Zahra cuisine

07/08/2025

عبارة شائعة بين نساء العاصمة للتفاخر بالأصل والعز إلى أن أصبحت مثلا متداولا
تعود قصتها لكنة من ريف العاصمة (فحصها) حينما قالت لحماتها القصباوية …"أنا بنت القع والبع والخلخال المربع والخاتم في الصبع كي يطيح في الأرض يقربع والهدرة والمشية بالطبع بنت الحسب والنسب والشعر في السماء مقلب واليد معمرة بالفضة والدهب بنت الشان والمرشان في لباسها يظهر البرهان في كلامها تسمع الأوزان وزينها لجميع الناس يبان "
ليس تمردا على الأخلاق وإنما ردا للإعتبار وانتصارا لكرامتها حيث أن نساء القصبة (بنات الحضر أي المدينة) كن يعاملن الكنة التي تكون بنت الفحص (ريف العاصمة) كجارية إلى أن جاءت إحداهن وهي ابنة أحد أثرياء ريف العاصمة يقال إنها من *واد الرمان* فاعترضت على طريقة تعامل حماتها معها قائلة *أنا بنت القع والبع (الأرض والماشية) في إشارة منها لمكانة أبيها الثري الذي كسب المواشي والأراضي بفحص العاصمة
فردت عليها حماتها بنت القصبة أي حضر العاصمة
" حنا بنات الضيق و الترتيق و الخير المرمي فالتريق و القلب لي يتسع للأحباب ومايديق ولي غرسلنا الخديوجة نغرسولوا الياسمينة ولي رمانا بالسم يعيش ديمة فالغبينة بنات الأسياد يبقاو لالات والباقي يبقاو تابعات لكان يلبسوهم فضة الأرض و ذهب الزمان عمرهم مايلحقوا بنات سيدي عبد الرحمن ''

28/07/2025

شوفولي هل الجمال ❤ماشاء الله 🥰
#موسكوشو

28/07/2025

قصة و عبرة من أيام زمان
يحكى عن جارين تقيّين إسم أحدهما صالح، و الآخر مصلح ،قرّرا يوما الزّواج ، ولصداقتهما الكبيرة ،تمّ ذلك في نفس اليوم ومرّت الشّهور و انجبت زوجة صالح غلاما، فأسرع ليخبر صديقه ،وعلم أنّ الله رزق جاره بنتا جميلة .
وفى العام التالي انجبت زوجته مرّة أخرى غلاما جميلاً ، فأسرع ليزفّ ذلك الخبر إلى جاره ، وعلم أن الله رزقه بنتا ثانية كان صالح يعتقدفي قرارة نفسه أن إنجاب الأولاد أفضل من إنجاب البنات . فأخبر جاره يوما وقال له : هل تعلم أنّ الزّوجة التي تنجب أولاداً يصبح مهرها حلالاً ؟ فتكون أنت مثل من لم يدفع مهراً عند الزّواج .لكنّ مصلح كان لا يهتم بتلك الخرافات ،وكان يؤمن بأنّ الأطفال نعمة من عند الله لا فرق بين الذكور و الإناث .وغادر صالح بيت صديقه دون ان يقتنع بما قاله جاره عن حكمة الله .
وبعد عام أخر علم صالح بأن الله رزقه بغلام ثالث بهي الطلعة ، واستغرب أن يجد عند جاره بنتا ثالثة .فقال لجاره ،لقد رزقني الله ثلاثة أولاد مثل ركائز الموقد ،فتثبت عليها قدر طعامي، لكنّ البنات ليس لهنّ نفس الخصال و لا تثبت علينّ قدر الطعام ،فلم يجبه مصلح أبو البنات .
افترق الصديقان وعاش كل منهما في مدينة ،ومرّت الأيام والسّنوات ،وكبر الأطفال وأصبحوا شبابا وبنات . و ذات يوم قرّر مصلح أبو البنات زيارة صديقه صالح أبو الأولاد ،وعندما دخل داره وجدها قذرة ،و صديقه نحيلا و شاحبا فسأله عمّا يحصل عنده
فقال له صالح : لقد طلقت زوجتي لانّها انجبت بنتا ،و بقيت مع الأولاد الذين لا يتقنون فعل شيئ سوى طلب المال ،و عندما سأله لمذا لم تتزوّج ،ثانية قال له بصراحة كنت اخشى ان تنجب إمرأتي بنتا ، لا يمكنني قبول هذه الفكرة عندما كبر الأولاد قليلا تركوني ،وراح كل واحد في سبيله ،لم ينسوا اني كنت يوما سببا في حرمانهم من امّهم ،و أنا أظل كما ترى جائعا حتّى يشفق عليّ أهل البرّ الإحسان .
ضحك مصلح و قال له :هل تتذكّر عندما قلت انّ الأولاد هم ركائز موقدك و يثبت عليها قدرك ليس لك لا موقد و لاقدر يا صديقي : أبو البنات ينام متعشّي، وأبو الأولاد ينام على جوع ، فبناتي الثلاثة يعتنين بالمنزل كلّ يوم ،و يحضرّن ما تيسّر من الزّاد ،لم اشعر يوما بالحاجة إلى شيئ .
الله جعل في كل شيئ حكمةو قدر كل شيئ لكنك كنت أسير العادات البالية فجنيت على اولادك و زوجتك و نفسك ،و ليكون ذلك عبرة لمن يعتبر.

فأصبح المثل يضرب في هذه المواقف دائمًا مازال العديد من الأشخاص ،حتى وقتنا الحاضر يفتخرون بإنجاب الأولاد عن البنات رغم أنهم هبة من عند الخالق،و كان الرّسول يحب بناته فاطمة ،و رقية، و أم كلثوم،و زينب فليكن لكم بالنبي أسوة حسنة معشر الرّجال .

24/07/2025

كان حطاب فقير عايش مع مرتو في دار صغيرة قيسهم قيس رواحهم و قانعين بعيشتهم.
كانوا متمنيين الذرية و بقاو يدعيو ربي يرزقهم حتى حملت المرا و جا نهار الزيادة و بعثت راجلها يجيبلها قابلة و غلقوا الجيران الكل بيبانهم في وجهو بنفس الكلام: "أنا نزيد مرت الحطاب؟!" ، تكبروا عليهم و غاضتو عمرو و رجع لمرتو حشمان مكسور الخاطر و قالها : "ليك ربي يا قرة العين" و عاود خرج و خلاها ما قدر يحمل وجعها و لغاها.
رفع راسو السما و قال : "ياربي ياحنين يا كريم أنت العالي و على كل شي قدير ابعث لمرتي زوج من الحور العين"
استجاب ربي لدعوتو و جاوها زوج في صفة البشر و سلكت بخير و جابت طفلة فلقة قمر ما خلق الله في بهاها، في وجها نور ضوا المكان و رسم الدهشة على وجوه العيان.
والديها فرحوا بيها بزاف و حمدو ربي على نعمتو و سماوها "شمس ضيا" كي تبكي يطرطقو العيون، و كي تضحك يطيح اللويز و تزول الهموم، و كي تمشي ينوض الحشيش و ينور زهر الليمون.
تبدلت حياة الحطاب و مرتو و دخل عليهم الخير من كل جهة، تبدلت أحوالهم و زالت همومهم، كانت "شمس ضيا" كل ما تكبر تزيان و تبها، و كي تبكي تصب الشتا و تغيم السما، و كي تضحك يطيح اللويز من فمها، و وين ما تمشي الأرض تحيا و تخضار و ينوض فيها الورد و النوار.
كان باباها يطم اللويز لويزة فوق لويزة حتى شرا اراضي و بقري و غنمي، و ما بين ليلة و نهار ولا المخير فالدوار.
حتى وحد النهار مرضت يماها و توفات، و كي حزنت حزنت معاها السما و الارض، اللولا جفت و الثانية يبست،تخبى الطير في عشاشو و طيح الورد لباسو.
طال الحال ايام و شهور و شمس ضيا حازنة حتى قالها باباها يا بنتي هدي سنة الحياة و لازم ترضاي بالقضاء و القدر، بصح هي ما عندها حيلة القلب لحمة و فراق يماها خلى في قلبها وحمة.
وحد النهار خرجت تعمر الما من البير عيطتلها الجارة لي كانت مطلقة و عندها طفلة في عمر شمس ضيا، عطاتلها خمار من حرير و غير رماتو على كتافها حست بدفا ميمتها، شكرتها و رجعت للدار و ولات كل ليلة تحطو تحت راسها و ترقد عليه و شمت فيه ريحة يماها و بدات تنسى حزنها.
حتى وحد النهار طبطبت الجارة على بابها و قاتلها ترجعهولها لخطر بنتها طلباتو منها.
حزنت شمس ضيا و عطاتهولها، هنا شافت فيها الجارة و قاتلها نقدر نخليهولك غير في حالة زوجتني مع باباك، و بلاما تخمم قبلت المهم يبقى الخمار عندها و تبقى حاسة بيماها معاها، و المرا في الحق كانت طامعة في رزق باباها و حزن البنت ما يخدمها.
كي ولى الحطاب للدار فاتحاتو بنتو بموضوع الزواج و ما قدرتش تقنعو خاصة كي زاد عرف شكون و تفكر الليلة لي غلقوا فيها بيبانهم و تكبروا عليهم و ماوقفوش مع مرتو في زيادة بنتو.
بصح شمس ضيا زاد حزنها و هنا اضطر باباها يقبل و قلبو مقبوض غير في خاطر بنتو باش يرضيها.
تزوج الحطاب و الجارة و فاتو ليامات اللولين ملاح منبعد تقلبت المرا على الطفلة وولات تحڨرها و تجوعها و تخدمها و شمس ضيا مخبية على باباها باش ماتحيروش.
وحد النهار بعثتها تعمر الماء، رفدت البيدون و خرجت و الخطوة لي تحطها في الأرض تنوض فيها الورد و النوار حتى ترسمت طريق موراها.
في هداك النهار كان خرج وليد السلطان للصيادة مع الخديم ديالو، صيد حجلة و طلب من الخديم يشويهالو.
ريش الحجلة و نقاها و شعل النار و بدأ يشوي فيها و هنا جازت عليه شمس ضيا و تاه في زينها و حيرو النوار لي ينوض فوق خطواتها و نسى روحو حتى تحرقتلو الحجلة و داها مفحمة لوليد السلطان و حكالو على واش شاف و راحو و تخباو و قعدوا يسناو فيها تولي حتى شافوها جايا و رافدة بيدون الما في يدها، و الطيور تسمع لغناها و تتمتع ببهاها، و الورد و النوار دايرين طريق موراها.
تبعها وليد السلطان ملبعيد و عرف دارها و سقسى على أصلها و فصلها و خطبها و شمس ضيا و باباها قبلو و فرحو بيه و جا نهار الزواج و تزينت و زاد عليها السر و البها و الحسد و الغيرة زادوا في قلوب حاسدينها، و مرت باباها تخمم كيفاش تبطل هد الزواج بكاش حيلة.
طيبت مرت باباها كسرة مالحة ووكلتهالها بالسيف عليها، و حنات لبنتها و لبستلها كيما حنات و لبست لشمس ضيا، و عطات لبنتها بوقالة تاع ماء فيه السحور و وصاتها تشربها منها كي تعطش.
ركبت العروس و بنت مرت باباها في الهودج و مشا موكب العرس و شمس ضيا نشف ريقها من الكسرة لي وكلتهالها مرت باباها و لي تطلب منو الماء يقولها ما لازمش تشربي هادي عوايد جدودنا حتى لعبتها بنت مرت باباها غاضتها و عطاتلها تشرب من بوقالة الما المسحور و في لحظة تحولت لحمامة و طارت حزينة و البنت كملت الدور حتى للقصر، و غير شافها الأمير قالها وشبيه وجهك أصفر؟ قاتلو من ماء بلادكم، قالها وعلاش عينيك رآهم مذبالين؟ قاتلو من كحل بلادكم، قالها وشبيه شعرك احرش؟ قاتلو من زيت بلادكم.
قعد وليد السلطان محتار بصح سلم أمرو لله الجبار.
جازت الأيام و كانت كل يوم شمس ضيا تزور القصر و تقول لمول الجنان: يا ساكن الجنان سلملي على محمد وليد السلطان، و تسقسيه على احوالو، ادا قالها راهو مليح ينور الورد و يخضار الجنان و إدا قالها ماراهوش مليح تغيم السما و تصب الشتا في كل مكان.
مول الجنان حيرو أمرها و راح خبر وليد السلطان لي دخلو الشك و طلب منو يحكمها و يجيبها و كيما كان الحال.
حطها وليد السلطان في قفص من ذهب مرصع بالمرجان و رجع يقابلها الليل مع نهار، بصح مرتو غير شافتها عرفتها، غافلاتو و ذبحتها و في الجنان دفنتها، و كي سقساها عليها قالتلو فتحت القفص و طارت من المكان.
روح يازمان و ارواح يازمان، ناضت في المكان لي دفنتها شجرة رمان فيها حبة رمان وحدة في عز الصيف
مرض وليد مول الجنان و ماصابوش دواه و شار عليه الشيخ المدبر يوكلو رمان في غير موسمو، جابلو هديك الرمانة لي ناضت فالجنان و غير فتحها نطقت و قالت حطوني فالما نحيا، دهش بصح قرر يلبيلها وش طلبت و يشوف وش راح يصرا، و غير حطها في الما رجعت شمس ضيا بشحمها و لحمها، و مسحت على راس وليدو برا من كل الأسقام و حكاتلهم حكايتها، و راح مول الجنان خبر وليد السلطان و تكشف المستور و ارتاح المسحور و نفى مرت الأب و بنتها لبلاد النسور، و تزوج بقرة عينو شمس ضيا و دار عرس سبعيام و سبع ليالي عرض فيه القريب و البعيد، و فرحلهم الصغير و الكبير و زهر فيه الورد و غنى الطير، و رجع الحطاب مستشار الأمير و عاش الكل في الهنا و الخير

اذا كملتوا الحكاية صلوا على نبينا محمد صلى الله عليه و سلم 🤲🏻❤️
تصبحوا بخير ياوجوه الخير

23/07/2025

كان يا مكان، فواحد القرية بعيدة، كانت كاينة طفلة اسمها "نحرة"، شابة زينة، قلبها طيب، ضحوكة ومرحة، كل الناس يحبوها. عندها خو كبير، زعيم القرية، راجل قاسي ومتسلّط، ما يحبش حد يعارضو، وكان عندو حصان أصيل يحبو كي روحو، دارلو نهر خاص يشرب منو هو وحدو

نهار من نهارات الصيف، كانت نحرة مع صحابتها يتفسحو فالقرية، ووقفو عند البير، وبدات التحديات: "شكون فينا تقدر تشرب منو؟". كامل خافو من خو نحرة، بصح هي، شجاعة وما تخافش، شربت من البير قدامهم بكل فخر.

مع آخر النهار، جا خوها مع الحصان كالعادة، بصح الحصان رفض يشرب وصهل وبدأ يرفس. احتار الراجل، بدا يڨلب فالماء حتى لقى شعرة طويلة سوداء. ناض الغضب فيه، وقال: "نقسم بالله نتزوج البنت اللي طاحت منها هاذ الشعرة، ولو كانت نحرة!". وبدا يتحرى وسقســي حتى عرف بالرهان اللي صرا عند البير وبلي نحرة هي اللي شربت.

نحرة كي سمعت وش راه ناوي يدير، هربت للجبال تجري، تبكي وتتوسل، وتقول: "يا ربي، عاونّي!". وهنا صرا العجب، الجبل تشق قدامها وتخبات فيه، بصح يدها علقت فالشق، وانقطعت كي تسكّر الجبل.

نحرة نجات، بصح كانت حزينة على يدها، أما خوها، خذا يدها المقطوعة وعلقها فشرفة القصر تاعو عبرة للناس.

نهارتها نحرة خرجت من الجبل، ضايعة، تمشي فالبلاد، حتى لحقها الجوع والتعب، وشافت قصر زجاجي كبير، فيه حديقة كلها أشجار مثمرة، قعدت تقطف وتاكل باش تعيش.

دارو الأيام، وفجأة شافها العساس، جبدها من يدها وقال: "هذي هي السراقة؟ شابة بصح تسرق!". داها عند الملك.

الملك، اسمو سي رمضان، كي شافها، بقا يتأمل فزينة وجهها، بصح مرتو غارت، كانت قبيحة وما يحبها حتى واحد. قالتلو: "هذي سحارة ولا ملعونة، شوف يدها مخبية! خلينا نجربوها!"، وشرت صوف بزاف وعطاتهالها وقالتلها: "عندك شهر تغزليهم، وإذا ما غزلتيهمش، راك كذابة!"

نحرة تصدمت، مستحيل تغزل بصوف بزاف بيد وحدة، بقات تبكي كل يوم عند التاقة، حتى سمعتها حمامة، جات وسقساتها: "علاه تبكي؟"، نحرة حكاتلها كلشي.

الحمامة قالتلها: "نعاونك، بصح تعطيني شوية صوف نبني بيه عش لولادي"، نحرة وافقت، الحمامة وعدتها تجيب يدها والأعشاب باش تبرى.

بعد أيام، رجعت الحمامة، وجابت اليد والأعشاب، وبدأت تدوي فيها، وبالفعل نحرة برات يدها وولات تحركها، وشكرت الحمامة ومدتلها شوية صوف.

بقات نخدم الصوف ليل ونهار، حتى جاء اليوم المحدد، ودخل الملك ومرتو، لقوها قاعدة فمكانها، خبات يدها، فرحت زوجة الملك، بصح نحرة خرجت صوف مغزول، زين ومرتب.

المرأة غارت، وصرخت: "سحارة!"، وهجمت عليها، وحاولت تبيّن بلي ما عندهاش يد، بصح تفاجأت بلي يدينها كاملين. حاولت تقتلها، بصح الملك وقف معاها وطرد مرته خارج أسوار القصر.

نحرة شكرتو، وحكاتلو القصة، والحمامة شهدت معاها. الملك تأثر، وطلب يدها للزواج، وقبلت.

بعد الزواج، طلبت منو يستفسر عن حال قريتها وخوها، رجعلها الرسول وقالها: "القرية بخير، بصح خوك راه طايح فالفراش، يدعي ربي ياخذ أمانتو".

حزنت نحرة، وطلبت من الملك يديها عندو. دخلت عليه، ومسحت على وجهو وقالتلو: "سامحتك يا خويا"، وعرفها من صوتها، وبكاو كامل وعانقو بعضهم، وصفاو القلوب

23/07/2025

يادرا #كرانتيكا في هذي السخانة 🤔😁

22/07/2025

يا سيدي بن سيدي يحكيو على زوج جارات ....جيران
الساس كيما يقولوا ....ساكنين الحيط في الحيط.... وحدة منهم عندها 3 صغيرات والاخرى عندها زوج ... اللي عندها ثلاثة راجلها طاح في بير مات... وخلاها تقاسي في هم الزمان وحدها.... اذا فطرتهم ما يتعشاو واذا عشاتهم ما يفطروا مساكن.... وكان كي يضيق بيها الحال وصغارها ياكلولها وجهها مالشر تمشي تدق على جارتها تطلب من عندها اي حاجة تسكت بيها جوع البنيات ....ساعات تعطيها خبز شايح.... ساعات تمدلها حويجة بايتة... واغلب الأحيان تلم المايدة وتخبي اللي فوقها....وتخرجلها ....تشقق الباب وتقوللها" والله ما عندي.... يقعدوا بعدي.... كان جاء عندي ما نشدش عليك"
ترجع هاذيك المرا مريضة .... تولي تهز وليداتها تسرح بيهم في الغابة.... توريهم الحشايش اللي ينجموا ياكلوهم:كراع دجاجة وخبيزة .... يعبيو كريشاتهم و يشربوا مالعين ويلعبوا و يروحوا يرقدوا طول .....💜
وكان ثمة سارح 🐐🐑🐏ديما يتعداو قدامو ... تقلو السلام....يقول لها وعليكم السلام بالله يا اختي مدلي ذاك البراد من فوق الحطب ....تقلو حاضر يا خويا .....خاطر انتبهت اللي سويقاتو لوح هذاك علاش يتعمد يقعد بعيد ع النار..... هي تمشي و هو يقعد يخزرلهم من بعيد ويتعجب في امرهم .... وفهم اللي وضع المرا وصغارها يصعب حتى ع الكافر..
ايا نهار مالنهارات تعدات تلقى معاه امو.... سلمت عليهم وجات ماشية ياخي العزوجة حلفتلها باش تقعد هي وأولادها تفطر معاهم... ومن غير تردد قعدوا كلاو معاهم قصعة كسكسي ولحم و اللحمات على اعددهم بالضبط🤔 ومعاه لبن وزادت كويس تاي ....ايا استشكرت خيرهم وجات مروحة....ياخي السارح قال لامو "نوضي يا امميمتي ونسيهم في الثنية و وريهم الدار ودخليهم للجناين الزوج...
قامت العزوجة جمعت معاهم وجابت بيهم طريق اخرى حتى وصلت لجنان كبير في وسطو دار مزيانة بزاف ...الوسع والرحمة ....وفيها غلة وخضرة من كل نوع.... ع اليمين جنان الصيف... تفرجت المغبونة وقالت "سبحان الله وبحمده سبحان الله العظيم....الصيف خفيف وظريف كلو خيرات وبركات"
وع اليسار جنان الشتاء.... تفرجت فيه وقالت " سبحان الذي أتقن كل شيء صنعا وهو على كل شيء قدير..... فصل الشتاء بكلو خير وبركة ...
روحت الطفلة سالت امها على رد فعل المرا....قالتلو "ما احلاها...وما احلى منطقها.....كلامها مزيان.... ولسانها معطر بذكر الرحمان....
قالت لها "واش قالت ع الصيف؟؟"
قالتلها"سبحت الرحمان وشكرتو على النعمة"
"واش قالت ع الشتاء؟"
قالتلها " كيف كيف "
ايا من غدوة كي تعدات هي وصغارها في المرواح اعطاها شكارة معبية بأوراق الكرم اليابس وقاللها غلقي البيبان والشبابك وتفقدها غدوة الصباح وردي بالك تحكي لحد...
خذات بخاطرو هزتها من غير ما تعطيها أهمية كبيرة....غدوة كي حلتها تلقاها بكلها تبرق....اوراق الكرمة ولاو لويز..... طارت بالفرحة وبعثت ولدها لجارتها يجيبلها الويبة باش تكيل بيها....
استغربت الجارة " واش عندها ما تكيل الفقرية؟؟؟!! حاستها دراش مخبية عليا🙄🤔😒
نحات اللوبانة من فمها ولصقتها في قاع الويبة من برا ..... كي رجعت الويبة لقات فيها كعبة لويز لاصقة في اللوبانة!!!😲😲🤔🤔🤔🤔😠 يا حليلي!!!! يا والله غريبة ... جارتي تكيل في اللويز بالويبة؟؟!🤔🤔😒
نادات الطفل و بالحلوى طمعاتو.... وللحقيقة استدرجتو.....
من غدوة هزت وليداتها وشدت طريق المرعى ...تعدات ع السارح وعطاتو البراد من غير حتى ما يقول لها😁.... و طاحت ترحي في الحشيش أخضر ويابس حتى داروا خواطرها....
قعدت على ذاك المعدل مديدة حتى تعرفت ع العجوزة وهزتها للدار....شهقت في الشي اللي رات وقالت "يخلي دار الشر.... ه الملك هذا حتى النار ما توفاهش😒🙄
عملت العزوجة روحها ما سمعتهاش ودخلتها لجنان الصيف ....دارت وكلات وبعد مدت ساقيها وقالت "أكره ما نكره فصل الصيف....السخانة والعروقات وكثرة الزيارات 🙄😏
ايا هزتها لجنان الشتاء ....دارت وكلات ماللي اشتهات وبعد قالت " ما أعظم مالصيف لكان الشتاء الشاتي .... البرد والكساد و الريح العاتي😏😒
من غدوة تلقى السارح محضرلها شكارة كيف جارتها..... من يدو خطفتها وطارت لدويرتها.... يا سعدها يا هناها .....طلبت ربي وأعطاها..... خططت ونفذت ووصلت لمبتغاها ...... بلعت الباب والشبابك عليها ...وربطتها مليح وبيتتها عند ساقيها.... الصباح حلتها وطلت عليها... وتقرصها أفعى بين عينيها .🐍🐍🐍🐉..

وحكايتنا طابة طابة والعام الجاي تجينا صابة ❤🌸
ان شاء الله عجبتكم 😉😉

16/07/2025