Hindo Of All Trades

04/11/2025

عيد اضحى مبارك! 🐑
كل عام وانتم بخير !
اعاده الله علينا وعليكم بالخير واليمن والبركات ❤️

04/11/2025

30/03/2025

كل عام وانتم بخير 🥳 اعاده الله علينا وعليكم بالخير واليمن والبركات ❤️
وتقبل منا ومنكم صالح الاعمال 🌸

28/02/2025

RAMADAN KAREEM!
رمضــــــــــــــــان كريــــــم!

24/01/2025

تجربة رقم #2
● نوع التجربة: تسعير المنتجات اليدوية.
|
شايفة ناس كتيرة بتعاني من موضوع التسعير وكيف تسعر شغلها بالريزن او شغل الهاندميد عموما. ف ح اشارككم بعض النصايح و الطريقة الكنت بسعر بيها شغلي (〃'▽'〃)

🌸 تسعير الشغل اليدوي بينقسم ل ٣ أجزاء :
□ تكلفة المواد
□ تكلفة الزمن والجودة
□ وتكلفة التشغيل
ح اتكلم عن كل وحدة بالتفصيل
|
■اولا تكلفة المواد:
كل شغل او تصميم بيحتاج مواد مختلفة عن القبلو، وكل شخص عندو تكنيكات مختلفة عن التاني، بس في اشياء اساسية واضحة ممكن تكون مشتركة بين الجميع، ف ح اتكلم عن الاشياء الاساسية وممكن تطبقو نفس الطريقة على الاشياء الاخرى.
|
◇الريزن :
زي ما كلنا عارفين الريزن انوااااع واشكال وماركات مختلفة بأسعار مختلفة، ف وحدة من الطرق البتساعد جدا في التسعير انو تحسب كمية الريزن البتسخدمها في القطعة الاشتغلتها. عشان نوضح الكلام ح اضرب مثال :
■عايزين نعمل مثلا كوستر واحد
الريزن الاشتريناه كان بي فرضيا ١٠٠٠ جنيه و كميتو ٥٠٠ مل وبتخلط بنسبة ١:١ "٢٥٠ الريزن و ٢٥٠ المصلب"
لازم نعرف قيمة كل مل في العبوة يبقى ح نقسم ال ١٠٠٠ جنيه على ال ٥٠٠ = ٢ جنيه
يبقى كده أي مل من الريزن تكلفتو الخام ٢ جنيه.
الكوستر عشان اشتغلو مثلا اخد مني ٣٠ ملم ريزن
يبقى ح اضرب ال ٣٠ × ٢ = ٦٠ جنيه
■كده الكوستر محتاج ريزن ب ٦٠ جنيه
|
◇الاضافات "الوان، جليتر، ورق دهب وغيره":
نفس فهم الريزن يتطبق على الاضافات زي القليتر و الالوان واضافات الاكسسوارات وغيره.
● يعني الفكرة الاساسية انك لما تشتري حاجة تعرف قيمة كل قطعة منها وممكن تكتبهم في كراس عندك اول ما تشتري عشان تسهل على نفسك.
مثال
اشتريت دستة قفالات سلاسل ب ١٢ جنيه
يبقى كده ١٢ /١٢ = ١
تكلفة القفلة الوحدة ١ جنيه
وهكذا
طبعا الحسابات دي متعبة وكتيرة بس كده انت ح تعرف تكلفة شغلك بالتفاصيل وح تعرف تسعر كويس
|
◇ تكلفة الزمن والجودة :
هنا يلا بيجي دور الفرد ومعرفته بنفسه وثقته بشغله، وهنا الفرق في الاسعار بيكون كبير لانك بتسعر على حسب خبرتك، ونضافة شغلك، والفينيش بتاعك .
○الزمن:
المقصود انه تقيم الزمن البتشتغل فيه القطع بتاعتك بسعر الساعة ، وكل فئة ممكن تلقى ليها رينج في النت
مثلا المبتدئين ممكن يسعرو من ١٠- ٢٠ دولار في الساعة
المتوسطين ٣٠ - ٥٠ دولار ، والمحترف ممكن لحد ١٠٠ دولار في الساعة ..
عموما الموضوع ده بيعتمد اكتر على رينج تسعير الساعات في البلد الانت فيه، ف ممكن تاخد فكرة عن الشغلات التانية ورينج الساعات فيها بكم عشان تقدر تقرب سعر كويس.
بس شخصيا بشوف انو الشخص هو البيقيم زمنه وكل انسان حر يقيم بالسعر اللي شايفو كويس معاه بس ف حدود المعقول وقدراته.
وزي ما عارفين كل ما زادت جودة الشغل وقل الزمن المبذول فيه كل ما زادت قيمته!
|
○ الجودة :
يقصد بها نضافة الشغل والفينيش النضيف واحساس الاحترافية في الشغل. وده كمان بيعتمد على قدرات الشخص ومهاراته.
|
◇
تكلفة التشغيل:
ودي نقطة ناس كتير بتغفل عنها
بيقصد بيها ، الكهرباء والموية، وعدة الشغل من جونتياات والقوالب والملاعق والكبابي للخلط
دي كلها حاجات بتستخدمها دايما لمن تجي تشتغل ريزن
ف تعتبر كمان تكلفة لانك ما تقدر تشتغل من غيرها، ف يفضل تضع ليها رقم تكلفة ثابت تضيفه لسعر التكلفة الاساسي للقطعة. والرقم او المبلغ ده يكون حسب استخدامك واحتياجك انك تجيب مواد جديدة كل فترة
يعني مثلا
شخص بيعمل اكسسوارات وبيشتغل كل يوم ح يخت رقم اكبر لان استهلاكه اكتر من شخص بيعمل صواني وبيشتغل كل اسبوع مرة .. وهكذا
|
■التغليف:
يلا كده بعد ما حسبنا التكلفة الاساسية للقطعة كمان بنحسب تكلفة التغليف، الاكياس والصناديق والورق وغيره. ونضيف القيمة للتكلفة الاساسية
☆ يلا نعمل مثال اخير عشان نوضح بيه الكلام الفوق كله
▪شخص بيشتغل كوسترات مرتين او ٣ في الاسبوع، وهو شخص عنده خبرة متوسطة في مجال الريزن. بيشتغل الكوسترات بتغليفهم في ساعتين.
حسب كل التكلفة وطلعت معاه كده
الريزن = ٤٠ مل للكوستر ٤٠ × ٢ = ٨٠ جنيه
اضافات = ٢٠ جنيه
زمن ٢×١٥٠ للساعة = ٣٠٠ جنيه
تكلفة تشغيل = ٣٠ جنيه
تكلفة تغليف = ١٠ جنيه
نجمع ده كلو = ٤٤٠ جنيه تكلفة القطعة بدون حساب سعر الجودة
نقول هو شغلو نضيف وبروفيشنال واضاف ٦٠ جنيه لجودة شغلو
يبقى كلو ٥٠٠ جنيه للكوستر.
ده مثال وكل الاسعار دي من خيالي عشان اوضح الفكرة (/≧▽≦)/~
|
اتمنى انو كلامي يكون واضح والفكرة وصلت منو.

🌸 واتذكرو حاجة مهمة جدا:
"الشغل اليدوي حاجة قيمة! ما أي شخص بيفهم قيمتها والتعب المبذول فيها. ف ما تزعلو اذا جا شخص وقال ليكم "شغلك غالي" او "ليه غالي كده"، لان الحاجات اليدوية عندها ناسها وبتفهم فيها كويس وبتقدرها
وان شاء الله توصل ليهم بإجتهادك وبصمة شغلك （∩▽∩）
ابدا ما تقللو قيمة شغلكم واجتهدو فيه وخلوه اجود ما يكون وبتوصلو للعايزنو كلو ان شاءالله "
وبالتوفيق للجميع يارب ヾ(@^▽^@)ノ
|
|
⚠ تنبيهات⚠:
🚫 كل المنتجات والتجارب التي تتم مشاركتها مبنية على نفقة شخصية، بدون اي sponsership او رعاية من شركات المنتجات المذكورة.
🚫 انا غير مسؤولة عن اي تطبيقات خاطئة او استخدامات غير مسؤولة للمنتجات قد تؤدي الى اي مشاكل.
🚫 انا لست طبيبة او مختصة او محترفة، انا مجرد شخص مهتم بتجربة الاشياء الجديدة بعد البحث عنها ودراسة التقييمات الخاصة بها.
🚫 دائما قومو باجراء ابحاث كافية عن اي منتج ومكوناته وكيفية استخدامه واجراءات السلامة والوقاية الخاصة به قبل شرائه واستخدامه.

22/01/2025

❓ هو شنو الريزن؟ (；一_一)!
|
سؤال اعتقد مر على كثير منكم! ( ￣▽￣)σ
🌸 الريزن او الراتنج او الريزين او الايبوكسي:
هو عبارة عن مادة كيميائية شفافة او ملونة سائلة في حالتها الاولى، بتتكون من جزئين:
● الريزن نفسه.
● المصلب او ال hardner.
بيتم خلط الجزئين مع بعض بنسب معينة "حسب كل شركة " وعبر التفاعل بين الجزئين يتحول الريزن من حالة السيولة الى الصلابة.

🌸 مدة التفاعل الكيميائي تختلف حسب الشركات المنتجة، ولكن تتراوح من ٤ - ٧٢ ساعة، وتمر بمرحلتين :
○ الاولى - مرحلة التصلب الاولية: والبتسمح انو الريزن يطلع من القالب المصبوب فيه ويكون قابل للمس بدون ما يتكون اثر على سطحه.
○ الثانية - التصلب التام : بتاخد مدة شهر من صب القطعة او العمل الفني ، وهي المدة البحتاجها الريزن عشان يوصل لاقوى صلابة ممكنة للقطعة.

❓ منو فيكم جرب يشتغل بالريزن قبل كده؟ （∩▽∩）

20/01/2025

⚠️ اولا: السلامة!

العمل في مجال الريزن ممتع جدا، ولكن الريزن مادة كيميائية ضارة! بتتصلب بنتاج تفاعل كيميائي بين الريزن نفسه والمصلب ، فمهما حاولت الشركات انها تسوق لي منتجاتها بانها خالية من الابخرة السامة او غيره، لازم نتبع كل اجراءات الوقاية اثناء الشغل لضمان سلامتنا وسلامة الحوالينا （∩▽∩）

دي بعض الارشادات المهمة المفروض اي شخص بيفكر يتعامل مع الريزن يتخذها:
■ العمل في مكان منفصل جيد التهوية، ويفضل ان يكون بعيد من اماكن المعيشة وتواجد الاشخاص والحيوانات الاليفة.
■ ارتداء قناع للغازات السامة Raspirator , لان الريزن اثناء التصلب ينتج غازات سامة voc vapors ضارة بصحة العيون والجهاز التنفسي.
■ لبس قفازات واقية وتجنب ملامسة الريزن للجلد لانه قد يسبب الحساسية. افضل نوع هو ال Nitrile gloves.
■ لبس نظارة واقية للعيون للحماية من الابخرة ومن اي حوادث قد تؤدي لوصول الريزن للعيون.

⚠️ في حالة ظهور اي تحسس في الجهاز التنفسي او الجلد يا ريت ما تواصلو في الشغل لان صحتكم اهم من اي حاجة تانية!
🌸 ودمتم سالمين（＾ω＾）

17/01/2025

تجربة رقم #1
● نوع التجربة: تجربة منتج ريزن
● اسم البراند: TEEXPERT
● استخدامات المنتج: صناعة منتجات و اكسسوارات الريزن.
● بلد الانتاج: امريكا
● لينك/مكان الشراء: amazon.usa
● تقييمي الشخصي للمنتج: افضل ريزن استخدمته خلال فترة البزنس!（＾ω＾）
|
|
⚠️ تنبيهات⚠️:
🚫 كل المنتجات والتجارب التي تتم مشاركتها مبنية على نفقة شخصية، بدون اي sponsership او رعاية من شركات المنتجات المذكورة.
🚫 انا غير مسؤولة عن اي تطبيقات خاطئة او استخدامات غير مسؤولة للمنتجات قد تؤدي الى اي مشاكل.
🚫 انا لست طبيبة او مختصة او محترفة، انا مجرد شخص مهتم بتجربة الاشياء الجديدة بعد البحث عنها ودراسة التقييمات الخاصة بها.
🚫 دائما قومو باجراء ابحاث كافية عن اي منتج ومكوناته وكيفية استخدامه واجراءات السلامة والوقاية الخاصة به قبل شرائه واستخدامه.
|
|
TEEXPERT RESIN 🌸
انواع الريزن في السودان كانت محدودة جدا بين انواع مصرية وسعودية، وبالرغم من انها متوافرة الا انو جودتها ما كانت احسن حاجة! وفي البزنس بتاعي دايما كنت بحاول استخدم اجود انواع ريزن واقلها ضررا على الصحة، لان كل انواع الريزن مضرة!
جربت انواع ريزن كتيرة اثناء شغلي، وكنت دايما بحب اجرب نوع جديد كل ما القى فرصة والقى زول جاي من برا السودان (/^▽^)/ ... بس ريزن TEEXPERT كان المفضل عندي لكثير من الاسباب!

✅️ مميزات ريزن TEEXPERT :
1. سهل التعامل معه، ومناسب جدا للمبتدئين. بنسبة خلط ١:١ بالحجم.
2. سريع التصلب، بتصلب خلال ١٢ ساعة ويكون قابل للازالة من القالب.
3. شديد اللمعان والشفافية. ونسبة الفقاعات بسيطة اذا تم التقليب بشكل صحيح.
4. بطيء الاصفرار ، ويوجد نوع غير قابل للاصفرار.
5. المنتجات التي تصنع به ذات قوة تحمل ممتازة وجودة عالية جدا.
6. الفينيش بتاعه جميل جدا وكمان بيعمل doming ممتاز ك فينيش للقطع.

❌️ مساويء ريزن TEEXPERT :
1.موجود في امازون فقط وفي بلدان معينة "حسب علمي"
2. غالي السعر مقارنة بالانواع المصرية والسعودية المتوافرة في السوق

في المجمل هو افضل ريزن نوع جربته وانصح به كل شخص عندو امكانية يشتريه ! (〃'▽'〃)

🌸 انتهت رحلتنا مع هذه التجربة! ونلقاكم في التجربة القادمة بإذن الله!
(≧ω≦)/ مع السلامة

15/01/2025

ما هي سلسلة "hindo tries"?
السلام عليكم ورحمة الله
مرحبا! ヾ(@^▽^@)ノ
اتمنى تكونو جميعا بخير وصحة وسعادة! وربنا يرجعنا تامين لامين لبلدنا وبيوتنا وكل حاجاتنا الحلوة ♡..
"اذا متذكرين يعني" ، انا اسمي هند، و كنت بشتغل ريزن وهاندميد كرافتز في السودان، بس بعد الحرب وقفت تماما وما اتسهلت لي العودة لشغل الريزن للكثير من الظروف.
|
|
ولكن بفضل الله تعالى و بدعم الاصدقاء والاهل، قررت انو ارجع الحياة للصفحة بتاعتي بس بي نكهة مختلفة شوية! (〃'▽'〃)

ح اشارك معاكم في سلسلة "hindo tries" الكثير من التجارب والخبرات العندي والاتعلمتها خلال حياتي عسى ولعل تستفيدو منها او تضيف ليكم شيء ولو بسيط
（＾ω＾）

و ح احاول بإذن الله انزل بوستات بشكل منتظم واغطي مواضيع مختلفة ، ومن امثلة المواضيع الح اتناولها:
● الريزن وانواعه
● مواد صناعة الاكسسوارات
● مواد الرسم والتلوين
● الاكل
● منتجات العناية بالبشرة والشعر
● منتجات منزلية مختلفة
وغيرهم الكثير ...
وان شاء الله تستمتعو معاي وتستفيدو!

وشكرا ♡

14/01/2025

Pssssst...
مرحبا! ヽ(•ω•ゞ)