03/01/2026
💖
2026 ට 26 ක් !!
1. මේ අලුත් අවුරුද්දේ ඔයා ඔයාට ආදරේ කරනවා. මේ අලුත් අවුරුද්දේ ඔයා ඔයා ගැන මුලින්ම හිතනවා. කිසිම කෙනෙක්ට ඔයාගේ මානසික සුවය නැති කරන්නට ඔයා ඉඩ දෙන්නෙ නැහැ. ඔයා ඔයාට හානියක් වෙන කිසිම දේකට එකඟ වෙන්නේ නැහැ.
2. මේ අලුත් අවුරුද්දේ ඔයා දෙයක් කියන්න කලින් තත්පර කිහිපයක් නැවතිලා හිතනවා ඒ දේ මේ තැනට සුදුසුයි ද කියන්න කියලා. මේ අලුත් අවුරුද්දේ ඔයා දෙයක් කරන්න කලින් දෙපාරක් නෙමෙයි තුන් පාරක් විතර හිතනවා ඔයා ඒ දේ කළ යුතුද කියලා. මේ අලුත් අවුරුද්දේ ඔයා හැමදේටම කලින් පුංචි වෙලාවක් අරගෙන හිතලා බලලයි ඒ දේවල් ක්රියාවට නංවන්නේ...
3. මේ අලුත් අවුරුද්දේ ඔයා කිසිම කෙනෙක් කියන නරක සහ සෘනාත්මක වචන නිසා වැටෙන්නේ නැහැ. ඒ මිනිස්සුන්ගේ ස්වභාවයයි ඒ පෙන්නන්නෙ කියල ඔයා ඔයාට තේරුම් කරලා ඔයා ඔයාගේ ගමන යනවා.
4. ඔයා එකට එක කියන්නෙ නැහැ. ඔයාට තේරෙනවනම් යම්කිසි කෙනෙක් එක්ක කතා කරන එක නුසුදුසුයි කියලා හෝ ඒ කෙනත් එක්ක සංවාදයක් අරන් යන එක නුවණට හුරු නැහැ කියලා, ඔයා එතනින් යනවා. මගහැරීම් සහ සමුගැනීම් ඔයාගේ මානසික සුවය වෙනුවෙන් කරන්නට ඔයා මේ අවුරුද්දේ දෙපාරක් හිතන්නෙ නැහැ.
5. ඔයා කිසිම කෙනෙක්ගෙන් සිඟමන් යදින්නේ නැහැ කාලය ආදරය හෝ යාළුකම් ඉල්ලලා. ඔයා වෙන දෙයක් පිළි අරගෙන ඔයාට සුදුසු දේ වෙතට ඔයා ලංවෙනවා. ඔයා ඔයාගේ ආත්ම ගරුත්වය ගැන හිතනවා. කිසිම කෙනෙක්ගෙ පස්සෙන් ගිහිල්ලා කිසිම දෙයක් ඔයා සිඟමන් යදින්නෙ නැහැ.
6. ඔයා ඔයාට කාලය ගොඩක් වෙන් කරනවා. වෙනද වගේ ෆෝන් එකට ඇබ්බැහි වෙලා ඉන්නේ නැහැ. දවසකට මිනිත්තු කිහිපයක් ඔයා ඔයාගේ සෞඛ්ය වෙනුවෙන් වෙන් කරනවා..
7. මේ අලුත් අවුරුද්දේ අවදි වුනු ගමන් ඔයා ඔයාගේ නිදා ගත්ත ඇඳ පිළිවෙලට හදනවා. ඒක ඔයාට දවස පටන් ගන්නට කරන්න පුළුවන් අපූරු දෙයක් !
8. මේ අවුරුද්දේ පිළිවෙල සහ පිරිසිදුකම ගැන ඔයා වඩාත් අවධානය යොමු කරනවා. ඔයා නිතරම ඔයාගේ ශරීරය පිරිසිදුව පිළිවෙලට තබා ගන්නවා. ඒවගේම ඔයා ඉන්න තැනත්.
9. මේ අවුරුද්දේ ඔයා ඔයාව දියුණු කිරීමට තව තවත් උත්සාහවන්ත වෙනවා. ඔයා අලුත් දේවල් ඔයාගේ ජීවිතේට එකතු කරගන්නවා. ඔයා පුංචි දෙයක් හෝ ඉගෙන ගන්නවා.
10. මේ අවුරුද්දේ ඔයා ඕපදූප කේලාම් වලට මැදිහත් වෙන්න යන්නේ නැහැ. තවත් කෙනෙක්ට අපහාස කරන දේවල් වලට ඔයා ඔයාව එකතු කරගන්නේ නැහැ. ඔයා බොහෝම ධනාත්මකව මේ අලුත් අවුරුද්දෙ ගෞරවාන්විත ව ජීවත් වෙනවා.
11. හැම වැරදීමකින්ම ඉගෙන ගන්න. වැරදීම් කියලා කියන්නේ වැටෙන්නට හේතුවක් නෙමෙයි. නැගිටින්නට හේතුවක්.
12. මේ අවුරුද්දේ ඔයාගේ සාර්ථකත්වය වෙනුවෙන් ඔයා රහසේම වැඩ කරනවා. ඔයා ඕනවටත් වඩා ඔයාගේ හැමදේම හැමෝටම කියන්න යන්නේ නැහැ. ඔයා නිහඬව ඔයාගේ ගමන යනවා.
13. ඔයා තවදුරටත් අතීතය මතක් කර කර ඉන්නේ නැහැ. ඔයාට මේ වර්තමාන මොහොත තරම් වැදගත් දෙයක් තවත් නැහැ. ඔයා නිතරම සිහියෙන් ඉන්නවා. මේ මොහොතට අවධානය දෙනවා.
14. ඔයා මේ අලුත් අවුරුද්දේ තමන්ට නිතරම ස්තූතිවන්ත වෙනවා. ඒ වගේමයි ඔයාගේ ජීවිතේට ලැබෙන හැමදේටම නිතරම ස්තූතිවන්ත වෙනවා. මේ පුරුද්ද ඔයා ඔයාගේ ජීවිතේ දෛනික පුරුද්දක් විදිහට එකතු කරගන්නවා...
15. ඔයා කිසිම කෙනෙක්ට හිංසාවක් කරන්නේ නැහැ. කාරුණිකව පැත්තකට වෙලා තමන්ගේ පාඩුවේ ජීවත් වෙන මනුස්සයෙක් විදිහට ඔයා ලස්සන ගමනක් යනවා. තවත් කෙනෙක්ගෙ හිතක් රිද්දන්න, මිනිසුන්ට හානි කරන්නට ඔයා සූදානම් නැහැ. ඔයා බොහොම කරුණාවන්තව ඔයාගේ ගමන යනවා.
16. ඔයා දෙන්න ලෝභ නැහැ. ඔයා පුළුවන් හැම වෙලාවෙම තවත් මනුස්සයෙක්ට උදව් කරනවා. ඔයා ඔයාට ලැබෙන ධනයෙන් පුංචි කොටසක් හෝ දුප්පත් මිනිස්සුන්ට සහ සත්තුන්ට වෙන්කරනවා..
17. ඔයා තවත් කෙනෙක්ට උදව් කරනකොට ඔයාට හානි කරගෙන උදව් කරන්නේ නැහැ. ඔයාට පුළුවන් සීමාවෙ ඔයා උදව් කරනවා. ඒත් ඔයාට හානි වෙන දේවල් වලින් ඔයා කරුණාවන්තව පැත්තකින් ඉන්නවා.
18. ඔයා ඔයාට කරුණාවන්තයි. ඔයා ඔයාට ගොඩාක් කරුණාවන්තයි. ලෝකෙටම කරුණාවන්ත වෙනවා වගේම ඔයා ඔයාටත් කරුණාවන්තයි. ඒක මේ අලුත් අවුරුද්දේ බොහෝම වැදගත් නීතියක්.
19. ඔයා මේ අලුත් අවුරුද්දේ තමන්ට හානි වෙන දේවල් ප්රතික්ෂේප කරන්නට බයවෙන්නෙ නැහැ. ඔයා මේ අලුත් අවුරුද්දේ නෑ බෑ කියන්නට විරුද්ධ වෙන්නට ශක්තිමත්. ඒ කියන්නේ තමන්ට හානි වෙන දේවල් වලට නෑ බෑ කියන්න වගේම තමන්ට හානි වන අවස්ථාවලදී ඒ අවස්ථාවන්ට විරුද්ධ වෙන්නට තරම් ඔයා ශක්තිමත්.
20. ඔයා ඔයාට ගෞරව කරනවා. ඔයා අනිත් මිනිස්සුන්ට ගෞරව කරනවා.ඔයා සොබා දහමට ගෞරව කරනවා. ඒක විශේෂම නීතියක්...
21. ඔයා ධනාත්මක දේ තෝරගන්නවා. ඔයා කියන්නේ ධනාත්මක දේ පමණයි. ඔයා බලන්නේ ධනාත්මක දේවල්. ඔයා කතා කරන්නේ ධනාත්මක දේවල්. හිතන්නෙ ධනාත්මක දේවල්. ඔයා ඔයාගේ සිතුවිලි ධනාත්මක සිතිවිලි බවට පත්කරගන්නවා. එය බොහෝම වැදගත් වේවි ඔයාගේ ජීවිතේට.
22. ඔයාට පාළුයි කියලා ඔයා දුකෙන් ඉන්නේ නැහැ. කවුරුත් නැතත් තමන් තමන්ගේ ජීවිතය සතුටෙන් ඉස්සරහට යනවා. ඒක ඔයාට ලැබෙන බොහොම වැදගත් නීතියක්. කවුරුත් නෑ කියලා ඔයා ඔයාගේ ජීවිතේ නවත්වා ගන්නේ නැහැ. නිතරම ඔයා තියෙන දේවල් වලින් සතුටු වෙනවා. කවුරු හිටියත් නැතත් ඔයා ඔයාගේ ජීවිතය වෙනුවෙන් ඉදිරියට යාමට තෝරාගන්නවා.
23. ඔයා ඔයාගේ හැඟීම් පාලනය කරගන්නවා. කේන්තිය සහ කෝපය ඔයා මැඩ පවත්වාගන්නවා. ඒ වගේම ඔයාට දුක හිතුණහම ඔයාට අඬන්න අවස්ථාව තියෙනවා. ඒකට කමක් නැහැ. නිතරම තමන්ගේ හැඟීම් පිළිගන්න. ඒ දේවල් ලස්සනට කළමනාකරණය කර ගැනීම අනිවාර්යයි මේ අවුරුද්දේ...
24. සමාජ මාධ්ය තුළ කුනු රහට ඔයා ඇබ්බැහි වෙන්නෙ නැහැ . ඔයා ඔයාට දෙන්නෙ ධනාත්මක දේවල්. ඔයා ඔයාට දෙන්නෙත් ධනාත්මක දේවල් පමණයි. ඔයා ඔයා වෙනුවෙන් හොඳම දේවල් දෙනවා. ඔයා හොඳ පුරුදු ඔයාගේ ජීවිතයට එකතු කරගන්නවා. ඒ හොඳ පුරුදු අතර හොඳ පොහොසත් පොත් කියවන්නට ඔයා මේ අවුරුද්දේ කාලය වෙන්කරනවා.
25. ඔයා හැමදේම ගැන සුබවාදීව දකින්න ඕන මේ අවුරුද්දේ. කොයි තරම් බලාපොරොත්තු රහිත අවස්ථාවක වුණත් ඔයාට බලාපොරොත්තුවක් තියෙනවා කියන තද විශ්වාසය ඔයා තුළ තියෙන්න ඕනේ..
26. මේ අවුරුද්දේ අනිත් අය කොහොම හිතයිද කියලා හිතලා නෙමෙයි ඔයා ජීවත් වෙන්නේ. ඔයා තවත් කෙනෙක්ට කරදරයක් නැතුව අනිත් අය මොන දේ හිතුවත් මට වැඩක් නෑ කියන තැනට ඇවිත් ඔයාගේ සතුට වෙනුවෙන් සුවදායී ජීවිතයක් ගත කරනවා තවත් කෙනෙක්ට හානියක් නොවී. ඔයා ඔයාගේ ජීවිතය ආදරෙන් බලා ගන්නවා...
නීති විසි හයත් එක්ක , මට දැනෙනවා මේ කියවන කාගේ වුණත් ජීවිතේ බොහෝම සුබයි කියලා මේ ලස්සන අවුරුද්දේ....
-Gumiho's Diary-
