سنيوة فيها ورق الطهي وفرشو الخضرا تاعكم على كامل السنيوة وفرغوا فوقها الخليط تاع البيض الفرينة دخلوها الكوشة طيب.

إداااا كان عندكم فروماج راپيولها ملفوق ورجعوها تمتم للكوشة باش يدوب سينون ماكالاه

قطعوها مربعات نوغمالمون في سنيوة تاع
30/40 تجيبلكم 12 حبة

مليحة يدو معاهم زوج مربعات فاللمجة ماحاش تقطعلهم الشهية على الفطور.
وبصحة ولادكم

27/09/2025

نحطو في الخلاط موزة نصف لتر حليب كمية مليحة تاع كاكاو 100غ تقريبا ونميكسيو
تحبو تخلوه هكداك ولا تحبو حاجة حلوة تضيفو عسل تمر ولا عسل أي نوع عسل طبيعي عندكم.

تمدوهم مع اللمجة لولادكم

كاقتراح ترافقوها مع بيسكوت القمح الكامل مع الجبن ولا زبدة.

26/09/2025

كريات الطاقة الصحية البنينة بزاف:

_نجيبو أي نوع من أنواع التمور راهو وقتو وماهوش غالي بزاف

_مكسرات محمصة ومرحية حسب مقدوركم، مينداك ندير غير الكوكاو المهم نتوما ديرو أي نوع

_جلجلان محمص

_ طحينة السمسم

_كاكاو

_ البذور لي عندكم ولي تحبوها

_جوز الهند

(كل المكونات إختيارية من غير التمر ضروري)

نرحوهم كامل كيفكيف تولي عندنا عجينة بزاف بنينة، نشكلوها كريات وادا كنتو فارغين شغل ديرهم في مول سيلسكون وإدا كنتو فارغين شغل كتر و كتر وعندكم الخاطر كيما أنا اطبعوهم كيما السابلي بمول يحبوه ولادكم مثلا قطة ولا كدا أمور..
تحبو تغطسوهم ف شوكولا 70% كاكاو
تحبو ترمدوهم في جلجلان
جوز الهند
كاكاو
مكسرات مرحيين
ولا تحبو تخلوهم هكداك بنان في جميع الحالات

وبصحة ولادكم

25/09/2025

نحكمو كاوكاو نحطوه في في كوشة مسخنة_ من قبل ونقصولو كامل كي يسخن مليح تقريبا نص ساعة وهو سخون نرحوه ف بلا مانحبسو حتى يولي زبدة كاوكاو

_ ونزيدولو علبة شوكولا 70% كاكاو باينة ح دوب خاطر مازال الزبدة سخونة

ونخلطو ونحطوه في بلارات ف الثلاجة

ديروه ف البيسكوت بالقمح الكامل ولا خبز محمص عادي ومدوه لولادكم كلمجة

12/08/2025

19/06/2025

صح كليت الكبة من قبل، وماكانش الذوق تاعها كيما تخايلتو كانت عادي، بصح نهار كليتها عند Zahra Nahas صدقا حبيتها بدون مجاملة..

الحاجة المليحة أنو زهرة خدمتهالي ف دارها وجابتهالي لعندي وأنا لي قليتها وقت العشا باش ناكلوها سخونة وجديدة..
وكان اقتراحي أني نقليها أنا خاطر هي ترحيلكم اللحم وتخدمها بالبرغل الأسمر لي يزيدلها بنة على بنة وتقليها وتجيبهالمم واجدة باش تستمتعو بالبنة..

كانت رقيقة لداخل ومعمرة لحم اللهم بارك وبزاف بزاف عجبتني وجبت كامل عائلتي..

وفاللخر نقوللكم لي تحب كبة بنينة ماعليها غير تتوجه عند زهرة خاطر تخدم بسعر معقول وخدمتها نقية وبنينة

تسلم إيدك زهرة

31/03/2025

عيدكم مبارك تقبل الله منا ومنكم صالح الأعمال وأعاده علينا أعواما عديدة ونحن في أمن وأمان وصحة وعافية

07/03/2025

شمروا فإن ضيفكم عجول.. اقرؤوا مصاحفكم.. اجبروا تقصيركم.. أطيلوا سجودكم.. زيدوا في نوافلكم.. ألحوا في سجودكم..

العجينة المورقة متوفرة حسب الطلب
لطلباتكم تواصلوا على الخاص