Dar Al Fann Salé & Sucré

16/03/2026

وصفة سوريز منزلي 🍒
بديل توت تجاري لي راه ينباع بسعر غالي لتزيين حلوياكم
✨ مقادير:
كاس ماء
نصف كاس سكر عادي
نصف كاس نشاء (مايزينة)
عصير حبة ليوم
ملون غذائي لون احمر او معطر بذوق فروالة لون احمر

✨ طريقة التحضير:
نحط ماء و سكر و نشاء في كسرونة نخلطو بارد في بارد و نزيدة ملون غذائي نتحصلو على خليط لون وردي ماشي احمر
نحطوه فوق النار و نبقاو نحركو نفس طريقة الفلون تبدا تعقد معانا حتى نتحصلو على عجينة لونها احمر نضيفة ليمون و نحركو بلخف حتى نشوفو عجينة ماتلسقش فالكسرونة
نوجدو طبسي نطلوه بالزيت ونفرغوها وهي سخونة و نبداو نشمخو يدينا فالزيت و نخدمو كريات صغيرة حجم كيما تبغو نتوما انا درتها صغيرة باش يجي متحوفة فالحبة تاع المشوك
و نتيجة معاكم في قاطو المشوك
شهيتكم فالجنة

21/03/2025

وصفة دجاج محمر في الفرن في المنزل على طريقتي

🔴مقادير الوصفة

قطع دجاج المتوفرة في البيت سواء اجنحة دجاج او نصف دجاجة او فخض و نصف صدر دجاجة انا استعملك نصف دجاجة في وصفتي اولى و عاود جرلت وصفة للمرة ثانية ب قطع دجاج (فخض و نص صدر )

🔴لتتبيلة :
ملعقة كبيرة موطارد (خردل)
ملعقة كبيرة فلفل اسود
ملعقة كبيرة كركم
ملعقة كبيرة زنجبيل
ملعقة كبيرة فلفل احمر حلو
ملعقة كبيرة ملح
ملعقة كبيرة توابل الدجاج
4 ملاعق زيت
2 ملاعق صغيرة زبدة
ملعقة صغيرة عسل تعطينا تحميرة لدجاج

🔴طريقة التحضير:

🌙 أولا نطيب دجاج في الماء فقط بدون ملح و نحيها من الماء و نحطها على جنب
و ماء تاعه نمرق بيه حريرة او طاجين زيتون او اي طاجين يحتاج تمراق مانرميهش الماء

🌙 في اناء نحطو كل توابل و نزيدو زيت و الخردل(موطارد) و ملعقة صغيرة عسل ، نخلطو مكونات جيدا نتحصلو على تتبيلة نحطو فيها الدجاج و نسمحوه مليح من داخل و الخارج و بين جلد و اللحم

🌙 تحبو تخلوها تبات و غدوا طيبوهم تحبو طيبوها فالحين اذن نتبلها مليح و نجيبو سنيوة او مول زجاجي كيما لي خدمت بيه انا نفرشو فيه ورق طهي يكون مشمخ (مبلول) و نحطو دجاج و نزيدو نفرغو تتبيلة عليه من الفوق و نضيفو قطعة زبدة فوق اللحم وحدها ذوب في الفرن

🌙 نزيدو نغطو دجاج من فوق بورق طهي مشمخ و نزيدو ورق أليمنيوم
و الى الفرن مسخن مسبقا و مشعول لفوق و تحت على نار متوسطة
🌙 كي نفتحو عليها و نلقاوها طابت من تحت نطفو فرق من التحت و نحو أليمنيوم و ورق طهي لي من الفوق و نخلوها تتحمر
و تقدموها مع بطاطا مقلية أو طاجين زيتون او جلبان

شهيتكم فالجنة أحبتي في الله

21/03/2025

وصفة سوفلي قطني

🔴مقادير وصفة :
كاس حليب دافئ أو (كاس ماء مع 3 ملاعق حليب بودرة)
نصف كاس زيت
ملعقة كبيرة خميرة الخبز
ملعقة كبيرة سكر
ملعقة صغيرة ملح
رشة خميرة الحلوى
فرينة

🔴الحشوة اختياري: انا درت فلفلة مقلية و فرماج وهدا حشوة يجي بنين بزاف

🔴و التزيين : صفار بيضة + قطعة قهوة او حليب + سانوج او جلجلان (اختياري)

🔴طريقة التحضير :

🌙 في اناء نديرو حليب دافئ و نضيفو خميرة خبز مع سكر نخلطوهم مليح و نضيفو نصف كاس زيت و نخلطوهم مليح و نزيدو فرينة وملح و رشة خميرة نطمو العجينة تكون طرية
نغطوها نخلوها تخمر

🌙 بعدما تخمر مانهبطولهاش تخمار نقسموها على 2 (قسمتها على اثنين لتسهيل العمل كون ندير العجينة كاملة يبقالي زوائد بزاف و نقعد نستنى فيهم يخمرولي بصح كي نقسمها تعطيني عدد ممكن من حبا الصافيين)

🌙 إذن قطعة أولى نفتحوها في سطح العمل فيه فرينة و نقطعوها دوائر انا عندي سارسو كبير دائري او بغطاء بريق ولا غرفية مهم حاجة دائرية كبيرة سوفلي يجي كبير ماشي كيما سمبوسك (بوراك العجين)

🌙 من بعد نجيبو الحشوة و نعمرو كل دوائر و نغلقو عليهم بالفرشيطة و ننتبهو للحشوة مايكونش سائل بزاف باش ماتفتحش معايا الحبة يعني الحشوة اذا درتو فلفلة ولا لاصوص لازم تكون ناشفة مليح

🌙 نغلقو حبة و نتبتوها بالفرشيطة في الحواف و نطلوها بصفار البيض و نزينوها بسانوج او جلجلان و الى الفرن مسخن مسبقا
نطيبوهم من التحت و نزيدو نحمروهم من الفوق

شهيتكم فالجنة أحبتي في الله

10/03/2025

وصفة رولي بطاطا مع صوص بلونش بزيتون اخضر على طريقتي

🔴مقادير وصفة
4 حبات بطاطا حجم متوسط
توابل : حرور ملح فلفلة حمراء
فرماج
4 حبات بيض

🔴للحشوة :
اختيارية انا درت فرماج و صلصة طماطم و لي عندها لحم كفتة دير ( حسب رغبة )

🌙صوص بلونش بزيتون اخضر :
بصل مقطع شرائح حرور رشة كركم ساشي جامبو ذوق دجاج ، قطعة فرماج ، كاس حليب و نص كاس ماء و ملعقة كبيرة فرينة

🔴طريقة التحضير :

🌙في اناء نسكرفجو بطاطا و نعصروها من ماء تاعها نضيفو توابل ملح فلفل اسود(حرور)، فلفلة حمراء، و 4 حبات بيض نخلطوهم مليح و نفرغوه في سنيوة 30×40سم يكون فيها ورق الطهي طبعا

🌙ندخلوها للفرن مسخن مسبقا مشعول الفوق و تحت باش بطاطا طسب مليخ ماتقعدش خضرة
بعدما طيب مليح نقلبوها في ورق طهي اخر و نحولها ورق طهي لي طابت فيه

🌙نديرو طبقة فرماج و طبقة صوص و نروليوها ، نزينوها بفرماج مبشور و ندخلوها تاخد تحميرة و نحطوها على جهة

🔴نخدمو صوص بلونش :

🌙في كسرونة نقلو بصل بشوية زبدة و زيت و نزيدو زيتون و قطعة جبن و توابل و جامبو و رشة كركم و ملعقة فرينة نحمصوها معاهم و نزيدو كاس تاع الحليب و نص كاس ماء ( باش ماتجيش عاقدة بزاف) نخلطوها حتى تعقد و نطفو نار
نحطوها فالطبق من تحت و نزيدو نحطو رولي و نزينوهت كيما نحبو
شهبتكم فالجنة

06/03/2025

نغسل ڨاع جزائر و مانغسلش هادو 🤣🤣🤣

06/03/2025

وصفة مركز عصير الليمون و البرتقال
بعد طلب عديد من ممتبعاتي

مقادير وصفة
🔴الليمون :
كيلو و نص ليمون
كيلو سكر
🔴البرتقال :
كيلو و نص و برتقال
نصف كيلو سكر

🔴طريقة التحضير :
نفس طريقة و الخطوات نطبقوها على ليمون و برتقال

🌙نحكمو كيلو و نص ليمون نغسلوه مليح و نشفوه
نحكمو راباز ( سكرفاج حنا في وهران نقولو راباز ههه) نرابو كل هديك كمية ليمون يعطينا كمية معتبرة من مبشور ليمون

🌙نحط هداك مبشور ليمون في إناء و او علبة كبيرة (باسينة) من احسن يكون عندها غطاء تاعها و نزيدو عليها كيلو سكر و نخلطوخ و نخلوه على جهة

🌙من جهة اخرى نعصرو ليمون كامل وماء تاعه نضيفوه لسكر و المبشور و نخلطوهم مع بعض و نغطوه مليح و نخلوه يبات ليلة كاملة و مرة على مرة نتفكروه نحركوه

🌙بعد مرور ليلة كاملة نصفوه في كسكاس جربت كل ادوات تصفية صفاية غربال لكن احسن حاجة كسكاس

🌙مركز العصير يهبط و مبشور ليمون يقعد فالكسكاس هداك مبشور مانرموهش راه كنز نديروه في علبة صغيرة و نحتافظو بيه نديروه فالحلويات و مسكوتشو فالشاربات فالتحليات

و مركز الليمون نديروه في علبة او قارورة زجاجية و نديرو منه زوج ملاعق كبار في كاس ماء و حسب ذوق لي يحبه مركز يزيد ملعقة

🔴طريقة التخزين :
اذا خدمتو كمية كبيرة ديروه في كونجيلاتار و كي تسحقوه جبدو بملعقة ناشفة ديرو 5 ملاعق و هوا جامد في قارورة الماء 1L

🌙و اذا خدمتو كمية صغيرة حطوه في ثلاجة في قارورة (يكون مركز ) و منها تدو شوية و تحطوه في قارورة أخرى وتزيدو ماء
ماتزيدوش سكر مركز اصلا بايت فالسكر يجيكم حلو بزاف اذا زدتو سكر
و ثاني حاجة كاين ناس تبغي عصير يكون مركز و كاين لي تبغيه خفيف تسما كمية تخفيف العصير نتوما تتحكمو فيها
ملاحظة
انا فالبداية خدمت كمية كبيرة و درتها في علب (صور موضحة) و خبيتها فالمجمد
و عاود وضفة لبارح كان عندي ليمون و برتقال بصح بكميات قليلة خدمت مركز و درته في قارورات زجاج و قعدت نفرغ منهم في كؤوس و نزيد ماء (ربع كاس مركز ليمون و نزيد ماء حتى نكمل الكاس )

شهيتكم فالجنة

06/03/2025

خبز الباي
صح فطوركم أحبتي اليوم جبتلكم وصفة خبز الباي او بسبوسة بالخبز مرحي لكن انا وصفة درتها على طريقتي مزجت بين وصفات باش نخرج ذوق لي نبغيه

مقادير الوصفة :
🔴شاربات :
كاس سكر + 3 كؤوس ماء + قطعة ليمون

🔴للبسبوسة:
4 بيض
كاس الا ربع سكر
كيس فانيلا + مبشور ليمون ( لي بقالي من مركز الليمون)
كاس زيت
نصف كاس زبدة و سمن ذايبين
كاس كاوكاو مطحون او كاس جوز هند حسب رغبة
كاس خبر مرحي
كاس سميد خشين
كيس خميرة كيميائية

🔴طريقة التحضير

اولا الشاربات في كسرونة نديرو كاس سكر مع 3 كيسان ماء و قطعة ليمون نحطوه فوق النار كي يغلي نحسبو 10 دقايق و نطفي عليه و نزيد عليه قطرات ماء زهر

🔴للبسبوسة :
في اناء نديرو 4 بيض و كاس الا ربع سكر و مبشور ليمون و كيس فانيلا نخلطوهم مع بعض و نضيفو كاس زيت و نص كاس زبدة و سمن ذايبين نخلطوهم و نزيدو كاس كاوكاو و كاس سميد و كاس خبز مرحي و كيس خميرة الكيميائية نخلطوهم و نفرغوهم في مول او سنيوة مدهونة بالزبدة
ندخلوها الفرن مسخن مسبقا نطيبوها من تحت و نحمروها من الفوق و غير تخرج نسقوها بالشربات يكون بارد
و نزينوها عادي
و وصفة تجي ايضا في ليغامكان ولا قوالب باش كل واحد ياكل حقه وحده ههه
شهيتكم فالجنة

04/03/2025

04/03/2025

🎉 Je viens de terminer le niveau 3 et je suis impatient(e) de continuer à m’épanouir comme Creator sur Facebook !
1k 😍😍