17/04/2020
نفسي أعرف مين أول واحد أخترع إن الصيام غرضه أننا نحس بالفقراء
وقرر يعلم كل الاجيال الفكرة الغريبة دى !!!
جابها منين طيب ...
قال الله تعالى فى كتابه الكريم
﴿يَا أَيُّهَا الَّذِينَ آَمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ ﴾
مفيش حاجة بتقول عشان نحس بالفقراء ..
وأى طفل لما هتقول له كده .. هيقولك طب يعنى الفقراء مش بيصومو ا!!!!
طب عمرك أنت ما سالت نفسك السؤال ده !!
بجد لازم نبطل نعلم عيالنا الكلام ده ..
الفكرة دى بتطلع جيل شايف الصيام مجرد جوع وعطش وخلاص و ده اللى بوظنا ..
رمضان ورا رمضان ماحدش مركز فى الهدف الرئيسي ..
علم ولادك إن ربنا كتب علينا الصيام عشان نمرن النفس الأمارة بالسوء إنها تقول لأ للمعاصى وشهوات الدنيا ...
خلانا مجبرين إننا نمتنع عن الحلال بأمره بدون سؤال أو نقاش عشان يبقى سهل علينا بعد كده إننا نقف للحرام ونقول له لأ
الغرض الاساسى من الصيام هو التقوى ثم التقوى ثم التقوى
الصيام بالذات من أكتر العبادات اللى تحقق التقوى والاستسلام لله و ده لأننا بنمنع نفسنا من حاجات حلال فقط طاعة لأوامر الله .. هى مش مثلا غلط أو ضارة .. إنما هى حلال مطلق وهذا منتهى الاستسلام لله عز وجل
صيام رمضان طاعة تخلو من الرياء ..
كل الناس صايمة .. يعنى أنت مش بتعمل حاجة كبيرة أكتر من غيرك فتفرح بنفسك ..
قَالَ رَسُولُ اللَّهِ صلى الله عليه وسلم:
إِنَّ اللَّهَ عَزَّ وَجَلَّ يَقُولُ إِنَّ الصَّوْمَ لِى وَأَنَا أَجْزِى بِهِ
إِنَّ لِلصَّائِمِ فَرْحَتَيْنِ إِذَا أَفْطَرَ فَرِحَ وَإِذَا لَقِىَ اللَّهَ فَرِحَ
وَالَّذِى نَفْسُ مُحَمَّدٍ بِيَدِهِ لَخُلُوفُ فَمِ الصَّائِمِ أَطْيَبُ عِنْدَ اللَّهِ مِنْ رِيحِ الْمِسْكِ.
