20/08/2026
കേരളത്തിലെ അതിശക്തമായ മഴയും ഈർപ്പവും നമ്മൾ പണിയുന്ന സ്വപ്നഭവനങ്ങൾക്ക് ഭീഷണിയാകാതിരിക്കാൻ നിർമ്മാണ ഘട്ടത്തിൽ തന്നെ മുൻകരുതലുകൾ എടുക്കേണ്ടതുണ്ട്.
മഴയെ പ്രതിരോധിക്കുന്ന ഒരു വീട് പണിയുമ്പോൾ ശ്രദ്ധിക്കേണ്ട പ്രധാന കാര്യങ്ങൾ ചുവടെ പങ്കുവെക്കുന്നു:
അടിത്തറയിലെ ഈർപ്പം തടയാൻ Damp-Proof Course (DPC):
മണ്ണിൽ നിന്നുള്ള ഈർപ്പം ഭിത്തികളിലേക്ക് അടിച്ചുകയറുന്നത് (Capillary Action) തടയാൻ തറപ്പണി (Plinth level) കഴിയുമ്പോൾ നിർബന്ധമായും നല്ല നിലവാരമുള്ള ഡാംപ് പ്രൂഫ് കോഴ്സ് ചെയ്യുക. ഇതിനായി കൃത്യമായ അനുപാതത്തിലുള്ള കോൺക്രീറ്റും അതിൽ വാട്ടർപ്രൂഫിംഗ് ലിക്വിഡും ചേർക്കുന്നത് ഭാവിയിൽ ഭിത്തികളിലെ പെയിന്റ് അടർന്നുപോകുന്നതും പൂപ്പൽ പിടിക്കുന്നതും തടയും.
മേൽക്കൂരയും കോൺക്രീറ്റ് സംരക്ഷണവും:
ഫ്ലാറ്റ് റൂഫുകളാണ് ചെയ്യുന്നതെങ്കിൽ കോൺക്രീറ്റിംഗ് സമയത്ത് തന്നെ വാട്ടർപ്രൂഫിംഗ് അഡീറ്റീവുകൾ ഉപയോഗിക്കുക. കോൺക്രീറ്റ് കഴിഞ്ഞ് മതിയായ സ്ലോപ്പോടു കൂടി പ്ലാസ്റ്ററിംഗ് നടത്തുകയും നല്ലൊരു വാട്ടർപ്രൂഫിംഗ് കോട്ടിംഗ് നൽകുകയും വേണം.
സാധ്യമെങ്കിൽ ട്രസ്സ് വർക്ക് ചെയ്ത് ഓടോ ഷീറ്റോ മേയുന്നത് വീടിനുള്ളിലെ ചൂട് കുറയ്ക്കാനും മഴവെള്ളം നേരിട്ട് വീഴുന്നത് തടയാനും സഹായിക്കും.
ഭിത്തി നിർമ്മാണവും പ്ലാസ്റ്ററിംഗും
ചെങ്കല്ല്, കോൺക്രീറ്റ് കട്ടകൾ എന്നിവ ഉപയോഗിക്കുമ്പോൾ അവയുടെ ഇടയിലെ ജോയിന്റുകൾ കൃത്യമായി സിമന്റ് ഉപയോഗിച്ച് അടയ്ക്കണം.
പുറംചുവരുകൾ പ്ലാസ്റ്റർ ചെയ്യുമ്പോൾ സിമന്റ് മിശ്രിതത്തിൽ വാട്ടർപ്രൂഫിംഗ് കെമിക്കൽ ചേർക്കുന്നത് വെള്ളം ഇറങ്ങുന്നത് തടയും.
പുറംചുവരുകളിൽ മികച്ച ക്വാളിറ്റിയുള്ള എക്സ്റ്റീരിയർ എമൽഷൻ ഡാംപ് പ്രൂഫ് പെയിന്റുകൾ മാത്രം ഉപയോഗിക്കുക.
ജനലുകളും വാതിലുകളും തിരഞ്ഞൈടുക്കുമ്പോൾ:
മഴവെള്ളം നേരിട്ട് അടിക്കാൻ സാധ്യതയുള്ള ഭാഗങ്ങളിൽ ജനലുകൾക്ക് മരത്തിന് പകരം Steel, Aluminium, WPC, UPVC പോലുള്ളവയും വാതിലുകൾക്ക് നല്ല ക്വാളിറ്റിയുള്ള Steel, FRP, WPC എന്നിവ പോലുള്ളവയും ഉപയോഗിക്കുന്നത് ഈർപ്പം തട്ടി വാതിലുകൾ വീർക്കുന്നതും ചിതൽ പിടിക്കുന്നതും തടയാൻ ഉപകരിക്കും. ജനലുകളുടെ ഫ്രെയിമുകൾക്ക് ചുറ്റുമുള്ള വിടവുകൾ സിലിക്കൺ സീലന്റ് ഉപയോഗിച്ച് പൂർണ്ണമായും അടയ്ക്കണം.
സൺഷെയ്ഡുകളും വാട്ടർ ഡ്രെയിനേജും:
ജനലുകൾക്ക് മുകളിൽ മതിയായ വീതിയുള്ള സൺഷെയ്ഡുകൾ നൽകുന്നത് മഴവെള്ളം നേരിട്ട് ജനൽ ഗ്ലാസുകളിലേക്കും ഫ്രെയിമുകളിലേക്കും അടിക്കുന്നത് തടയും. സൺഷെയ്ഡുകളുടെ അറ്റത്ത് 'ഡ്രിപ്പ് മോൾഡ്' (Drip mould) നൽകാൻ മറക്കരുത്. അതുപോലെ മേൽക്കൂരയിൽ കെട്ടിനിൽക്കുന്ന വെള്ളം പെട്ടെന്ന് ഒഴുക്കി കളയാൻ തക്കവണ്ണം വലിയ ഡ്രെയിനേജ് പൈപ്പുകൾ കൊടുക്കുക.
വീടിന് ചുറ്റുമുള്ള ഡ്രെയിനേജ്:
വീടിന്റെ മുറ്റത്ത് വെള്ളം കെട്ടിനിൽക്കാൻ അനുവദിക്കരുത്. അടിത്തറയ്ക്ക് ചുറ്റും വെള്ളം തങ്ങിനിന്നാൽ അത് വീടിന്റെ ഘടനയെ തന്നെ ബാധിക്കാം. അതിനാൽ വെള്ളം സുഗമമായി ഒഴുകിപ്പോകാൻ പാകത്തിന് കൃത്യമായ സ്ലോപ്പോടു കൂടിയ ഡ്രെയിനേജ് സംവിധാനം ഒരുക്കുക.
നിർമ്മാണ സമയത്ത് എടുക്കുന്ന ചെറിയ ശ്രദ്ധയും ഗുണനിലവാരമുള്ള സാമഗ്രികളുടെ ഉപയോഗവും ഭാവിയിൽ വലിയ തുകയുടെ റിപ്പയറിംഗ് ഭാരത്തിൽ നിന്ന് നമ്മളെ രക്ഷിക്കും.
