ireallycookthis

02/08/2024

01/08/2024

叻❤️

25/01/2023

祝大家兔年大吉！🐰🧧
大年初四整個牛奶燉燕窩潤一潤，準備迎接初五開工～🥲
#兔年行大運 #恭喜發財

14/05/2022

【惹味泰式生菜包】
落雨天陰咗好多日，幾時先好天😩今日好想食啲濃味野，整個泰式生菜包做午餐😋😋食譜後補🙊
-————
準備時間: 10分鐘
煮食時間: 15分鐘
#生菜包 #泰式生菜包 #泰國

29/04/2022

【溏心麻藥蛋】
準備連放3日假，整定一大盆溏心麻藥蛋同屋企人朋友一齊食😍😍話説呢味嘢同坦仔一樣，真係會令人食上癮🫢
#麻藥蛋 #溏心蛋 #食譜

05/04/2022

【消暑玫瑰糟鹵醉雞翼】
相信雞翼係好多人嘅comfort food，剛剛踏入春夏，試下整呢個清涼、甜甜地又爽口嘅醉雞翼，15分鐘搞掂超易整！今次唔用常見嘅花雕酒，改用糟鹵+玫瑰露，味道仲香過花雕！建議一次過整返二、三十隻放雪櫃，就可以慢慢食☺️

(但不建議一個人獨食幾十隻🤣)
-————
準備時間: 5分鐘
煮食時間: 10分鐘
材料: (3-4人份量)
1. 無激素雞翼2磅(15-20隻）
2. 鹽 1.5湯匙
3. 生薑 5片
4. 一大盆冰 約20-30粒
5. 乾杞子 20g

醉雞汁:
1. 糟鹵 1枝 (500ml)
2. 玫瑰露酒 50ml
3. 魚露 20ml
4. 冰糖 2小塊
5. 清水 200ml (煮冰糖用)
做法：
1. 將已經解凍的雞翼用冷水浸泡15分鐘，加入鹽去除雪味。杞子室溫水浸軟備用。
2. 清水加入冰糖，小火煮至冰糖完全溶解。備用。
3. 製作醉雞汁： 混合全部糟鹵、玫瑰露酒、魚露、冰糖水，倒入大玻璃瓶/玻璃盒，加入杞子，備用。
4. 雞翼汆水: 冷水放雞翼，加薑片，小火慢煮至水面起泡，即污穢物、血水浮面。撈起雞翼。同樣步驟可再做一次。
5. 將已煮熟的雞翼放冰水浸泡至冰塊完全溶解，以收緊雞皮雞肉至爽口。
6. 用廚房紙巾印乾雞翼水份，幫助之後浸泡時容易入味。
7. 將所有雞翼放入有醉雞汁的玻璃瓶/玻璃盒，浸泡最少3小時以上(最好過夜)。
8. 完成！
#醉雞翼 #醉雞 #食譜

19/03/2022

【香蒜橄欖油海鮮炒意粉】
呢兩日條街多返人，似乎大家已抗疫疲勞😂 仲努力緊或者隔離緊嘅朋友唔好灰心，如果同我一樣食中餐食到悶 ，不如轉下口味，整個簡單又好味到不得了嘅意粉，食飽先繼續有力抗疫💪🏼😚
-————
準備時間: 5分鐘
煮食時間: 15分鐘
材料: (2人份量)
1. 急凍海鮮300克
2. 蒜頭 4-5瓣
3. 辣椒1條
4. 意粉 200-300克
5. 煮食用純橄欖油 （不須淋沙律用的特級初搾橄欖油）
6. 海鹽 適量
7. 黑椒碎 適量
做法：
1. 解凍急凍海鮮，用海鹽、黑椒醃5-10分鐘。
2. 大火煲水，落少許鹽，意粉煮7-8分鐘至爽口狀態（al dente) 不要太稔身。撈起備用。留意粉水備用。
3. 蒜頭、辣椒切片備用。
4. 海鮮汆水，用大火滾水煮3-5分鐘至水面有泡。撈起備用。
5. 凍鍋落多點橄欖油。加入蒜片及辣椒片，小火炒香(不可用中/大火，蒜片好快會燶)。
6. 加入海鮮及意粉，轉大火炒匀。期間加入一勺意粉水，令乾身意粉容易散開。加入鹽及黑椒調味。
7. 如喜歡香草，可加入切碎蕃茜或羅勒。也可不加香草。完成上碟。
#香蒜海鮮意粉 #橄欖油 #意粉 #義大利麵

13/03/2022

【港式沙爹牛肉麵】
趁放假整定聽日個早餐先！疫情關係好耐無去茶餐廳喇，真係好掛住我最愛嘅沙爹牛麵🙈🥺🥺移咗民嘅朋友都可以學下整，解下思鄉病😉

(時間關係，唔教煎蛋同煮麵😂)
-————
準備時間: 25分鐘
煮食時間: 15分鐘
材料: (3-4人份量)
1. 牛肉800克
2. 乾葱頭 2粒
3. 蒜頭 3瓣
4. 沙爹醬 3湯匙
5. 花生醬 2湯匙

牛肉醃料:
1. 豉油 2湯匙
2. 糖1.5湯匙
3. 生粉2湯匙
4. 梳打粉 1湯匙
做法：
1. 牛肉切片後浸水5分鐘去除血水，瀝水備用。
2. 將所有醃料混合，倒入牛肉片中，拌勻，放置20分鐘入味。
3. 多油落鑊，將醃好的牛肉用中小火略略煎香，不須全熟。
4. 盛起煎過的牛肉備用。
5. 乾葱頭、蒜頭切碎，少油落鑊炒香。
6. 順序加入沙爹醬及花生醬炒匀料頭。
7. 牛肉回鍋快炒。
8. 加入滾水至水位剛蓋過牛肉，加入少量鹽調味，加入老抽調色。煮至醬汁收水，完成！
#沙爹牛肉 #茶餐廳 #港式

09/03/2022

⚠️緊急提示，3月9日氣溫25度，相對濕度64%，天氣乾燥。大家要飲夠水，煲下潤肺湯水都唔錯。切勿食煎炸食物食到喉嚨痛，多謝各位市民配合。

07/03/2022

【港式蕃茄湯餐肉通粉】
WFH 要自己整早餐，可以前一晚用10分鐘煮定個蕃茄汁膽，就日日都有得食熱辣辣嘅茄湯通粉😍轉公仔麵仲唔駛+$3 😂
-————
準備時間: 5分鐘
煮食時間: 10分鐘
材料: (2人份量)
1. 通心粉一碗約300克
2. 午餐肉半罐 (建議用口感豐富的火腿豬肉)

蕃茄湯材料:
1. 新鮮蕃茄1個
2. 茄膏1湯匙
3. 茄汁3湯匙
4. 香草蕃茄意粉醬 200g
5. 清雞湯250ml
做法：
1. 將新鮮蕃茄及午餐肉切粒，備用。
2. 午餐肉粒4邊煎至金黃色，備用。同時清水加少鹽，大火煮通心粉6-8分鐘。
3. 乾鍋中火落油，新鮮蕃茄粒中大火炒熟，再加入茄膏炒香。
4. 順序加入雞湯、香草意粉醬及茄汁，煮滾。(如只做茄汁膽，則不用加雞湯。)
5. 加入已煮熟的通心粉攪匀煮滾，再煮2-3分鐘。可根據個人鹹淡口味加入熱水。
6. 上碟，完成！

01/02/2022

🧨🧧恭喜發財！🧧🧨 同大家拜個年，希望虎年肺炎bye-bye ，大家食得是福、食極唔肥！仲有好人一生平安🙏🏼🐯🐯🐯

#恭喜發財

31/01/2022

【自家製脆皮燒豬腩仔】
今晚食團年飯，想斬個料加餸都唔駛落街，只要花少少心機自己整，焗半個鐘就搞掂！分享食譜俾大家，啱哂過年期間留喺屋企搵啲嘢搞下🤣🤣順便祝大家虎年身體健康，龍精虎猛！ 🐯🐯🐯
-————
準備時間: 30分鐘
煮食時間: 25-30分鐘
材料: (3-4人份量)
1. 豬腩仔一件(約800g)
2. 花椒、八角、香葉 少許
3. 白醋 3湯匙
4. 粗鹽 3湯匙

醃料:
1. 五香粉 1茶匙
2. 幼鹽 1茶匙
3. 玫瑰露酒 1湯匙
做法：
1. 冷水加花椒八角煮至大滾。加入已洗乾淨的豬腩仔，中小火煮10分鐘至豬皮熟透。
2. 夾起豬肉，在豬皮面用叉子拮小孔(盡量拮入少少），幫助之後焗豬腩時豬皮做到鬆脆而不裂開。
3. 所有醃料拌匀。在豬肉一面用刀輕輕𠝹幾刀，搽上已拌匀的醃料。
4. 用錫紙包裹豬肉的左、右及底部，豬皮一面無需包住。豬皮印乾水份，掃上白醋，靜置風乾至少2小時(或可放置雪櫃一晚)。
5. 在風乾後的豬皮上舖上一層薄薄的粗鹽醃30分鐘。
6. 預熱焗爐160度15分鐘。把豬腩焗5-10分鐘，進一步抽乾豬皮上的水份，取出並刮去豬皮上多餘的粗鹽。
7. 豬腩皮搽薄薄一層油 ，放回焗爐以220度高溫焗25-30分鐘。
8. 時常觀察豬腩，如豬皮已焗至全部爆開，即可取出，以免焗燶。否則可再焗5分鐘。
#脆皮燒肉 #燒肉 #港式燒味