21/04/2026
කදුළක් වූ දරු පෙම..
අඩියට දෙකට ගෙට ගොඩ උන සිරිපාල දැක්කේ බෙරිහන් දෙන කමලාවතීය..
ඇය කවදත් කට කියවීමට උපන් හපනියකි..
කම්මලේ බල්ලාට මෙන් කෑ ගැසිලි හුරු පුරුදු සිරිපාල පස්සේ දොරෙන්ම ගෙට රිංගුවේ දවවලේ සිට බඩට දැණුනු කුසගින්නට යමක් ගිල දැමීමේ අදහසත් එක්කාසු කරගෙනමය..
මුණින් හැරී තිබු වළං දෙක තුන දුටු සිරිපාලගේ කේන්තිය ඉවසුම් නොවිණි..
පෙරේදා හාල් කිලෝ අටක්ම සියාතුවාගේ කඩෙන් ගෙන ආ බවත් මේ ගෑණි විලාප තබනවා විනා කන්නට යමක් තම්බා නැති බවත් සිතමින් දත්කූරු කන්නට විය..
නොනවත්වා ඇහෙන විලාපයට සවන් යොමු කළ සිරිපාල
"මොකද ගෑනීයේ මොකා මැරිලද බෙරිහන් දෙන්නෙ" කියමින් අඩක් නිම කළ සාල කෑල්ලට ගොඩ විය..
"අනේ ඔහේ ආවාදැයි"
අසමින් කමලාවතී ඊටත් වඩා විලාප තබන්නට විය..
"මොකද්ද උනේ කියාපන්"..
ඒ සිරිපාලය..
"අනේ අපේ කොල්ලා සිරී"
මොකක් නමුත් විශාල දෙයක් වෙලා ඇති බව දැනගත් සිරිපාල..
"ඇයි කොල්ලට මොකද උනේ"..
"කෝ කොල්ලා"..
අසමින් මොර ගාන්නට විය..
කසුන්ට අවුරුදු 19 සපිරුණේ ගිය මාසේ 23 වනදාය..
ඔහු වයසට වැඩි මුහුකුරා ගිය පෙණුමෙන් යුතු යස ඉලන්දාරියෙකි..
සාමාන්ය පෙළින්ම පාසල් දිවියට ආයුබෝවන් කී කසුන් ගමේ කොල්ලන් කුරුට්ටන් සමඟ වැඩි භජනයට එකතු විය..
කමලාවතිගේ වැඩි කෑ ගෑම ඇසුනේ කසුන් ගෙදර ඉන්නා විටයි..
ඇය කීවේම හන්දියේ ඇගලුම් කම්හලේ හෝ සේවයට යන ලෙසයි..
කසුන්ට ඒ සඳහා කැමැත්තක් නොතිබුණි..
තුෂ්නීම්භූත වූ සිරිපාල මහ හයියෙන්,
"ගෑනියේ කෝ මගේ කොල්ලා"
යැයි කමලාවතීගේ උරහිස අල්ලා සොලවමින් කෑ ගැසුවේ අහල පහල ගෙවල් දෙකක මිනිසුන්ද දොරකඩට කැදවමිනි..
"කොල්ලා යායා පාරේ ගුණවතිගේ කෙල්ල අරන් ගිහින්"..
"සිරිපාලගේ ඇස් උඩ ගියේ නිතැතිනි"..
දහඩිය දමන්නට විය..
කලන්ත ගතියක් ආ නිසාවෙන් ළඟ තිබූ පුටුවට බර විය..
එහා ගෙදර මැගිනෝනා වතුර විදුරුවක් උයන ගෙට ගොස් ගෙනවිත් සිරිපාල අත තැබීය..
කුමුදුනි අවුරුදු 28 ක කනවැන්දුම් දෙදරු මවකි.
පතලකට යටවී ස්වාමියා මියයන විට බාල දැරිවියට වයස අවුරුදු දෙකකි.
ගුණවතීගේ අනුදැනුම මතම කසුන් සමඟ ඇයිහොදයිය පටන් ගෙන අවුරුද්දක් බව සිරිපාල දැනගත්තේ මේ සිද්ධියෙන් පසුවයි..
ගුණවතීගේ ගෙදරට ගොස් ලුණු ඇඹුල් ඇතුවම සිරිපාල ඇමතුවද ගුණතවතීට වගක් නොවීය..
පොලිසියටද ගිය සිරිපාලට එතැනින්ද කිසිදු පිළිසරණක් නොවුනේ කොල්ලාට අවුරුදු 18 පිරීම හේතුවෙනි..
කියන්නට කෙනෙකු නැතිව සිරිපාල වැව අසලට විත් ඉකිගසා හැඩුවේ කිරිදරුවෙකු මෙනි..
ටික වේලාවකින් විශාල ඝෝෂාවක් වැව් බන්ට් එක දෙසින් ඇසෙන්නට විය..
සිරිපාලද කදුලින් බරවූ දෙනෙත ඒ පැත්තට හැරවීය..
"කමලා අක්කේ" යැයි ගැහැණුන් මොර දෙන හඩ සිරිපාලට ඇසුණි..
අඩියට දෙකට එතැනට දිව ආ සිරිපාල දුටුවේ හීනෙන්වත් නොසිතූ දෙයකි..
තම පණ වන් රැකි පුතාගේ වෙන්වීම දරාගත නොහැකිවූ කමලාවතීගේ නිසල සිරුර වැවි පිටියේ ප්රාණය නිරුද්ධව තිබිණි..
පුතාගේ වෙන්වීමෙන් සෝබරිතව උන් සිරිපාලට බිරිඳගේ වියෝවද දරාගන්නට හයියක් නොවීය..
සිහි විකලෙන් කියවමින් මඟ තොට මාස කිහිපයක් සැරිසරමින් දිවි ගෙවූ සිරිපාල වාහනයකට හසුව අවසන් ගමන් මහමඟම ගොස් තිබූ අයුරු දුටු ගම්වැසියෝ විලාප තැබුවේ..නොගැලපෙන හිතුවක්කාර විවාහයකට ගිය පුතුගේ වියෝවෙන් අවසන් ගමන් ගිය දෙමව්පියන් ගැන අදෝනා කියමිනි.
ගුණවතීටද දොෂාරෝපණය කිරීමට ඔවුන් අමතක නොකළහ..
දරුවන්ගේ හිතුමනාපකම් හේතුවෙන් අවසන් මොහොතේද විදවන දෙමව්පියන් මේ රටෙහි ඕනෑතරම්ය..
___✍️Gaya____
