16/04/2026
අපි යවන හැම WhatsApp මැසේජ් එකක්ම, බලන හැම YouTube වීඩියෝ එකක්ම තත්පරෙන් ලෝකේ වටේම යන්නේ මුහුදු පතුලේ හැංගිලා තියෙන යෝධ කේබල් වලින් කියලා අපි දන්නවනේ. හැබැයි මේවා වැඩ කරන්නේ කොහොමද? 🌊🔌
හරියටම කිව්වොත් ලෝකයේ අන්තර්ජාල දත්ත ගමනාගමනයෙන් 99% ක්ම සිද්ධ වෙන්නේ මේ Submarine Communications Cables (සබ්මැරීන් කේබල්ස්) හරහා තමයි. මේ කේබල් එකක් වතුර බටයක් තරම් මහත වුණාට, මේවගෙන් දවසකට ඩොලර් ට්රිලියන 10 කට වඩා වටිනා ආර්ථික ගනුදෙනු එහෙමත් සිද්ධ වෙනවා. අපි හොයලා බලමු මේ කේබල් මුහුදු පතුලේ අතුරන විදිහ, ඒවා වැඩ කරන විදිය වගේ විද්යාත්මක පැත්ත ගැන. 🚀
දැනට අපේ ලෝකය වටේම ක්රියාකාරී මට්ටමේ සහ අලුතෙන් හදමින් තියන මේ Submarine cables 493 කට කිට්ටුවෙන් තියෙනවා. මේවගේ මුළු දිග ගත්තොත් කිලෝමීටර් මිලියන 1.5 කට වැඩියි! ඒ වගේම මේවා එක එක සයිස් වලිනුත් තියෙනවා. ඒ කියන්නේ කළු මුහුද යටින් යන කිලෝමීටර් 300ක් වගේ දිග පොඩි කේබල් වල ඉඳන්, ඇමරිකාවේ වර්ජිනියා ප්රාන්තයේ ඉඳන් ස්පාඤ්ඤය වෙනකන් යන කිලෝමීටර් 6,600ක් දිග දැවැන්ත Marea cable එක වෙනකන් පරාසයකට මේවා විහිදිලා තියෙනවා. ඒ මම කිව්ව Marea cable එකේ බර කොච්චරද කිව්වොත්, ඒක නිල් තල්මස්සු 24 දෙනෙක්ගේ බරට සමානයි! 🐋 🌍🕸️
මේ වගේ එක කේබල් එකක් මුහුද හරහා අතුරන්න ඩොලර් මිලියන 300 ත් 400 ත් අතර දැවැන්ත මුදලක් වියදම් වෙනවා. ඒ තරම් සල්ලි වියදම් කරලා මේ සාගර පතුලේ අතුරන කේබල් ජාලයෙන් තමයි අද ලෝකයේ ආර්ථිකය සහ සන්නිවේදනය පණපිටින් තියාගෙන ඉන්නේ.
එතකොට කොහොමද මෙච්චර ඩේටා ගොඩක් මේ පොඩි කේබල් එකකින් යන්නේ? මේ කේබල් ඇතුළේ තියෙන්නේ මිනිස් කෙස් ගහක් තරම් හීනි ෆයිබර් ඔප්ටික් නූල්. මේවා දිගේ තොරතුරු යන්නේ ආලෝක කදම්භ විදිහට, ආලෝකයේ වේගයෙන්. ⚡🌐
එක ෆයිබර් කේබල් එකකින් මෙච්චර ඩේටා ගොඩක් යවන්න පුළුවන් වෙලා තියෙන්නේ Dense Wavelength Division Multiplexing (DWDM) කියන සුපිරි තාක්ෂණය නිසයි. සරලවම කිව්වොත්, මේ තාක්ෂණයෙන් කරන්නේ එකම වෙලාවේ එකිනෙකට වෙනස් තරංග ආයාම තියන ආලෝක තරංග ගොඩක් එකම ෆයිබර් කේබල් එකක් ඇතුළින් යවන එක. ඒ නිසා තත්පරයකට ගිගාබයිට් 100 ක ඉඳන් ගිගාබයිට් 400 කට වඩා ඩේටා යවන්න මේ අලුත් කේබල් වලට පුළුවන්!
