22/04/2025
📢 උතුම් ශ්රී දළදා වහන්සේ වැද පුදාගැනීමට පැමිණෙන සියලුම බැතිමතුන් සඳහා....
🔴 දළදා මාලිගාවට ඇතුළු වෙන විට සුදුවතින් සැරසී යන්න. අත් නැති ගවුම් ඇඳන් යන්න දෙන්නෙ නෑ. සුදුසු ඇඳුමක් ඇඳන් යන්න
🔴 මාලිගාවට ඇතුළු වෙන විට තමන් රැගෙන යන ගමන් මලු ගෙනියන්න දෙන්නෙ නෑ. පොඩි handbag එකක්වත් අපිට ඇතුලට ගෙනියන්න එපා කිව්වා. පුලුවන්නම් තමන්ගෙ ගමන් මලු ඔක්කොම එකට එකතු කරලා ඉටි කොලේක වගේ ගැටගහලා මාලිගාවට ඇතුල් වෙන්න කලින් හොයාගන්න පුළුවන් තැනක පිළිවෙලට තියලා යන්න.
පුලුවන් නම් ගෙදරින් එද්දිම තමන්ගෙ බෑග් මලු වල දුරකතන අංකයක් අලවගෙන හරි මහගෙන හරි එන්න.
ආපහු යද්දි මතක ඇතුව තමන් ගෙනා ඉටිකොල අරන් යන්න. බිම විසි කරලා යන්න එපා
සල්ලි, වටිනා රත්තරන් බඩු මාලිගාවට අරන් යන්න. ඒවා තියලා යන්න එපා. දළදා වහන්සේට පූජා කරන දේවල් තියෙනවනම් ඒවා ගෙනියන්න පුලුවන්.
🔴 මාලිගාවට ඇතුළු වෙන්න පාරවල් 3ක් තියෙන නිසා අනිවාර්යයෙන්ම හැමෝම තමන් ආවෙ මොන පාරෙන්ද කියලා අහලා දනගෙන යන්න. දළදා වැඳලා ඉවර උනාම තමන් ආව පාරෙ නම ගහලා තියෙන බෝඩ් එක හොයාගෙන යන්න. එහෙම නැත්නම් තමන්ගෙ ගමන් මලු හොයාගන්න බැරුව පාරවල් වැරදිලා අතරමං වෙන්න පුලුවන්. විශේෂයෙන්ම වයසක අම්මලා තාත්තලා එක්කන් එන අය මේ ගැන එයාලා දැනුවත් කරලා තියන්න. මොකද මාලිගාව ඇතුලෙ check point එකේදි ගැහැණු සහ පිරිමි පෝලිම් දෙකකට බෙදනවා. වයසක අම්මා තාත්තලට එතෙන්දි තමන්ගෙ දරුවො මග ඇරිලා අතරමං වෙන්න පුලුවන්.
🔴 දළදා වඳින්න අපි ගියෙ අම්පිටිය පාරෙ. අපි යන දවසෙ කිලෝමීටර් 12කට වඩා පෝලිම තිබ්බා. දළදා මාලිගාව ආසන්නයේ කෑම බීම නොඅඩුව ලැබෙනවා. ඒත් කිලෝමීටර් ගණන් දුරට පහසුකම් සැපයීම දුෂ්කරයි. ඒ නිසා පොඩි පොඩි කෑම අරන් යන්න විශේෂයන් පොඩි ළමයි එක්කන් යනවනම්. අපි යද්දි අවුරුදු නිසා කඩවල් ගොඩක් වහලා තිබ්බා.කෑම නෑ කියලා කෑගහන්න රණ්ඩු කරගන්න එපා. ඉවසීමෙන් දළදා වඳින්න යන්න.
🔴දළදා වඳින්න ගිහින් පව් පුරවගන්න එපා🔴
🔴 තමන් ගේන කැළි කසල පාරට විසි කරන්න එපා. දළදා වන්දනාව නිසා නුවර පාරවල් කුණු කසල වලින් වැහිලා ගිහින් තිබුණා😢 තමන් කන කෑම එකේ කොලේ පාරට විසි කරන්න එපා. නගර සභාවෙන් කුණු ලොරිය එන නිසා ගොඩක් මිනිස්සු හැමදේම පාරට විසි කරන්න පුරුදු වෙලා. පාර දෙපැත්තෙම කැළි කසල වෙන් කරලා දාන්න පුලුවන් බඳුන් තියෙද්දිත් පාරට කුණු විසි කරන එකෙන් වෙන විනාසෙ කොච්චරද කියලා බලන්න. නගර සභාවෙන් කුණු අස් කරලා ඉවර වෙන්න කලින් මිනිස්සු ආයෙම පාරට කුණු දානවා. නගර සභාවේ වැඩ කරන්නෙත් මිනිස්සු බව අමතක කරන්න එපා
🔴 අපි දළදා වැඳලා ආපහු එද්දී වඳින්න ගිය අය තියලා ගිය බෑග් මලු හැමදේම පාරට විසි කරලා තිබුණා. සෙරෙප්පු,ඇඳුම්,කෑම හැමදේම පාර පුරාම තිබුණා.තමන් ගැන විතරක් හිතන්න එපා. කෙනෙක් තියලා ගිය බෑග් එකක් පාරට විසි කරලා දාන්න තරම් පහත් ගති තියෙන මිනිස්සු දළදා වඳින්න එනවා කිව්වම දුකයි. මම දැකපු දුක හිතෙනම සිදුවීම නම් මිනිස්සු බෙහෙත් පවා පාරට විසි කරලා තිබුණා. දීර්ඝ කාලීන අසනීප වලට බෙහෙත් බොන මිනිස්සුත් දළදා වහන්සේ දැක බලාගන්න හිතන් එන බව අමතක කරන්න එපා. ඒ අය දළදා වැඳලා එද්දි බෙහෙත් ටික පාර පුරා විසි කරලා හොයාගන්න බැරි විදියට මිනිස්සු පාග පාග යද්දි ඒක මොනතරම් පහත් දෙයක්ද. ඒ මිනිස්සුන්ට හදිසි අසනීපයක් වුනොත් බෙහෙත් ටික හොයාගෙන එද්දි තමන්ගෙ බෑග් තියපු තැන් වලින් පාරට විසි කරලා තිබ්බම දැනෙන අසරණකම මම දැක්කා. දළදා වැඳලා ආව බහුතරයක් මිනිස්සු ගෙදරින් ගෙනාව ඇඳුම්, සෙරෙප්පු, බෙහෙත් වල ඉඳන් මොනවාහරි නැතිවෙලා තිබ්බා.
🔴 දළදා වඳින්න යන පෝලිම් වල ඉන්න මහා ජනකාය අතරේ අමාරුවෙන් යන ආබාධ සහිත මිනිස්සු, වයසක අම්මා තාත්තලා, පොඩි ළමයි මේ හැමෝම ඉන්නවා. මේ යන අතරමගදි කවුරු හරි වැටුනත් ඒ කෙනාව නැගිට්ටවනවා වෙනුවට එයාව පාගගෙන හරි පෝලිම් වල ඉස්සරහට පැන පැන යන මිනිස්සු ඉඳියා. Ambulance එකක්වත් ඉක්මනින් එන්න පුලුවන්කමක් නෑ ඒ තරම් සෙනගක් ඉඳියා. එහෙම එකේ තමන් ගැන විතරක් නොහිතා මානුෂීය සිතින් දළදා වඳින්න යන්න. අනිත් අය මට වැඩක් නෑ මම දළදා වඳිනවා කියන මානසිකත්වයෙන් ඇවිත් පින් රැස් කරගන්න ගිහින් සංසාරෙන් එතෙර වෙන්න බැරි තරම් පව් පුරවගන්න එපා
🔴 ඇයි මිනිස්සු රණ්ඩු වෙන්නෙ
ප්රධානම දේ පෝලිම් වලට. කිලෝමීටර් ගණන් පයින් ඇවිදගෙන දවස් ගනන් පෝලිම් වල ඇවිදගෙන එද්දි අලුතෙන් පෝලිම් වලට එකතු වෙන මිනිස්සු සමහරක් කළේ පෝලිමේ කෙලවරට නොයා පෝලිමේ ඉස්සරහට පැනපු එක. පෝලිමේ කෙළවර කිලෝමීටර් 10ක් 15ක් දුරයි කියලා දැනුනම එයාලා කලේ මේ ටික පයින් එන්න ඕනෙ නෑනෙ මේ ඉස්සරහට පැනගත්තනම් කියලා පෝලිම් පැනපු එක. ඒකෙන් වුනේ දවස් ගානක් පයින් කිලෝමීටර් ගණන් ඇවිදන් ආව මිනිස්සු දළදා වඳින්න තවත් දවස් තුනක් හතරක් බලන් ඉද්දි අලුතින් පෝලිම් වලට පැනපු මිනිස්සු එක දවසෙන් දෙකෙන් දළදා වැඳපු එක. ඒ දේවල් දැක දැකත් වචනයක්වත් නොකියා ඉවසීමෙන් ඉඳපු මිනිස්සු අතරෙ ඒ දේවල් වලින් වෙන අසාධාරණයට කතා කරපු මිනිස්සුත් ඉඳියා. අන්න ඒ දේවල් නිසා කෑගැසීම් රණ්ඩු මැද තමයි හැමකෙනාටම දළදා වඳින්න පෝලිම් වල ඉන්න වුනේ. දවස් 3ක් පෝලිම් වල ඉඳලත් දළදා වඳින්න බැරි වුන මිනිස්සු පොඩි ළමයි, ගොඩක් ඉඳියෙ අන්න ඒ නිසයි. දළදා වහන්සේ වැඳපුදා ගෙන ආමිස පූජාවකින් පින් රැස් කරගන්න එන මිනිසුන්ගේ මේ වගේ අවිනීත හැසිරීම් නිසා දැකලා මට දැනුනෙ පුදුමාකාර දුකක්.
🔴 සමහරු කියයි හැමෝගැනම බලන්න ගියානම් අපිට දළදා වඳින්න වෙන්නෙ නෑ කියලා.මම මේ ලිව්වෙ මම දැකපු දේවල් වලින් බොහොම ටිකයි. මම කියන්න උත්සාහ කලේ හැමෝටම නොලැබෙන වටිනා ආත්මයක් වන මිනිස් ආත්මයක් ලැබිලා තියෙද්දි ආධ්යාත්මික සංවරකමක් විනයක් මානුෂීය ගුණයක් ඇතිකරගන්න උත්සාහ කරන්න. එතකොට දළදා වහන්සේ වඳින්න නොලැබුණත් අවංකව සතුටු පුලුවන් මම බුදුරජාණන් වහන්සේගේ ධර්මය අනුව යමින් ප්රතිපත්ති පූජාවක් සිදු කළා කියලා.
දළදා වඳින්න ගෙදරින් එළියට අඩිය තියන තැන ඉඳන් දළදා වහන්සේ වැඳ නමස්කාර කරගන්න තැන දක්වාම තියන හැම අඩියක් පාසාම කුසල් වඩන කෙනෙක්ට කුසල් රැස්කරගන්න ඕනෑතරම් අවස්ථාවන් ලැබෙනවා. ඒ වගේම අමානුෂීය කෘර ආත්මාර්ථකාමී ගතිපැවතුම් මගින් අකුසල් රැස් කරගන්නත් ඕනෑතරම් අවස්ථාවන් තියෙනවා. මම මේ ලියපු දේවල් කියවලා කෙනෙක්ගෙ අකුසල් සිතක් දුරු වුනා නම් හරි කුසල් සිතක් ඇති වුණා නම් හරි මට වටින්නෙ ඒ දේ විතරයි.
🔴 පුලුවන් හැමෝම දළදා වහන්සේ වැඳ නමස්කාර කරගන්න යන්න. එය මේ ජීවිතයේ හැමෝටම නොලැබෙන වටිනා දුර්ලභ අවස්ථාවක්.
තෙරුවන් සරණයි
~රශී~
(ඡායාරූප අන්තර්ජාලය මගිනි)
