12/05/2026
Die afgelope paar jaar het my as mens baie geraak en groot veranderinge teweeg gebring...
Voor COVID het die lewe vir ons gesin baie anders gelyk. Toe verander alles amper oornag, en soos soveel ander mense moes ons op maniere van voor af begin wat ons nooit verwag het nie.
Daardie seisoen het gelei tot Haplief.
Wat begin het as “ons probeer net deurkom”, het stadigaan iets soveel groter geword. Dit het vroeë oggende geword, moëe voete, laat aande, lojale kliënte, boodskappe van ondersteuning, vriendskappe, lesse, geloof, oorlewing… en eerlikwaar soms net om een voet voor die ander te sit.
En ek d**k so baie mense verstaan daardie gevoel.
Partykeer vra die lewe van jou om diep te grawe en dinge te doen wat jy nooit ged**k het jy sou doen nie.
Dalk ‘n "side hustle", ‘n nuwe besigheid, ietsie verkoop uit jou kombuis...
Van voor af begin...
Weer probeer... en weer...
Nuwe vaardighede aanleer...
En om net te doen wat nodig is om aan te hou...
Ek d**k daar is baie meer dapper mense rondom ons as wat ons besef.
Vir ‘n lang tyd het die lewe gegaan oor die vraag:
“Wat het ek nou in my hande?” "Wat het ek waarmee ek ietsie kan doen?"
Vir my was dit kosmaak.
Die vermoë om kos te maak wat warm, troosryk en bekend voel. Regte tuisgemaakte kos...
En op een of ander manier is Haplief daaruit gebore...
Vandag was een van daardie dae wat ek sommer oor dinge besin het en terwyl ek oor alles gesit en d**k het, het ek myself weer voor die yskas en vrieskas gekry met dieselfde vraag:
“Wat hét ek wat ek kan gebruik?”
En vandag was ek lus vir sop... so in my vrieskas was Potjiekos Beesvleis en in die yskas en groenterak was daar groente... wortels, aartappels en uie.
En so het vanaand ‘n warm, hartlike pot sop wat al van vanoggend stadig begin prut in die Prutpot.
Hier is wat ek gedoen het:
Lekker dik Groentesop met beesvleis:
Bestandele:
* Potjiekos Beesvleis
* Droë pak gemengde sopmengsel
* 2-3 Wortels fyn gesny in blokkies
* 2-3 Aartappels opgesny in blokkies
* Uie fyngekap
* Sout en peper na smaak
Gooi alles in 'n pot en bedek met water.
Kook tot gaar.
Amper heel aan die einde meng ek een pakkie Knorr Beesvleis en Uie sop met water en voeg dit by. Kook verder tot lekker dik.
Niks fancy nie.
Niks duur nie.
Net eenvoudige kos, gemaak met dit wat ek gehad het.
En dalk is dit hoekom Haplief vir my nog nooit net oor kos gegaan het nie.
Dit het deel geword van ‘n baie groter storie van veerkragtigheid, herontdekking, geloof en om te leer om te gebruik wat jy het. 🍲
