02/07/2025
Nos últimos días achegouse á tenda moita xente pedindo consello para adentrarse no debuxo ou na pintura e fainos inmensamente felices, agora máis que nunca. Nun momento no que non paran de intentar vendernos a IA por todas as frontes, vemos que a necesidade de crear non esmorece. E queremos insistir na palabra *necesidade* porque así é: a creatividade non se pode conter. Creando expresámonos, entendémonos, cumunicámonos e tecemos redes que nos sosteñen. Cando entendemos isto é sinxelo concluír por que hai tanto interese en destruir esta parte fundamental da nosa humanidade.
Se tes a sorte de ser das persoas que poden parar un pouco no verán, é unha época marabillosa para asomarse a este mundo. Cambian os ritmos, hai menos présas e podemos pararnos a observar o noso entorno.
Nós estaremos felices de axudarvos a escoller material e acompañarvos nos avances. Sempre insistindo na importancia de disfrutar os procesos e non deixar que a obsesión polo resultado perfecto nos paralice.
Pola nosa parte tamén baixamos un pouco o ritmo, descansamos os sábados e pechamos uns días na primeira quincena de agosto. Entrementres, sabede que sempre vos agardamos aquí ☺️
