09/08/2026
好多人問我點解我啲香貴過人地。
因為我堅持香港製造、請香港本地員工、起香港入優質藥材、起香港交租。為乜？就係守住香港嘅價值。
法句經121‧莫輕視惡行，以為「小惡不會為我帶來果報」；如同滴水能注滿水瓶，愚人累積小惡至罪惡滿盈。
每一個地方都應該要有自己製造嘅野。一味淨係睇價錢買外地製造嘅野，其實都係將自己地方貶值緊。方便、就手背後嘅代價？當年將最先進嘅工業技術拱手相讓，如今一蹶不振？因為連你自己人都覺得自己嘅野無價值，你覺得呢個世界嘅人又點解會睇得起你？最可怕係集體失去對因果嘅覺知做成一個不能逆轉嘅“共業”。
香港呢個地方有無價值，係由我地自己創造，從來唔係人地賦予，或者人地賦予左就自動有價值。如果你係創造到價值，人地自然多多錢都肯買。
曾經香港馳名國際，係因為我地有好多有質素嘅產品。自己人唔撐自己經濟，呢個地方只會越來越窮，越來越無價值。
香港以香為名，我十年前就決心保育返我地個名，因為我起呢度出世，呢度係我屋企。
法句經122‧莫輕視善行，以為「小善不會為我帶來果報」；如同滴水能注滿水瓶，智者累積小善至福德滿盈。
我地應該主宰返自己屋企而唔係外人主宰。本地經濟無左，就呢個地方就無左生存機會。有權利背後永遠被忘記嘅係義務。唔係淨係齋拿著數，我會自問我為呢度做過啲咩。我地必須要團結，必須要覺醒，保衛自己嘅城市，守護自己嘅名聲。如果我地每個人都堅守到，可能仲有一條生路～～～
不論如何 do what we should do ～～～
at least 我無後悔我曾經為自己堅持嘅價值努力過。
