მე ვარ ნინი, მოყვარული მზარეული და ფერმერი. კულინარიით ჩემი გატაცება ძალიან პატარა ასაკიდან დაიწყო. 4 წლის ვიყავი როდესაც ბებაიმ პირველად პატარა წინსაფარი შემიკერა. იმ წინსაფარს რომ გამიკეთებდა, მთავარი ამბავი მერე იწყებოდა. მას მერე დიდი სიყვარულით ვინახავ, ჩემში საოცარ მოგონებებს აღძრავს. ბებიამ პირველად ბაზარში რომ წამიყვანა, პროდუქტის არჩევამაც კი საოცარად დამაინტერესა, მაშინ პროდუქტებს ვხატავ
დი, ჩემებურად ვწერდი რეცეპტებს.
ყველაზე მეტად მიყვარს ჩემი ბაღჩაში მოყვანილი ჯანსაღი პროდუქტით კერძის მომზადების პროცესი, რომელსაც თან ახლავს ძალიან საინტერესო - მოლოდინის ფაზა. როდესაც იცი რომ ახლა გამზადდება რაღაც ძალიან გემრიელი. ბედნიერებაა როდესაც შეგიძლია გემრიელი კერძით დააპურო საყვარელი ადამიანები. ამაზე კარგი რა უნდა იყოს?
დავიბადე და გავიზარდე თბილისში, მაგრამ ჩემი ბავშვობის ყველაზე ტკბილი მოგონებები მაინც სოფელს უკავშირდება, რადგან ზაფხულის ყველაზე გემრიელ არდადეგებს ბებიასთან ვატარებდი. ბავშვობის მერე ბევრი წელი გავიდა, მაგრამ არასოდეს გამნელებია სოფელში დაბრუნების სურვილი და სულ მენატრებოდა ქვის კეცის ხაჭაპური, ამოლესილი ლობიო, სუფთა ჰაერი, სოფლის ხის სახლის სუნი და ღია ჭიშკრები.
ამიტომაც, როგორც კი მომეცა შესაძლებლობა რაჭაში აღგვედგინა წინაპრების სახლი და ეზო, ვენახი და ბაღი, სიხარულით დავუბრუნდი ამბროლაურის რაიონის სოფელ ბაჯს, სადაც დავიწყე ჩემი იდეებისა და ოცნებების განხორციელება. პირველ რიგში გავაშენე უძველესი და უნიკალური რაჭული ვაზის ჯიშების ვენახი და ასევე ბოსტანი, სადაც მომყავს რამდენიმე ბოსტნეული და ბაღჩეული კულტურა.
ჩემი ფერმერული არჩევანი კი, გარკევულწილად განაპირობა კულინარიისადმი ჩემმა სიყვარულმა და ამ მხრივ სამზარეულო კონკურსებში მონაწილების გამოცდილებაც მაქვს. (მათ შორისაა სატელევიზიო გადაცემა ‘’მასტერშეფი’’ რომლის ნახევარ ფინალის ეტაპის მონაწილეც ვარ).
სწორედ ამ გამოცდილებამაც მიკარნახა ფერმერობის სურვილი და არჩევანი, რადგან მიმაჩნია რომ საუკეთესო სამზარეულო და კულინარია პირდაპირ კავშირშია სოფლის მეურნეობასა და ფერმერობასთან, რომელიც ჩემი ცხოვრების მთავარი აზრი და ნაწილი გახდა.
რაც შეეხება ჩემს პარარელურ სამსახურს, ვმუშაობ ასოციაცია საქართველოს SOS ბავშვთა სოფელში, სპონსორშიპის პროექტის მენეჯერად. ჩვენი ერთ-ერთი მნიშვნელოვანი მიმართულება არის ალტერნატიული ზრუნვის მიწოდება მზრუნველობა მოკლებული ბავშვებისთვის. მთელი გულით მიყვარს ეს საქმე და მიხარია, რომ კეთილ საქმეს ვემსახურები. მახარებს ისიც, რომ მალე ჩვენს აღსაზრდელებს შევასწავლი ბაღ - ბოსტნის გაშენებას და კერძების მომზადებასაც.
მიუხედავად ტექნოლოგიური პროგრესისა და იმ პროცესებისა, რომელიც ცვლის მსოფლიოს და საქართველოსაც, მიმაჩნია რომ ჩვენი ქვეყნის მრავალსაუკონოვანი და სასიცოცხლოდ მნიშვენლოვანი ფენომენი არის მიწა, სოფლის მეურნეობა, ფერმერობა და კულინარია.
ამიტომაც გავაკეთე ეს არჩევანი...
კეთილი სურვილებით,
ნინი
