يوميات هند عبد العظيم

05/01/2026

مطبخك مكركب ونفسك تعمليه بس مكسله قبل رمضان😌
يلا جهزي فوط كتيييير لاني جيبالك خطه 😉سريعه لتنظيف مطبخك قبل رمضان (بأقل تكلفة) ومن غير تعب ولا مجهود😌
⏱️ الوقت: ساعة يوميًا – مش أكتر
🧽🧫🪣: حاجات موجودة في أي بيت

1️⃣ ابدأي من فوق لتحت (مهم جدًا)

علشان ما ترجعيش توسّخي اللي عملتيه تاني هايبقي كده بالترتيب
• الدواليب
• الشفاط
• السيراميك
• الرخام
• الأرضية

2️⃣ أدواتك الأساسية (رخيصة جدًا)
• خل أبيض
• بيكربونات صوديوم
• 🧼🧽سائل أطباق
• ليمون
• فوطة مايكروفايبر أو قطن قديمة

الخل + سائل الأطباق = أقوى مزيل دهون

3️⃣ تنظيف الشفاط والحيطة
🧫طبق كبير فيه
سائل الدهون مع خل مع ليفه قويه وادعكي كويس الحيطان

4️⃣ البوتجاز (أهم حاجة)
• فكّي العيون والشبكات وانقعيهم
• خليط: مياه سخنة + سائل + خل + ليمون
• للّمعان: نشفي بعد التنضيف بفوطه قطن ناشفه بعد ماتغسليه كويس👌
اما الشفاط بليفه تانيه وهانزله وهانضغه كويس بمايه مغليه الاول وادعكه كويس وارمي الليفه فورا🧽👌
5️⃣ الرخام والحوض
• سائل أطباق + مياه دافئة
• للحوض: ليمون + ملح (نظافة ولمعة وريحه حلوة 🍋)

6️⃣ الدواليب من جوه
• طلعي كل حاجة
• ليفه نضيفه مع سائل الاطباق مع نقطه كلور. نضفي وامسحي كويس
• رتّبي على مزاجك وشيلي اللي مش مستخدم

7️⃣ الأرضية
• آخر حاجة
• مياه دافئة + مطهر ارضيات منعش
• نشّفي كويس
وطبعا ليفه المطبخ من جوه وليفه الرخام والحيطان تبقي جديده👌
اما ليفه الشفاط او السلك تبقي قديمه وترميها فورا 👌
مستنيه دعوه حلوه منكم♥️🌹

22/12/2025

**لو عايز تبدأ صح في شهر رجب.. دول أهم 5 أعمال نركز عليهم 🌙✨**

شهر رجب من الأشهر الحرم المعظمة عند ربنا، والحسنات فيه بتضاعف، بس كمان لازم ناخد بالنا إن السيئات أثرها بيكون أصعب على القلب. عشان كده، تعالوا نركز في الـ 5 حاجات دول:

1️⃣ **كف الأذى (الأولوية الأولى):** ربنا قال "فلا تظلموا فيهن أنفسكم". كف أذاك عن الناس.. بلاش الردود المزعجة، بلاش الغيبة والنميمة، وبلاش "الإسافين" في الشغل عشان نتسلق على كتاف بعض. ده أعظم عمل تبدأ بيه.

2️⃣ **إطعام الطعام:** مش لازم تستنى رمضان عشان تفطّر صايم، في ناس "جيعانة" طول السنة ومحتاجة اللي يكفي بيتها. دور على حد قريب منك أو مؤسسة بتطعم الناس، ولو بوجبة بسيطة أو مبلغ صغير، إشباع جائع ده من أعلى القربات عند ربنا.

3️⃣ **الرجوع للقرآن:** رجب هو "الشهر الأصب" اللي الخير فيه بيصب صب.. فبلاش نهجر كتاب الله. ابدأ بصفحتين بس في اليوم، المهم "الاستمرارية" عشان لما تدخل رمضان متبقاش النفسية تقيلة على القراءة، وتدخل وأنت متمرن وجاهز.

4️⃣ **الصيام:** الصيام في رجب ملوش أيام محددة بحديث صحيح، لكنه سنة في الأشهر الحرم كنوع من "التمرين" لرمضان. صوم اتنين وخميس، أو التلات أيام البيض، حسب قدرتك.. عوّد نفسك على العبادة من دلوقتي.

5️⃣ **الدعاء الدعاء:** ظالم نفسه جداً اللي مبيطلبش من ربنا وهو ساجد أو في وقت المطر. إحنا فقراء لربنا ومحتاجين منه كل حاجة، واللي ربنا فاتح عليه يدعي بالعافية ودوام النعمة. ادعي في السجود، وبين الأذان والإقامة، لعلها تكون ساعة استجابة.

**رجب يعني "العظيم".. فتعالوا نعظم شعائر ربنا في قلوبنا ونبدأ بجد.** منقول عن الداعية

مصطفى حسني

12/09/2025

الناس اللي بتتفرج علي البنت دى وبتعمل عليها رياكت وبتضحك وتتريق عليها لو مش عجبك محتواها متتفرجش اقسم بالله دى احسن وانضف من بنات كتير وبتتعمل بلفطرة ربنا يوفقك يابنتى ياريت الكل يدعمها

05/07/2025

تسجيل المكالمات . حْيانة
تصوير الناس بدون علم. حْيانة
فتح الاسبيكر حْيانة
استدراج الاطفال في الحديث حْيانة
تتبع اسرار الناس. حْيانه
احترموا أمانة المجالس
قال رسول الله ﷺ وهو يَصِف أيام الهرج والفىتن ( وكأنه بيننا اليوم ) بقوله:
"حين لا يأمَن الجليسُ جليسَه"
وقال الحسن البصري - رحمه الله -: " إنما تُجالسوننا بالأمانة، كأنَّكم تظنُّون أنَّ الخِيانة ليست إلاَّ في الدِّينار والدِّرهم، إنَّ الخيانة أشدَّ الخيانة أنْ يُجالسنا الرجل، فنطمئن إلى جانبه، ثم ينطلق فيسعي وينقل مع سمع منا ،،،
فصونوا أمانة وأسرار المجالس قبل أن تنفض المجالس!...
جعلنا الله وإياكم من المحافظين عليها .

د/ياسر الحزيمي

16/06/2025

الحنية والطبطبة دول فِطرة .. الإنسان العطوف الطيب اللي بيعرف يقول " متزعلش " و" خلي بالك على نفسك " ..
اللي بيمسح على كتفك و راسك .. و أما يشوفك بتعيط ياخدك في حضنه و يواسيك .. اللي دايمًا يقولك
"في ايه مالك .. احكي براحة بس "
ده بجد نعمة من ربنا ..
مش أي حد عنده القدرة دي .. في ناس عندهم جمود تجاه الآخرين حتى لو متأثرين من جواهم ..
مبيعرفوش يهوِّنوا .. مبيعرفوش يطبطبوا او يسمعوا .. مبيعرفوش يخترقوا الجبل والهم اللي فوق الروح ويخلوك تحكي وتتكلم ..
العواطف صعب تُكتسب .. الرحمة والمودة مبيتمثلوش .. دي متلازمة في الانسان بتكبر معاه زي صوته وشكله ولونه
دوروا على ناس حنينة من جواها .. ناس شبهكم ..
ناس تخفف عنكم ..
دول رزق في الدنيا .

11/05/2025

اطعم بيتى فور 👌🏽👌🏽

11/05/2025

ليه بتصوموا التسع الاوائل من ذي الحجة ؟؟!!

🌿اول يوم هو اليوم اللى ربنا غفر فيه لسيدنا ادم ذنب الشجرة..
🌿اليوم الثانى هو اليوم الذى استجاب ربنا فيه لدعاء سيدنا يونس عليه السلام وهو فى بطن الحوت ..
🌿اليوم الثالث هو اليوم الذى استجاب ربنا فيه لدعاء سيدنا زكريا وربنا رزقه بالابن الى كان نفسه فيه..
طيب معنى كدة ان اول تلات ايام للدعاء. . ادعى اوى من قلبك
🌿اليوم الرابع هو اليوم الذى ولد فيه سيدنا عيسى عليه السلام
🌿اليوم الخامس هو اليوم الذى ولد فيه سيدنا موسى عليه السلام ..
🌿اليوم السادس هو اليوم الذى فتح الله فيه لنبيه كل ابواب الخير..
التلات ايام دول ايام الرزق وايام الفرحه والمغفرة فأدعى ربنا يرزقك
ربنا يزقكم جميعا من عنده يارب..
🌿اليوم السابع هو اليوم الذى تغلق فيه ابواب جهنم فلا تفتح حتى تنتهى العشر ..
🌿اليوم الثامن هو يوم التروية ..
🌿اليوم التاسع وهو يوم عرفة من صام ذلك اليوم كان كفارة للسنة الماضية والسنة المستقبلية وهو اليوم الذى انزل فيه الله تعالى ( اليوم أكملت لكم دينكم) صدق الله العظيم.
🌿
اليوم العاشر وهو يوم العيد ويوم الأضحية ومن قرب فيه قرباناً كان كفارة لكل ذنوبه .وهيبقى يوم بدايتك بعون الله بعد انتهاء العشر ايام بإذن الله
🌿
اللهم بلغنا عرفة🤲♥️♥️♥️

29/04/2025

فى حاجة اسمها التربية الجنسية للاطفال .. دي قواعد عامة لو الأم اتبعتها بتفرق جدااااا مع الطفل....
لازم تأهلوا أولادكم إزي يتعملوا مع العالم الخارجي.....
١- الطفل من وهو بيبي الأم بس اللي تغيرله....
٢- التغيير في باب مقفول حتي لو مافيش حد....
٣- ممنوع تغير قدام حد او مكان مفتوح ..
٤- لو الأم مش موجودة الجدة اللي تغير اكبر حد سن فالأصغر والأصغر .. وبردك مكان مقفول ..
٥- من سن سنة ونص الطفل يبداء يشطف نفسة الام تعلمة يشطف نفسة وينظف منطقة العورة ازي ..وتقلل وضع يديها علي منطقة العورة في تنظيف الطفل ..
٦- مرحلة البوتي ترينج لازم باب التوالت يبقي مقفول او مردود عليهم مش تحط البوتي في الرسبشن والاوض غلط جداا
٧- تبداء تقول عيب لما يجي الطفل يرفع هدومة او يغير او يستحمي ولازم يتعود يرد الباب عليه ...
٨- ممنوع التقبيل من الفم منعا باتا الام والاب من الخد فقط او وباقي الافراد من اليد او الجبهه فقط ..
٩- مافيش حاجة اسمها طفل يقعد علي رجل حد ..ولو لازم يقعد يبقي يقعد بالجنب ظهرة للهواء مينفعش يقعد ظهرة في وش اللي قاعد غلي رجله ..
١٠- اول ما الطفل يبداء يتكلم ويدرك هنعيد عليه يوميا من السرة للركبة دي منطقة خاصة بيك انت بس مينفعش حد يشوفها ولا حتي ماما وبابا ..الدكتور بس اللي يشوفها لو انت عيان وماما وبابا يكونوا معاك ..ومينفعش خالص نشوفها عند حد نغمض عنينا عيب نشوف اي حد من السرة للركبة ...
١١- نربي عند الطفل ان لو حد بيرفع هدومة او عاوز يلمس المنطقة دي يقوله لاء عيب بصوت عالي جدا ..ولو مسمعش الكلام نصرخ ونقول عيب لاء لاااااء ونزعق جدا .ونقول بسرعة لأي حد كبير موجود ماما بابا المدرسة الدادا ..
١٣- لو الطفل في حضانة دادة وحدة بس المسؤلة عن دخوله التوالت او تغيرله مش كل يوم دادة شكل ..
١٤- يتنبه غلي الحضانة او المدرسة تأكد عليه من السرة للركبة منطقة خاصة بيا مينفعش حد يشوفها او يلمسها مينفعش حد من اصحابي يدخل معايا التوالت مينفعش الاطفال يعملوا قدام بعض او يلبسوا قدام بعض حتي لو نفس النوع ...
١٥- ممنوع منعا باتا الاخوات يستحموا مع بعض من غير مايوه حتي لو نفس النوع...
١٦-مينفعش اسبهم في البانيو من غير مايوه لو الاب والام هيفضلوا داخلين خارجين علي الطفل ..
١٧- مافيش حاجة اسمها اجبر ابني او بنتي يبوس فلان عشان ضيف اواغصبة ان حد يبوسة قدامي .. السلام اساسا بالايد مافيش حاجة اسمها بوس وبالعافية ...
١٨- طبعا التفريق في المضاجع لازم يبقي للطفل سرير من وهو صغير مينمش مع الاب والام... وطبعا مينفعش اخوات يناموا جنب بعض ..ايان كان عمرهم حتي لو نفس النوع ..ولو كان ضيق الحال ولازم يناموا علي نفس السرير يبقي لكل واحد الغطا الخاص به ...
١٩- اهم نقطة اللي هي الاساس اي ام واب بيجبروا اولادهم علي الطاعة العمياء.. ويجبرهم علي انهم يسمعوا الكلام من غير مايفهموا الاسباب او يضربوهم ويجبروهم علي سماع الكلام ولو اعترض الطفل واتكلم بيزودوا الضرب او العقاب ..مع الاسف انتوا كدا بتسلموا ابنكوا او بنتكوا لاي متحرش بتسلبة كرامته وحريته فبيبقي مباح اي حد يتعدي عليه ومش هيقدر يقاوم ولا حتي يشتكي لانه لو اشتكي هيتعاقب زيادة زي ما عودتوه ..دا غير انه اصلا فاقد الثقة فيكم وفاقد الامان منكم فمش هيجي يحكلكم اتعمل فيه ايه ..ادو مساحة ليهم عشان يعترضوا ويدفعوا عن حقهم ادوا مساحة ليهم امان يشتكوا وتنصفوهم .
تعود الطفل من الصغر بيربي حياء وبيعرف الطفل حقوقة وانه مش مباح لاي حد غريب او قريب او حتي الاب والام وانه كيان ليه حرية الاعتراض ..
ابحثوا عن التربية الجنسية للاطفال هتلاقوا معلومات كتيرة مفيدة بسيطة جدا بس بتفرق جداا في التربية ...
يا رب تكون الرسالة وصلت ...

منقوووووول

29/04/2025

يا ميس في حاجه عايز احكيلك عليها ...
قول يا ياسين في ايه بسرعه ..
ميس انااا انااااا
قول يا ياسين خلص في ايه ياحبيبي حد ضربك من زمايلك ف الكلاس
لاءءء هو في حاجه عايز احكيلك بس عليها

في هنا عمو كبير اوي كده تخييين وعجوز واقرع لابس نضاره هو مدير باين او مدرس هو مش بيدينا ف الكلاس هو
اسمه عمو ناصر...
ماله ايوه مستر ناصر ماله يا ياسين......
الناني اخدتتي من ايدي من الكلاس وقالتلي تعالي ادخل التواليت مع اني مكنتش عايز يا ميس بس هي أصرت تاخدني تدخلني التواليت مش عارف ليه ودخلتني التواليت وعمو ناصر كان جوه سلم عليا واخدني جوه وهي طلعت سابتنا لوحدنا وهو راح قلعني البنطلون
وعمل كذا وكذا وكذا ........
وشدلي شعري قطعه ف ايديه....
وضربني جامد عشان مصرخش .....
ضربني جامد اوي اوي لحد ما رجعت من الضرب
وعمل حاجات مش فاهم هي ايه بس كنت بتألم جااامد اوي ومش عارف حتي اعيط من أيديه الي كانت علي بوقي وبعدين طلع وسابني مرمي ودخلت الناني شطفتني ولبستني هدومي وغسلتلي وشي وقالتلي لو حكيت ل بابا وماما الي حصل عمو ناصر هيق **تلهم
وانت عملت ايه قولتهم
لا يا ميس مقولتش
وكل يوم الناني تيجي تاخدني مره التواليت مره الجراج الي ورا المدرسه وتفضل واقفه مستنياني عشان تغسلي وشي وتلبسني بنطلوني وترجعني الكلاس
المهم حكيت لماما وبابا
لا ياميس خفت عمو ناصر يقت **لهم او يعمل فيهم زي مابيعمل فيا مش عايزهم يتوجعو نفس الوجع الي بتوجعه ده وجع جااااامد اوي ياميس مش بعرف اعمل بيبي خالص بعد الوجع ده وبفضل اعيط كتيير

شاطر يا ياسين انك محاكتش لماما وبابا ...
هخلي الميس المديره تديك عصايا تضربه بيها اه اه وهخليه ميعملش فيك كده تاني
وعد ياميس
وعد يا ياسين
وبعدين ...
سابت ياسين يتعرض لنفس الحادثه مرارا وتكراراااااااا
وعاشت كلت وشربت وضحكت ونامت عادي
متخيلين ...
تعدييييييل

الميس اللي مفيش فقلبها ذره رحمه شهدت زور علي الطفل قدام وكيل النيابه و قالت ياسين ما قاليش حاجة و ده طفل مش طبيعي أصلا و هو طفل طبيعي مليون الميه هو بس كان خايف و مرعوب ربنا ينتقم منها

09/04/2025

"عناد الطفل في عمر السنتين والتلاتة مش عناد… ده احتياج!"

كتير من الأمهات بيشتكوا وبيقولوا:
"ابني عنيد"، "مش بيسمع الكلام"، "بيتعبني في كل حاجة"،
خصوصًا في سنّ السنتين والتلاتة.

بس الحقيقة اللي لازم نفهمها:
في السن ده، الطفل مش عنيد… الطفل طبيعي جدًا!

ليه؟
علشان في المرحلة دي الطفل بيبدأ يكتشف إنه شخص مستقل، عنده "رغبة"، وعنده "رأي"، وعنده "كلمة".
بيقول "لأ" كتير؟
ده مش عناد، ده تمرين على الاستقلال.

فين المشكلة؟
المشكلة مش في الطفل…
المشكلة في إننا كأمهات ساعات بنغلط من أول يوم:

بنشيله طول الوقت من غير ما نعلمه إن في وقت للراحة ووقت للحب.

بننفذ كل طلباته علشان يسكت أو يرضى.

بنجري على أي زنّ أو صريخ بدل ما نعلمه يعبر بالكلام.

ولما يبدأ يضرب، بنضحك أو بنسكت، وبعد شوية نقول "اتعود يمد إيده".

إيه اللي بيحصل؟
الطفل بيكبر وهو فاكر إن كل حاجة لازم تمشي بكلمته، وإن الزعل أو الزنّ أو الضرب بيوصله للي عايزه.
وبعد كده لما نبدأ نقول "لأ"، بيبان إنه عنيد… لكنه في الحقيقة مش متعود يسمع "لأ".

الحل؟
نبدأ من دلوقتي:

1. نحط حدود بسيطة وواضحة.
مش كل حاجة تنفع، ومش كل وقت للعب.

2. نكون ثابتين في ردود أفعالنا.
"لأ" النهارده تبقى "لأ" بكرة.

3. نعلم الطفل يعبر عن نفسه بالكلام، مش بالزنّ أو الضرب.

4. نمدحه لما يعمل سلوك كويس، ونتجاهل الزنّ لما يكون وسيلة ضغط.

5. نصبر… ونفضل نكرر نفس الكلام بهدوء، لأن التعلم في السن ده بالتكرار.

والمهم جدًا: ما نحسش بالذنب، وما نقولش "فات الأوان".
التغيير ممكن في أي وقت، بس محتاج صبر واستمرار.

23/02/2025

_إيه اللِ إنتِ بتقوليه ده..!
عايزاني أرمي أُمي في الشارع بعد كُل العُمر ده..!
-ياحبيبي ،يانور عيني مين قال بس إنك هترمِيها في الشارع كده.
_أُمَال بتسمي ده إيه بقىٰ إن شاء الله..؟

-مأوى، يعني بيت برضو، و هيكون مُتوفِر ليها كُل شيء.
_ده إسمُه دار مُسنين، يعني للنَاس اللِ ماعندوهمش أبناء تِراعيهُم، ومفيش ليِهم مكان حتىّ يباتوا فيه علىَ الأقل، وغيره وغيره من الأسباب القاسية اللِ بتجبرهم علىَ وجودهم هِناك..

-يعني إيه أخرة الكلام ده؟
_يعني أُمي، وتاج رأسي وراسك هتفضل موجودة هِنا في البيت ده، معايا طول العُمر إن شاء الله.

-وأنا مش هقُعد في البيت دقيقة واحدة علىَ بعضها طول ماهي فيه.
_مع ألف سلامة.

أُمي..!
تعالي إرتاحي هِنا، إنتِ إيه بس اللِ قومِك من سريرك..؟

-أنا سمِعت كُل حاجة يا ابني، ومراتك عندها حق.
_حق إيه جتها كسر حُقها، بقىٰ بعد كُل اللِ عملتيه علشاني رد الجميل إني أرميكِ يا أُمي..!

-إنت إبني، وحبيبي بعد أبوك الله يرحمه، وكُل حاجة عندي.
بس أنا مش عايزاك تسيبني، أنا معرفش حد غيرك في الدنيا دي، ماتسبنيش أتبهدل وأنا في أخر أيامي.
_بعد الشر عليكِ.
ده أنا لو مش هلاقي أُكل عُمري ماهفرط فيكِ، والبعدين كُل الخير اللِ أنا فيه ده بسبب مين بعد ربنا، ماهو بسبب دعائك ورضاكِ عليا والله.

-طب ومراتك، وعيالك دول؟
_سيبي كُل حاجة علىَ ربنا، أهم حاجة تقومي إنتِ ترتاحي شوية.
-ربنا يخليك ليا يا ابني، ويبارك فيك، ويُرزقك يارب.
_يارب يا أُمي، يارب.

عده إسبوع، وأنا ولا سألت عليها، ولا حتىّ رنيت..
- مازن يا ابني، مش هتروح تجيب مراتك بقىٰ، دي بقالها إسبوع عند أهلها وإنت ما سألتش عليها.
_ولا هسأل يا أُمي.

-ليه بس كده يا ابني، علشان خاطر عيالك، وعلشان خاطر الحمل اللِ بقىٰ تقيل عليك ده من الشُغل للبيت، وكمان العيال وأنا حِمل عليك لوحدي.
_هنتكلم في نفس الكلام تاني برضو؟

-خلاص وحياة غلاوتي عندك، لو ليا عندك غلاوة تروح تجيبها.
_طبعًا ده غلاوتك حاجة كبيرة جدًا عندي، وبكره إن شاء الله هروح علشان خاطرك بس.
-ربنا يِصلح مابينُكم يارب.

روحت تاني يوم، وكُله بس علشان خاطر أُمي طبعًا.
وصلت البيت عند أهلها، وكانت مُقابلتهم ليا مش لطيفه خالص، وطلبت مِنها قُدام أهلها إنها ترجع معايا، علشان البيت والأولاد.
طريقتها في الكلام معجبتنيش من الأول.

_من الأخر كده هتروحي معايا، وأنا بنفسي جيتلك لحد بيت أهلك؟
-شرطي يا أنا يا أُمك في البيت.

_يبقىٰ أُمي، وفوق كُل شيء كمان.
وخليكِ عند بيت أهلك، و ورقتك هتوصلك لحد البيت كمان.
اه، ونسيت أقولك حاجة أخيره السبب اللِ جابني علشان أرجعك البيت برضو هي أُمي، شوفتي بقىٰ..!
طلعت من البيت وأنا لو إيه مش هفرط في جُزء واحد بس من أُمي، حتىّ لو كان علشان مراتي.
فضِلت تنده عليا.
وأنا خلاص قررت كُل شيء في الوقت ده.

-ها عملت إيه يا ابني؟
_هطلقها، قررت أطلقها وكُل حاجِتها هتوصلها في أقرب وقت مُمكن.
-يالهوي ،ليه بس؟

_دي واحدة طلبت مني أتخلىٰ عنِك، وده مش هيحصل أبدًا.
-بس يا مازن..
_أنا خلصت كلام لحد كده.

-الو.. أستاذ مازن كُل أوراق الطلاق جاهزة، وناقص إمضيت حضرتك.
_تمام ،أنا شوية وهكون عندك.
-مش حابب تراجع نفسك في الموضوع، وتتصالحوا يمكن ترجعوا..!

_لو كان فيه أمل، ولو واحد في الميه بس أنا اللِ كِنت همسك فيه، لِكن مفيش أمل.
-تمام، إتفضل وقع علىَ الأوراق، وأنا إتواصلت مع المُحامي بتاع المدام وهي مش عايزه الأولاد.

_كويس، مع العلم إني ماكُنتش هفرط فيهُم أبدًا.
تمام كده..!
ولا باقي أي حاجة تانيه؟

-لأ، كُل شيء كده تمام، وانتهىٰ.

_تمام ،مع السلامة.
-مع السلامة.

عدت الأيام، والشهور..
وبعد تلات شهور بالضبط، كان ربنا رزقني بزوجة كويسه جدًا معايا في الشُغل، وأهم من ده كُل إنها بتحترم أُمي وشايلها علىَ كفوف الراحه، وكُل الأمور بقت كويسه الحمد لله.

-يا ابني أقُعد إنت بقىٰ، أنا مش ناقصني حاجة، و حتىّ بعد ما اتجوزت بتخدمني برضو.
_ده أنا أخدمك بعيوني يا جميل إنت العُمر كُله.

ضِحكت، وكأن الدنيا كُلها ضحكت لي معاها.

"ولو تخلىٰ عنكِ الجميع، فلن أتخلىٰ عن قطعة حَملت رَوحي، ويميلُ الجميع، ولا يميلُ كَتِفَ أُمي.."

بقلم.. حنان عبدالله. ♥️🦋

اتمني القصة تعجبكم واشوف اجمل تفاعل
وياريت تدعمني وتعمل متابعة للصفحة من فضلك منقوووول

21/02/2025