https://www.facebook.com/112483598481446/

Hannah Kook, Pretoria (2026)

03/09/2026

Dit is vroegoggend… 6:02vm

Ek sit wakker en regop met ’n koppie koffie wat manlief vir my gemaak het, want in ons huishouding gebeur daar baie oor die volgende paar dae. ❤️

Warm teen my been het my 6-jarige liefie-laffie-lyf styf teen my kom lê… en ek is sommer net dankbaar.

Dankbaar vir ons gesin.

Vir ’n wonderlike man.
Vir my 6-jarige seuntjie wat nog graag styf teen Mamma kom lê.
En vir ’n 14-jarige seun in die skoolkoshuis wat, na my sin, gans te vinnig grootword. 🥹

Familie is vir my ongelooflik belangrik.

Kinders is kosbaar. Ons tyd saam met hulle is kosbaar. En ek glo ons moet daardie klein, alledaagse oomblikke koester — want voor ons ons oë uitvee, is hulle groot.

Een maal per week maak ek doelbewus kos wat my 6-jarige saam met my kan maak.

Naweke is dit my tiener se b***t. 😉
Ek gaan binnekort ook ’n plasing daaroor deel.

Gisteraand was weer so ’n aand. ❤️

Ek en my junior chef het saam in die kombuis gewerk.

Hy voeg by.
Hy meng.
Hy roer.
Hy proe.

En ja… hy mors ook ’n bietjie. 😄

Maar dis okay.

Want hy leer. En belangriker nog — ons spandeer tyd saam.

Gisteraand se aandete was Boereworspasta met net 3 bestanddele!

🌭 Boerewors
🍝 Pasta
🥫 1 blikkie Boeriesous

En hier is wat my junior chef gedoen het:

Heel eerste braai ons die boerewors in ’n pan.

Wanneer dit mooi bruin is, haal ons dit uit en sit dit eenkant in ’n bakkie.

Nou voeg ons water by in dieselfde pan waarin die wors gebraai het en gooi genoeg rou pasta vir jou gesin daarin.

Ons het ’n halwe pak gebruik.

Maak seker die pasta is net-net met vloeistof bedek. Die pasta kook nou lekker gaar in daardie heerlike wors-vloeistof. 😋

Wanneer die pasta amper gaar is, voeg ons die Boeriesous by.

Mamma moet maar hier ’n bietjie skat hoeveel nodig is… Ons het sommer die hele blikkie ingegooi.

Intussen het Pappa gou ’n handjie kom bysit en die boerewors in happiegroottes gesny.

Die wors gaan terug by die pasta in.

Meng alles goed deur en laat dit vir so 5 minute prut terwyl die bakkies uitgehaal word en almal regmaak om heerlik te smul.

Dís eintlik waaroor kos vir my gaan.

Nie net oor wat op die bord is nie.

Maar oor die tyd saam.

Oor die klein handjies wat help.
Oor die gemors op die kombuisblad.
Oor “Mamma, proe!”
Oor ’n pappa wat gou kom hand bysit.
Oor lag.
Oor leer.
Oor saamwees.

Oor herinneringe maak. ❤️

Elke keer wanneer ek en my junior chef saam kosmaak, verstom ek my aan die trots wat hy ervaar oor iets wat hy self gemaak het.

En ek d**k by myself…

Miskien is dit een van die grootste geskenke wat ons vir ons kinders kan gee:

Nie net om vir hulle kos te maak nie… maar om hulle te leer om dit eendag self te maak.

En om dit saam met hulle te doen terwyl ons nog die voorreg het om hulle klein te hê. ❤️

PS: Mamma of Pappa moet asseblief heeltyd by wees wanneer kinders in die kombuis help. Warm plate en skerp messe moet asb maar altyd onder volwasse toesig gebruik word.

Nog ‘n PS: ‘Spot the difference?’ 🤣 Terwyl die boerewors gebraai het, het Pappa gou gehelp om ons junior chef ná ’n dag van speel en besig wees, deur sy stort te kry. 🚿😂
Spanwerk op sy beste! 👏

02/09/2026

Hierdie is een van daardie disse wat jou huis sal laat ruik soos jou Ouma se kombuis…

Ek deel graag my Beesstert Herderspastei met julle…

En glo my as ek sê, dit is sowaar min moeite en dit sal lyk of jy ure voor die kospotte spandeer het.

Ek gebruik my prutpot (slow cooker) en deurnag sit ek my beestert in om stadig te kook.
Al wat ek byvoeg is:
* 2 x Uie fyn gekap
* Sout en Peper volgens smaak
* Genoeg vloeistof om dit goed te bedek
* 2 x blokkies Maggi aftreksel (nou gaan ek bieg - ek koop net die hoender geur en gebruik dit sommer altyd vir alles 😳)

Ek kook dit nou deurnag en die volgende oggend vroeg, haal ek die vleis uit en gooi wortel blokkies en aartappel blokkies in (onthou nie te veel aartappel blokkies nie, want daar kom aartappel bo-op, maar dit help om jou gereg bietjie te rek). Ek laat die groente blokkies nou lekker in die beesstert aftreksel kook.

Die vleis val omtrent uitmekaar na heelnag in die prutpot en as dit koud genoeg is om te hanteer, haal ek al die bene uit en trek die vleis sommer so met my hande uitmekaar... Sodra al die bene verwyder is, gooi ek die vleis weer terug in die pot saam met die groente.

Indien daar gans te veel vloeistof in is, skep ek dit uit en vries dit vir wanneer ek sop maak. Beesstert aftreksel is ‘n heerlike sop-basis.

Nou meng ek 'n pakkie Knorr Oxtail sop met bietjie water en gooi dit in my pot.
As die hele spul lekker saam gekook het en dik is - en as die aartappels en wortels lekker sag is, skep ek dit uit in 'n mooi bak.

Nou maak ek kapokaartappels om bo-op te skep, smelt regte botter en smeer dit met 'n kwassie oor die aartappels.

'n Uur of so voor ete, sit ek dit in die oond @ 180grade en siedaar - heerlike beesstert herderspastei!

PS. Onthou, aartappels is so veelsydig...
Ek maak gereeld Herderspasteie... Soms met gewone maalvleis, soms kerrie maalvleis, soms 'n bief-bredie herderspastei en dan ook 'n heerlike opsie is fyn opgekookte hoender met roommielies in... Eintlik kan jy ampertjies enige iets onder 'n kapokaartappel kombers in die oond druk en heerlik smul!

31/08/2026

Ma Rita het altyd die lekkerste Basaar Kerrie Maalvleis gemaak. Hierdie einste resep gebruik ek ook vir my Lamskenkelkerrie.

Ek gebruik selfs hierdie resep om kerrie sous te maak om hoendervlerkies in te marineer! Ek maak die sous aan, voeg bietjie water by, kook dit, maak dit bietjie dikker met Maizena, laat afkoel en laat die hoendervlerkies daarin “marineer”.
Daarna gaan hulle óf in die lugbraaier, óf ons braai hulle lekker op die vuur. 🔥

Maar vir my ❤️ Skoonma Rita se Basaar Kerrie Maalvleis doen ek die volgende:
🥘 Wat jy nodig het:
* 1 kg beesmaalvleis
* 1–2 uie, gekap
* 2–3 aartappels, in blokkies gesny — dit hang maar af van die grootte van die aartappels
* 1 blikkie gemengde groente
* 4–5 opgehoopte teelepels Rajah Medium-kerriepoeier — pas dit aan volgens hoe sterk jou gesin van kerrie hou
* 1 teelepel borrie
* 13 opgehoopte teelepels suiker — ja, dit is Ma Rita se resep! ❤️ baaaaie suiker - maar dit is yummie lekker.
* 45 ml asyn
* Sout na smaak

👩‍🍳 Hierdie is wat ek doen:
Ek braai heel eerste my uie en maalvleis saam totdat die maalvleis lekker verbruin.
Terwyl die maalvleis braai, meng ek my kerriepoeier, borrie, suiker, asyn en sout saam met ’n bietjie water om ’n lekker kerriesous te maak.
Ek voeg nou die kerriesous by die maalvleis en uie en roer dit goed deur.
Dan vul ek die koppie waarin ek die kerriesous gemeng het met water en voeg dit ook by die maalvleis.

Laat alles nou lekker prut sodat die geure mooi kan ontwikkel.

Voeg die aartappels by en kook totdat dit sag en gaar is.

Amper heel aan die einde voeg ek my blikkie gemengde groente by. Ek hou daarvan om dit eers aan die einde by te voeg sodat die groente nog lekker heel bly en nie pap kook nie.

🤎 Om die kerrie te verdik
1–2 opgehoopte teelepels Maizena
’n Bietjie koue water
Meng die Maizena met die koue water tot glad en roer dit by die kerrie. Laat dit ’n paar minute prut totdat die sous lekker verdik het.

🍝🍚🥯 Ons eet Basaar Kerrie op drie maniere...

🍝 Op 'n Vrydagaand = dan is dit lekker bakkie-kos!
Maak pasta gaan — ek gebruik sommer macaroni — meng dit deur die kerrie maalvleis.
Vir die pasta maak ek die maalvleis ’n klein bietjie meer souserig, sodat daar genoeg lekker kerriesous is om deur die macaroni te meng.
Hierdie is ons kinders se gunsteling! 😋

🍚 Enige ander dag van die week...
Dan gaan ons sommer die tradisionele pad en eet dit op lekker warm rys. Goeie ou kerrie en rys...

🥯 As ek hierdie op 'n Saterdagmiddag maak...
Maak lekker vars vetkoeke en geniet die kerrie maalvleis binne-in ’n warm, vars vetkoek.
Maak net seker dat die maalvleis nie te souserig is nie — jy wil hê daardie heerlike kerrie moet lekker in die vetkoek sit en nie aan die ander kant uitloop nie! 😂

’n Ou familie-resep, ’n bietjie van Ma Rita se nostalgie, en drie maniere om dit te geniet. ❤️

30/08/2026

☀️ Wie onthou hierdie Tupper bakke?

Elke keer as ek een van hierdie sien, kry ek sommer sulke wonderlike herinneringe aan my kinderdae. ❤️

Ons het een gehad. ’n Oranje een. 🍊

Ek onthou hoe my ma dit sou volpak met vrugte en allerhande lekker goedjies waarvan ons gehou het.

Elke kompartement het sy eie klein verrassing gehad. 😍

Bietjie vrugte hier… iets lekkers daar… en natuurlik moes daar altyd iets wees waarvan elkeen gehou het.

Dit was eintlik so ’n eenvoudige ding…

Maar vandag, wanneer ek een sien, vat dit my sommer terug na daardie dae.

Na somersdae, familie, lekker eetgoed en daardie gevoel van saam wees. ❤️

Want partykeer is dit nie die groot dinge wat ons onthou nie.

Dit is die klein goedjies.

’n Ma wat iets spesiaals vir haar kinders regmaak.
’n Bak vol gunsteling happies.
’n Somermiddag. ☀️
Lekker kuiers…

Nou dat die somer weer om die draai is, het ek gewonder…

❤️ Wat sal JY in joune pak?

Vars vrugte? 🍓🍇
Biltong?
Kaas en beskuitjies? 🧀
Iets lekkers vir die kinders?
Of sommer ’n bietjie van alles waarvan jou gesin hou?

Vertel my in die kommentaar — wat sal in jou perfekte somer-bakkies wees? ❤️

En as jy nou d**k:
“Ag, ek wil ook een hê!” 😍

Stuur my gerus ’n boodskap.

Hannah Kook ❤️

Want goeie kos is nie net kos nie… dit word herinneringe.

26/08/2026

❤️ DIE GESKENK VAN GEE

Ek het vandag bietjie oor die verskillende liefdestale ged**k, en veral oor een wat vir my baie besonders is: om te gee.

Nie noodwendig om vir iemand ’n duur geskenk te koop nie.

Ek bedoel om eerder die soort gee wat sê:
“Ek het aan jou ged**k.”
“Ek sien jy het ’n behoefte.”
“Hoe kan ek help?”

Toe ek ’n kind was, onthou ek dat mense dit baie meer natuurlik gedoen het.

Wanneer iemand nuut in die buurt ingetrek het, het my ma altyd iets vir hulle gaan gee — iets vir aandete, of sommer net koffie, tee en iets om te eet terwyl hulle besig was om te trek.

Wanneer iemand siek was, het jy iets vir hulle geneem.

Wanneer iemand deur ’n moeilike tyd gegaan het, het mense gehelp waar hulle kon.

Miskien gebeur dit vandag nog baie. Ek weet daar is beslis mense wat steeds so leef.

Maar soms wonder ek of ons nie ’n bietjie van daardie eenvoudige manier van omgee vir mekaar verloor het nie.

Ek onthou toe ek nog in die laerskool was, een spesifieke aand toe ons in Grabouw gewoon het.

Daar was mense wat in die omgewing gekuier het en hulle motor het naby ons huis probleme gekry. Dit was ’n koue aand en hulle het uiteindelik by ons huis kom aanklop om hulp te vra.

My pa het die deur oopgemaak en ek kan nie meer presies onthou wat alles met die motor fout was of presies hoe hy hulle gehelp het nie.

Maar ek onthou my ma. Sy het vir hulle koffie gemaak en iets gegee om te eet.

Ek onthou ook dat hulle vertel het dat hulle van Robbeneiland af gekom het.

Ek was nog ’n kind, maar daardie aand het op een of ander manier in my geheue bly vassteek.

En toe, ’n week of twee later, kom hulle weer by ons huis aan.

Hierdie keer met ’n geskenk.

Hulle het vir ons van die mooiste krewe gebring om dankie te sê.

Hulle het vriendelikheid ontvang en wou iets teruggee.

Dit gaan nie oor die waarde nie.

Nie om boek te hou van wat jy gegee het en wat jy teruggekry het nie.

Net om te sê:
❤️ Ek het aan jou ged**k.
❤️ Ek wou jou help.
❤️ Ek wou jou ’n bietjie bederf.
❤️ Ek wou jou seën.

En daarom het ek vandag vir julle ’n klein uitdaging. 🍎

Ek deel vandag Ma Rita se Droom Appeltert met julle.

Dit is ’n baie eenvoudige appeltert wat my skoonma my geleer het om te maak. Dit os een van my man se gunsteling terte.

Dit is ook nie een of ander geheime, unieke resep van my nie — dit is ’n bekende Suid-Afrikaanse resep wat eenvoudig heerlik is.

Maar hier is ‘n uitdaging:

🍎 MAAK HOM DUBBEL!

Maak een vir jou eie gesin… en maak nog een vir iemand anders.

Vat dit vir ’n buurman of buurvrou.
Gee dit vir ’n vriend.
Vat dit vir iemand wat dalk deur ’n moeilike tyd gaan.
Of dalk vir iemand wat jy nie eens so goed ken nie.

Jy weet nooit wat ’n klein gebaar vir iemand kan beteken nie.

As jy dit gedoen het, sal jy ons dalk kom vertel?
Vir wie het jy jou tweede tert gegee?
Wat was hulle reaksie?

Miskien kan ons weer ’n bietjie van daardie ou manier van gee terugbring.

Want soms dra die eenvoudigste dinge die grootste boodskap:
“Ek het aan jou ged**k.”
“Jy is vir my belangrik.”
“Ek wou jou net ’n bietjie seën.”

So… wie maak vandag twee? ❤️🍎

⸻

🍎 Ma Rita se Droom Appeltert

Bestanddele:
* 1 blik tert appels
* 1 koppie koekmeel
* 1 koppie witsuiker
* 4 eetlepels botter
* 2 teelepels bakpoeier
* Knippie sout
* 3 eiers
* 65 ml melk

Metode:
Meng alles saam en bak teen 180 grade vir so 30 minute.

Ek het met ’n mes gevoel of hy gaar was, en dit was perfek!

🍯 Sous:
* 1 blik Idealmelk
* ’n Halwe koppie suiker
* 1 teelepel vanilla essens

Verhit die sous en gooi dit dadelik oor die tert.

❤️ En onthou… as jy dit bak, maak sommer twee. Een vir jou en een om weg te gee...

Want ’n bietjie liefde wat gedeel word, word nooit minder nie. ❤️🍎

25/08/2026

🥧 Ek wil vandag graag my eenvoudige, bekostigbare hoenderpastei resep met julle deel.

Ons is steeds in Hermanus en huur tans ’n klein gaste-selfsorg eenheid - dis ’n baie oulike tweeslaapkamer-eenheid, en ons maak die beste van ons tyd hier.

Die vrou van die huis se ma is egter baie siek. Sy is alreeds 94 jaar oud en sy versorg haar - vandag het ek besluit om vir hulle ’n hoenderpastei te maak.
My man het intussen ook ’n baie slegte migraine-aanval gekry en voel glad nie lekker nie, so ek het vir ons net ’n paar kleiner pasteitjies gemaak — ietsie eenvoudig wat ek en my 6-jarige seun kan geniet.

Maar kom ek deel die resep, want hierdie is regtig een van daardie eenvoudige, bekostigbare pasteie wat heerlik is en glad nie moeilik is om te maak nie.

Wat jy benodig:
* Hoender (ek gebruik altyd slegs filette, maar jy kan hoender of 'n heel hoender gebruik)
*Sampioene
*Ui
*Skilferkors deeg (ek het vandag Today se produk gekoop)
*Pakkie soppoeier
*Speserye om hoender te geur (ek het vandag Robertsons se Hoender speserye gebruik)
*Hoender aftreksel blokkie

Ek begin deur die hoenderfilette af te spoel, droog te druk en goed met hoenderspeserye te geur.

Dan plaas ek dit in ’n pot met water en ’n hoenderaftrekselblokkie en kook dit totdat die hoender regtig sag is — so sag dat ek dit maklik uitmekaar kan trek.
Ek trek die hoender uitmekaar en laat dit verder in die aftreksel kook, sodat die geur mooi ontwikkel en die vloeistof begin verminder.

Ek skep so 'n sop lepel van die vloeistof uit en laat dit eers afkoel. Wanneer dit koud is, roer ek ongeveer 1 eetlepel soppoeier daarby om die sous effens te verdik.
Jy kan eintlik gebruik wat jy in jou kas het — hoendersop, sampioensop of wit uiesop werk almal lekker.

Intussen braai ek my sampioene en ui in ’n pan. Ek gebruik geen olie nie en voeg sommer van die geurige hoenderaftreksel by om die sampioene en ui in gaar te maak.

Wanneer alles gaar is, meng ek die hoender, sampioene, ui en sous saam.

Ek laat die hoendervulsel goed afkoel.

Nou bou ek die pastei...

Ek het hier ’n oulike klein emaljeskottel in die kombuis gekry wat perfek in die lugbraaier pas.

Ek sny ’n ronde stuk skilferkorsdeeg en voer die skottel daarmee uit.

Sodra die hoendervulsel heeltemal koud is, skep ek dit binne-in die deeg.

Dan vou ek die deeg bo-oor die vulsel en knyp dit sommer in die lengte toe. Geen perfekte pastei nodig nie — dis mos ’n tuisgemaakte pastei. ❤️

Ek verf die bokant met geklitste eier en sit dit in die lugbraaier teen:
165°C vir ongeveer 16 minute.

En daar het jy dit.

’n Goue, bros, eenvoudige hoenderpastei — gemaak met baie min moeite en met bestanddele wat jy waarskynlik reeds in jou kombuis het.

En natuurlik het ek ook ’n paar kleiner pasteitjies vir ons gemaak.

Want soms is ’n warm, tuisgemaakte pastei al wat jy nodig het. 🥧❤️

25/08/2026

Dit is ’n pragtige dag by ons. Die son skyn, daar waai skaars ’n windjie, en dit herinner my daaraan dat die somer darem nou nie meer so ver is nie. ☀️

En soos ons nader aan die warmer dae beweeg, begin ’n mens sommer weer aan slaaie d**k - aan naweke en kuiers en lekker braai's saam met familie en vriende, en daardie vraag: “Wat neem ons saam braai toe?”

Een van my gunsteling slaaie om te maak wanneer ons na ’n braai genooi word, is ’n lekker tradisionele Kerrie-Noedelslaai.

En dit is ook my man se gunsteling! 😂 So, as ek hom vra watter slaai ons moet saamvat, is sy antwoord ALTYD: “Kerrie-noedelslaai!”

So vandag deel ek sommer weer die resep met julle. 🥗

Hier is wat jy nodig het:

* 1 pakkie noedels - maak gaar volgens instruksie op die pakkie.
Ek het vandag spiraal-noedels gebruik, maar jy kan enige soort gebruik waarvan jy hou.

Net 'n wenk: Moenie jou pasta te gaar kook nie. Dit moet net gaar wees, want jy gaan dit later nog met die sous meng en jy wil nie hê dit moet te pap en "mushy" word nie.

🫑1 soetrissie: Groen, geel of rooi — sny dit in klein blokkies.
🧅 1 ui, fyn gekap

Vir die sous:
🍅 250 ml tamatiesous
🫒 125 ml kookolie
🥣 125 ml asyn
🍬 200 ml suiker
🌶️ 30 ml kerriepoeier
✨ ’n Klein bietjie borrie, vir daardie mooi geel kleur
Opsioneel: 'n paar druppels Tabasco sous (volgens smaak - voeg ook heel laaste by wanneer slaai koud is)

Ek voeg sout by wanneer ek my pasta kook, en dit is gewoonlik genoeg vir my.
Jy kan natuurlik sout en peper volgens jou eie smaak byvoeg.

Hierdie is wat ek doen:
Ek maak my sous gaar... Kom ek verduidelik:
Ek gebruik sommer 25 ml van die olie (uit bogenoemde olie kwota) om my ui en soetrissie liggies in ’n pan te braai totdat dit net begin sag word.
Dan voeg ek die res van my sousbestanddele by — die tamatiesous, olie, asyn, suiker, kerriepoeier en ’n bietjie borrie.
Ek bring die sous tot kookpunt en verwyder dit van die plaat en laat dit dan afkoel.

Wanneer alles heeltemal koud is, meng ek die pasta en die sous saam. Die Tabasco druppels voeg ek ook eers by as die slaai afgekoel is en ek alles meng.

En hier is die ander geheim: Ek maak hierdie slaai altyd ’n dag voor die tyd. 😋

Ek sit dit oornag in die yskas sodat al die geure lekker kan ontwikkel.

Die volgende dag, wanneer ons reg is om te braai of te kuier, maak ek ’n blikkie geelperskes oop, sny die perskes op en meng dit by die slaai.

En daar het jy dit — ’n heerlike, tradisionele Kerrie-Noedelslaai wat perfek is vir ’n braai, ’n kuier of sommer ’n lekker familie-ete. ☀️🥗

Naskrif: En nou moet ek darem iets met julle deel… 😊
Ek weet nie van julle nie, maar ek het al baie keer ’n slaai in ’n glasbak gemaak, toegemaak met kleefplastiek, en dan hoop ek maar net die bak bly regop in die motor en niks gebeur langs die pad oppad na ons kuier nie! 😂
Ek is dus altyd op soek na ’n lekker groot bak met ’n goeie, styfpassende deksel wat ’n slaai veilig kan hou wanneer ons dit moet vervoer.
En ek d**k ek het nou een gekry! 💙
Tupperware het tans hierdie 4L 'Modular Bowl', en ek d**k dit is net perfek vir ’n slaai soos hierdie — lekker groot, prakties en met ’n deksel wat mooi pas.

As jy belangstel in so 'n bak, stuur vir my gerus ’n WhatsApp-boodskap. 😊
PS. die bak is ook perfek as 'n mengbak, werk goed om jou brood deeg in te laat rys en dan ook as ons met vakansie is, pak ek hom vol pakkies peuselhappies vir die lang pad...

21/08/2026

Vrydagaande eet ons gewoonlik wegneem etes of enige ander ete wat lekker maklik is! 😋

Vanaand het ek hierdie heerlike hoender met aartappels en kool in die lugbraaier gemaak, en eerlikwaar… dit was heerlik!

En dit is ook ’n heerlike begrotingsvriendelike ete.

Hier is wat ek gedoen het:

🥔 Ek het 2 aartappels geskil en in klein blokkies gesny.

Ek het ’n bietjie olyfolie onder in my lugbraaier gesit, die aartappels bygevoeg en dit teen 200°C vir ongeveer 8 minute gebak.

🥬 Daarna het ek gesnyde kool bo-op die aartappels gesit en alles volgens ons smaak met speserye gegeur.

Ek het ook 1 hoenderaftrekselblokkie in ½ koppie kookwater opgelos en dit oor alles gegooi.

🍗 Toe het ek die hoender-stukke bo-op gesit en alles weer teen 200°C vir nog 20 minute in die lugbraaier gebak.

Elke 5 minute of so het ek alles lekker omgeroer sodat die aartappels en kool mooi kon verbruin en al die geure kon meng.

En die resultaat? Absoluut heerlik! ❤️

Eenvoudige bestanddele, min moeite, relatief goedkoop en na my mening, ’n lekker voedsame ete.

Soms is die eenvoudigste etes regtig die lekkerste! 😍

PS. Hier het ek alreeds paar happies geneem en toe eers die foto geneem. Volgende keer sal ek ‘n mooier foto neem…

16/08/2026

’n Kort wegbreek-naweek Hermanus toe- my geliefkoosde kus-dorp! ❤️🌊

Soms is dit net nodig om vir ’n dag of twee ’n bietjie weg te breek van ons elke-dag roetines, om asem te skep, iets anders te doen, onself ’n bietjie te bederf en, die belangrikste van alles, tyd saam met jou gesin deur te bring.

Ons het hierdie naweek presies dit gedoen – ons het Hermanus toe gekom en sommer net rustig gekuier. Ons het geen groot planne gehad nie… ons het gaan stap, geëet, gelag, lekker gesels en ons saam-wees geniet.

Gister was dit ’n windstil, sonnige wintersdag – amper te mooi om te glo dis winter. Ons eerste stop was by Oskars Delikatessen vir ’n lekker cappuccino en een van my gunstelinge: hulle ‘potato cup’. 😋 Ek het ’n foto geneem, want ek gaan beslis probeer om my eie weergawe daarvan te maak wanneer ons terug is by die huis. Ek sal dan natuurlik my resep met julle deel!

Later die aand was dit tyd vir iets waarna ek al lank uitsien: regte vis en skyfies, soos mens dit net by die see in papier kry! 🐟🍟

Toe ons in Gauteng gebly het, kon ons dit nêrens kry soos hier by die see nie, en ek het dit al vir meer as ’n jaar nie geëet nie. So ja… ek was BAIE opgewonde! 😂

Manlief het snoek gekies en ek het stokvis geniet – en dit was net so lekker soos wat ek gehoop het.

En toe was daar ook een van daardie klein oomblikke wat vir ’n mamma baie meer beteken as wat ’n mens kan verduidelik.

My man en ons sesjarige het gaan stap. Ons klein mannetjie het skulpe opgetel en ’n paar blommetjies gepluk en vir my ’n klein skulp -tuintjie op my bedkassie gemaak. 🐚🌸

Ek het ongelukkig die foto ’n bietjie laat geneem en die blommetjies het al begin verleë lyk omdat hulle nie water gehad het nie… maar weet julle wat?
Vir hierdie mamma was dit steeds pragtig. ❤️

Vanoggend het ons weer strand toe gegaan. Ons sesjarige het, ten spyte van die koue en die feit dat dit die middel van die winter is, besluit hy kort ’n klein netjie om vissies te vang! 😂🐟
Hy het ‘n maatjie op die strand ontmoet en die twee het gehardloop, gespeel en hulself gate uit geniet.

En ons grootmense? Ons het coney rolletjies met kouevleis en ’n lekker koue Coke gedeel. Nie juis die gesondste ete nie… maar soms mag ’n mens mos net die oomblik geniet! 😉

Nou is ons terug by ons gaste-eenheid. Ons het ’n klein vuurtjie in die kaggel aangesteek en sit sommer net rustig en kuier en gesels.

En terwyl ek hier sit en terugd**k aan die afgelope twee dae, besef ek weer:
Ons jaag so maklik deur die lewe.

Maar soms moet ’n mens net ’n bietjie stilhou.

Gaan stap op die strand.
Drink saam koffie.
Eet vis en skyfies.
Laat jou kind met ’n visnet en in sy swemklere rondloop in die winter. 😂
Bewaar ’n paar skulpe.
Aanvaar ’n handgemaakte blommetuintjie, selfs al is die blommetjies al bietjie verlep.
Sit voor ’n warm vuur.
En wees net saam met die mense vir wie jy lief is.

Want op die ou end is dit dikwels die klein, eenvoudige oomblikke wat die mooiste herinneringe word. ❤️

Hannah Kook
Kos, familie, die lewe – en al die klein lekker dinge tussenin. 🌿

12/08/2026

Gistermiddag het ons sommer lus gekry vir ietsie lekkers saam met ons tee. ☕️❤️

Ek het besluit om my maklike mayonnaise-scones te bak! 😍

Ek is mal oor hierdie resep, want dit is so eenvoudig en vinnig, met bestanddele wat ’n mens gewoonlik reeds in die kombuis het. Geen moeite of ingewikkelde stappe nie — meng, bak en geniet! 🥰

Ek deel graag die resep met julle — want soms is dit juis die eenvoudigste resepte wat ’n mens oor en oor maak. 😋

Jy benodig:
2 koppies koekmeel
2 teelepels bakpoeier
4 eetlepels mayonaise
1 koppie melk
1 teelepel suiker
Knippie sout

Nou is dit regtig maklik:
Meng alles saam.
Skep in ‘n gesmeerde muffin pan.

Bak 180 grade Celsuis vir ongeveer 15 min of tot goud bruin.

Daar is net iets besonders aan varsgebakte scones, nog warm uit die oond, saam met ’n lekker koppie tee. Veral op ’n koue middag… dis sommer pure huislikheid! ❤️

En die lekkerste van alles? Jy hoef glad nie ure in die kombuis te staan om iets heerliks te maak nie.

Probeer dit gerus en laat weet my hoe julle daarvan gehou het! 🌸

PS. Ek maak dit ook gereeld vir my kinders se kosblikke vir skool! Hulle is mal daaroor!
Al wat ek anders doen: meng eers droë bestandele. Sny 2-3 weense worsie op en meng by droë bestandele… voeg ook 1 koppie kaas by. Ek laat ook dan die suiker weg. Meng nou nat bestandele by, bak en hulle is reg vir skool! ✏️🚌

Hannah Kook

03/09/2026

02/09/2026

31/08/2026

30/08/2026

26/08/2026

25/08/2026

25/08/2026

21/08/2026

16/08/2026

12/08/2026

Address

Telephone

Website

Alerts

Shortcuts

Share

Category

Listing takedown request